Skelfing og hleypidómar ... sjokk við komu

Af einstakri hetjulund dreif ég mig í vinnuna í morgun. Erfðaprinsinn bannaði mér að fara með strætó, sem ég skildi ekki alveg í fyrstu, og heimtaði að fá að skutla mér báðar leiðir. Ég gekk niðurlút inn á vinnustaðinn rétt fyrir kl. 9 og bölvaði því í hljóði að ekki væri vetur svo að ég gæti notað lambhúshettu. Vissi að ég væri ljót (í fyrsta sinn á ævinni) en ekki svo hræðileg sem kom í ljós á milli kl. 9 og 10. Það leið t.d. yfir Helgu Völu, sumir köstuðu upp, aðrir hlupu öskrandi í burtu úr póstnúmerinu, einhver sagði upp starfinu og Breiðholtshatarinn, sem átti erindi hingað, sagði við mig: „Andlitið á þér er eins og rassgat satans!“ Svo hló hann hræðslulega, barði mig í hausinn og flýtti sér á brott. Jamm, það eru enn stórar brunablöðrur og miklar bólgur í andlitinu. Ég fór eiginlega bara í vinnuna til að fá samúð en sá hvergi umhyggjusamt kærleiksblik í auga, bara hreina skelfingu. Það var eingöngu hún Margrét prófarkalesari sem sýndi mér smáumhyggju, í öruggri fjarlægð þó á hinum enda símalínu. Hún benti mér á ofnæmistöflur sem ég gæti keypt í apóteki, svona ef þetta væri ofnæmi. Ég skil nú af hverju erfðaprinsinn vildi ekki að ég færi með strætó í morgun. Maður hræðir ekki saklausa og góða farþega! Hvað þá bílstjórakrúttin mín og þetta veit erfðaprinsinn. Hann vill að ég eigi afturkvæmt í strætó á þessum óvissutímum verðbreytinga á bensíni. Ætla bara að vinna til rúmlega hádegis og svo er það bara hóm svít hóm! Eigið góðan dag kæru bloggvinir og farið varlega nálægt fokkings gula fíflinu!

Athugasemdir

[Lilja Ragnarsdóttir (IP-tala skráð) 10.7.2008 kl. 13:11]

og þú hlustaðir ekki á mig!! kíkja á lækni Gurrí mín;)

Sjáumst í kvöld

[Þröstur Unnar, 10.7.2008 kl. 13:12]

Arg, líst ekki á þetta hjá þér.

Hér þyrfti greinilega umhverfismat.

[Jenný Anna Baldursdóttir, 10.7.2008 kl. 13:22]

Passa mig á gula skaðræðinu.

Samúðarkveðjur.

[Helga Magnúsdóttir, 10.7.2008 kl. 14:22]

Rosalegt er að heyra þetta. Þú hefði bara átt að koma yfir til mín og ég hefði sýnt þér helling af samúð og þess vegna keyrt þig heim.

[Tiger, 10.7.2008 kl. 15:11]

 Æi elskulegust Gurrí mín, en leiðinlegt að lesa. Þú hlýtur að hafa ofurviðkvæma húð fyrst þú varðs svona illa úti af sólinni - en svo eins og einhver sagði í gær eða áður - ertu kannski líka með ofnæmi í þokkabót fyrir einhverjum snyrtivörum. Einnig það sem þú barst á þig áður en þú fórst í sólina. Vona bara það allra besta fyrir þína hönd ljúfa himnaríkismær.

Ljúfur og góður þessi ungi erfðaprins sem þú elur af þér þarna í himnaríki - mættu fleiri vera eins og hann, enda virðist hann vera heilsteyptur og kærleiksríkur kappinn sá. Það eru ekki allir sem eru tilbúnir í það að leggja þokkagyðjum sínum (lesist mæðrum sínum) lið þegar þeir verða þess varir að ekki er allt eins og best skildi vera.

Knús og batakveðjur til ykkar í himnaríki ljúfa stúlka.

[Birna Dis Vilbertsdóttir (IP-tala skráð) 10.7.2008 kl. 16:08]

[Gerður (IP-tala skráð) 10.7.2008 kl. 17:48]

Elsku Gurrí mín. Þarna færir þú hressilega í stílinn kona! Allavega fór þessu skelfingarviðbrögð alveg framhjá mér;-) Ég fann bara óskaplega til með þér að sjá þig svona krambúleraða í framan. En krambúleruð eða ekki krambúleruð, þá ert þú sannarlega EKKI ljót heldur gullfalleg, lífleg og skemmtileg kona sem ég er stolt af að eiga fyrir vinnufélaga. Og hananú! Cyber kiss á bágtið.