Gáfulegt komment bloggvinar og skemmtilegt sumarævintýri

Skýjað en skyggni ágætt yfir hafið til Reykjavíkur og upp í Lyngháls þegar klukkan er orðin níu og ég ætti að vera sest við skrifborðið mitt eldhress á föstudegi ... Yfirleitt sef ég eins og vært ungbarn allar nætur en vaknaði tvisvar í nótt og hef ekkert getað sofið síðan kl. 6. Orsökin er klikkaður kláði í andlitinu og heima sit ég löðrandi í kremum og grisjum.

Fékk sérlega gáfulegt komment frá bloggvini og hefur það dregið heilmikið úr þjáningunum ... Þau Hákon krónprins af Noregi og eiginkona hans, Mette-Marit, fóru í sjónvarpsviðtal 8. maí 2002 og sátu förðuð úti í sólinni í 75 mínútur með þessum nákvæmlega sömu afleiðingum nema ég slapp við hornhimnuskaða, örugglega rétt svo ... Rut, þessi nýja uppáhaldsbloggvinkona mín, sagði m.a.: „Blandan var su sama og hja ther, smink og solarljos/ljoskastarar. Sannar thetta ekki bara ad thu ert edalborin?“

Þetta eitt og sér hefði líklega ekki nægt til að sannfæra mig en þegar þetta bætist við hið nánast ómögulega þegar við Elísabet II Englandsdrottning lentum báðar í því um svipað leyti að fá ókunnan mann á rúmstokkinn sitt í hvoru landinu, þá er þetta sönnun. Það er líka undarleg tilviljun að þyrlupallur er við hlið himnaríkis.

Langar að vekja athygli á því að nokkur pláss eru laus tímabilin 23/7-29/7 (10-12 ára börn) og 30/7-5/8 (12-14 ára börn) í frábæru sumarbúðunum hennar Hildu systur, Ævintýralandi á Kleppjárnsreykjum. Kreppan hefur ýmsar birtingarmyndir. Ekki eitt eða tvö, heldur nokkur börn, hafa hætt við að koma því að einhverjar ferðaskrifstofur bjóða upp  á svo einstök kjör að nokkrir, sem ætluðu að senda börnin sín í sumarbúðirnar, stukku á freistandi tilboð til að fylla upp í laus sæti sem aðrir höfðu hætt við og þá var hægt að lækka ...

 

Þetta myndi eflaust litlu skipta ef Ævintýraland nyti milljóna, jafnvel tugmilljónastyrkja frá ríki, borg og einkaaðilum á ári hverju, eins og samkeppnisaðilarnir. Hildu munar um því um hvert barn, enda dýrt að reka svona metnaðarfulla starfsemi svo vel sé. Upplýsingar má finna á www.sumarbudir.is og svo er auðvitað hægt að lesa sér til um einstaka starfsemina á sumarbúðablogginu, www.sumarbudir.blog.is.

Þetta eru frábærar sumarbúðir sem hafa starfað í tíu ár við góðan orðstír og hafa þúsundir barna notið þess að dvelja þar. Börnin geta m.a. valið á milli námskeiða í leiklist, grímugerð, dansi, myndlist, kvikmyndagerð, íþróttum og fleira, það er t.d. karaókíkeppni í hverri viku, húllumhædagur, diskó o.fl. og svo frábær lokakvöldvaka þar sem börnin sýna afrakstur námskeiðanna. Svo er æðisleg sundlaug á staðnum. Ég vona innilega að Hilda nái að fylla þessi pláss en annars hefur aðsókn verið góð í sumar.

Athugasemdir

[Egill A. (IP-tala skráð) 11.7.2008 kl. 12:59]

Dóttir mín hefur farið í sumarbúðirnar 3 sumur, þar af eitt sumarið tvisvar. Ég vil koma sérstaklega hljýjum kveðjum til aðstandenda því starfsemin er alveg rjómi. Kodak auglýsir að maður eigi að safna minningum, gott og vel en ef þú vilt tryggja barninu þínu góðar minningar þá er Ævintýraland alveg málið.

Vona að fólk spari í eitthvað annað en góðar sumarbúðir, vona að allt fyllist uppí rjáfur :) það eiga aðstandendur svo sannarlega skilið. Dóttir mín segist reyndar ólm vilja vinna við sumarbúðirnar svo ég heimta allavega 10 ár í viðbót því ég held að það væri líka gott fyrir hana.

Bestu kveðjur.

E.

[Ásdís Sigurðardóttir, 11.7.2008 kl. 13:29]

Vona að kláðinn sé að minnka, þú ert pottþétt eðalborin.  Tvær litlar frænkur mínar vou í sumarbúðunum í byrjun mán. og voru mikið ánægðar.  Knús inn í helgina yðar hátign    

[Brynja skordal, 11.7.2008 kl. 13:45]

Hafðu ljúfa helgi Elskuleg

[Linda Linnet Hilmarsdóttir, 11.7.2008 kl. 15:00]

knús knús og bestu óskir um góða helgi

[Magnús Geir Guðmundsson, 11.7.2008 kl. 15:37]

Elsku drottningin mín, ekkert grín að lenda í þessu, skil það, en hlýtur þá bara að hafa trassað að bera nóg af BB-inu hans Jens á þig!?

En líttu á björtu hliðarnar sem Stormskerið bauð um árið og STebbi Hilmars söng, ef þetta eru svona langsum rákir, þá geturðu allavega sagt að þú sért KR-ingur á leið á næsta leik!

En "Smápot" í lokin. Mér finnst allt í lagi Gurrí að þú auglýsir fyrir systur þína sumarbúðirnar, að laus pláss hafi myndast o.s.frv. en það er ekki til mikils að endurtaka kvartanir um bága samkeppnisaðstöðu, að sumir búi betur en systir þín að hálfu hins opinbera eða annara sem styrkja slíka starfsemi. Á hörðu markaðsmáli og tæpitungulaust, þýðir það bara að systir þín hafi bara ekki verið nógu dugleg þá að "bera sig eftir björginni" eða aðrir séu snjallari að verða sér úti um slíkt.Þú varst með langt mál um þetta sama fyrir hönd systur þinnar í fyrra.

Mátt ekki móðgast miskilja, , bannað, en hefur lítið upp á sig að kvarta undan aðstæðunum og það í miðjum leik, á miðju sumri, þú ákveður sjálf/sjálfur að taka þátt í leiknum og verður bara að spila eins vel úr þínum spilum og hægt er (sem ég efast ekkert um að systir þín geri) þó þér finnist á einn eða annan hátt að "vitlaust hafi verið gefið"!

[Guðmundur G. Hreiðarsson (IP-tala skráð) 11.7.2008 kl. 15:50]

Ég luma nú á einhverjum infrared ljóskösturum, en er fráleitt aðalborinn, þeir þurfa kannski að vera meira inni á bláa sviði spektrúmsins, hm.

[Kristín Katla Árnadóttir, 11.7.2008 kl. 17:41]

Eigðu góða helgi Gurrí mín.

[Lilja Guðrún Þorvaldsdóttir, 11.7.2008 kl. 18:27]

Hafðu það gott um helgina mín kæra bloggvinkona

[Guðríður Hrefna Haraldsdóttir, 11.7.2008 kl. 21:09]

Magnús minn ... ég skil ekki alveg kommentið þitt sem mér finnst frekar nastí. Þetta hefur ekkert með hana að gera eða að hún sé ódugleg að sækja um, það ríkir bara óréttlæti á þessum markaði. Hún þarf að greiða háa leigu og láta gjöldin standa undir rekstrinum. Það þurfa hinir ekki að gera vegna hárra styrkja. Þess vegna munar um hvert barn hjá henni og snertir hana ef afbókanir verða. Það hafa komið nokkrar skráningar í dag hjá henni þannig að þetta er bara fínt. 

Takk, Egill, vona að dóttir þín sæki um þegar hún verður orðin 18 ára.

Góða helgi, sömuleiðis, Katla mín, Linda, Ásdís, Brynja og bara allir bloggvinir.

[Guðríður Hrefna Haraldsdóttir, 11.7.2008 kl. 21:10]

Já, og góða helgi, Lilja mín, sá þig ekki ...

[Jens Guð, 11.7.2008 kl. 22:29]

  Skrítið er nafnið á þessum stað,  Kleppjárnsreykir.

[Magnús Geir Guðmundsson, 11.7.2008 kl. 22:36]

Ææ Gurrí, þú kýst að túlka þetta á versta veg og þar með misskilja, en í öllum bænum notaðu samt íslensku frekar en svona enskuslettu, sem er ekki bara með öllu óþarfi, heldur hallærislegt af annars svo vel skrifandi penna sem þú ert! Kallaðu mig bara kvikindislegan frekar eða eitthvað slíkt.

Ég sagði að ég myndi vel eftir skrifunum þínum áður í sama dúr auk þess sem mér er vel kunnugt um svona rekstur hjá t.d. kirkjunni og íþróttafélögum er njóta bæði styrkja frá opinberum aðilum og öðrum. Elsti bróðir minn var á sínum yngri árum mjög virkur í KFUM og tók ríkan þátt í starfinu m.a. er varðaaði svona barnastarfsemi á sumrin og síðar er hann varð fullorðin, sá hann oft um sumarbúðirnar að Vestmannsvatni.Eitthvað var ég þar sjálfur auk þess að kynnast leikjanámskeiðum ýmsum hjá Þór hér í bæ, svo ég veitt nokkuð um þessa starfsemi.

Systir þín hefur að eigin frumkvæði eða þvíumlíku farið út í rekstur á þessum búðum hennar vitandi vits hvernig landið lægi geri ég ráð fyirr, en kannski gert ráð fyrir að geta sótt styrki til að auðvelda starfsemina. Það hefur ekki gengið sem skildi sem þú greinir frá, en samt hefur þetta gengið í 10 ár!

ÉG var því bara að pota nett í þig með þetta vegna þess, að þessi umkvörtun væri ekki til mikils og þá ekki síst núna er tímabilið væri í hámarki. Nema jú hugsanlega nærðu að skapa einhverja samúð hjá lesendum, sem svo kannski eiga krakka sem nú er á leiðinni í Ævintýralandið, en ég tel þó ekki mjög miklar líkur á því.

Neita svo harðlega að ég hafi verið neitt kvikindislegur eða "ljótur á tánum sem væri ég krumminn á skjánum"!

Ósanngjarnt að halda því fram.

[Guðríður Hrefna Haraldsdóttir, 12.7.2008 kl. 07:43]

Aha, skýrir málið að þú skulir tengjast KFUM ... en það geri ég líka á vissan hátt og var sannarlega ekki að ráðast á þá. Var í KFUK sem barn, fór í Ölver í gamla daga og frábær frændi minn hefur mikið unnið í Vatnaskógi, m.a. sem sumarbúðastjóri. Það ríkir engin óvinátta þar á milli, ekki frá minni hálfu alla vega, við Hilda heimsóttum Vatnaskóg eitt sumarið og fengum frábærar móttökur og svo komu nokkrir starfsmenn Vatnaskógar í opinbera heimsókn í Ævintýraland og það var æðislegt að fá þá. Mér fannst bara fyrra svarið þitt í nákvæmlega sama flokki og: Það er bara konum sjálfum að kenna að þær fái ekki hærri laun! Það gerði mig fúla. Það er ekki systur minni að kenna að hún fær ekki styrki, það er eitthvað annað í gangi. Réttlætiskennd mín segir að annað hvort eigi allir að njóta styrkja fyrir gott sumarbúðastarf, Skátar, KFUM og Ævintýraland, ekki bara þeir tveir fyrrnefndu. Í skjóli styrkjanna geta þeir stjórnað verðlagningu og ekki getur systir mín látið kosta meira en þeir. Þess vegna munar hana um hvert pláss, ekki þá. Hættu svo að nöldra í mér þegar ég er skaðbrunnin í andlitinu, þú getur byrjað aftur eftir helgi ef þú vilt.

[Skagakona (IP-tala skráð) 12.7.2008 kl. 08:40]

Jæja Gurrí mín, nú er það orðið hart. Lesendur þínir farnir að skipta sér af og ritskoða færslur þínar.

Spurning hvort lesendur eigi ekki bara að lesa og njóta þinna æðislegu pistla, og láta það nægja.

hvað kemur það magnúsi við hvað þú gagnrýnir og skrifar um. ég á ekki orð!

Eigðu góða helgi kæra Gurrí.

[Guðríður Hrefna Haraldsdóttir, 12.7.2008 kl. 08:54]

Sömuleiðis, kæra Skagakona. Magnús má alveg segja skoðanir sínar, hann er reyndar alveg frábær, þessi elska. Við erum bara ekki sammála í þessu máli og ég viðurkenni að ég er líka frekar geðill vegna sólbrunans.

[Ellen (IP-tala skráð) 13.7.2008 kl. 17:58]

Ja hérna *hlæaðfáfróðukommentiMagnúsarumvisstmálefni*

Knús á þig Gurrí og alltaf jafn gaman að lesa bloggið þitt !