Allt að smella saman ...

Jæja, allt virðist vera að ganga upp. „Míns“ fékk reyndar of mörg baðhandklæði á meðan önnur íbúð er alveg handklæðalaus og það fattaðist náttúrlega ekki fyrr en búið var að þvo þau öll, þurrka og brjóta saman ... heheheh. Annars sluppum við vel við þvottastand, elskan hann Þröstur bloggvinur, sem er með þvottahúsið hérna á Skaganum, tók t.d. sængurfötin og þvoði fyrir þá sem vildu. Ekki þarf fólkið því að sofa með brakandi ný rúmföt utan um sængurnar sem er frekar óþægilegt. Vona að sæng og koddi fyrir litluna mína, þriggja ára, komi á morgun. Þröstur tók reyndar líka öll tuskudýr og bangsa og hreinsaði fyrir okkur. Eymundson á Akranesi gaf öllum krökkunum skólatöskur með smá skóladóti í, frábær gjöf. Sýnist að við munum bara kíkja eftir ostaskerum og öðru smottiríi sem við eigum auka í skúffunum hjá okkur sjálfum. Annars er þetta allt að smella saman. Pólverjahópurinn hefur verið óþreytandi að flytja þunga dótið og stundum lent í spælandi uppákomum, voru komnir með ísskáp upp á þriðju hæð og hann reyndist of stór fyrir ísskápsgatið. Þeir bara brostu og báru hann niður og inn í bíl aftur og fóru með í aðra íbúð, þessar elskur. Ekkert að stressa sig.

Haldin var fínasta pítsuveisla hjá Rauða krossinum í kvöld og þá var líka úthlutun á ýmsu smottiríi, eins og uppþvottalegi, sápum og slíku. Einar í Einarsbúð er líka að taka saman átta matarpakka sem innihalda brauð, ost, kornflakes, ávexti og annað til ískáparnir verði ekki tómir aðra nótt og hægt sé að fá sér morgunverð á þriðjudaginn.

Íbúðin „okkar“ er að verða skrambi fín og ekki mörg handtök eftir. Sigrún, mamma Ingu „stuðnó“, tók sig til og þvoði upp allt leirtauið í dag. Nýlega kom þessi líka fíni kassi úr Gunnubúð (IKEA) sem innihélt allt það bráðnauðsynlegasta á heimili. Svo kemur eitthvað meira úr Habitat á morgun en það eru gjafir frá versluninni til að gera huggulegt í íbúðunum.

Kjartan og Ella, sem eru líka stuðningsfjölskylda með okkur Ingu, komu í dag, ásamt tveggja ára dóttur, og setti Kjartan stóra IKEA-rúmið saman á mettíma, greinilega vanur, og herti líka betur skrúfurnar á rúmum strákanna en við Inga höfðum engin verkfæri til þess um daginn. Þau eru frábær hjón, viðtal við þau var í Fréttablaðinu á föstudaginn, minnir mig. Sú stutta hreifst mjög af brosandi bollastelli sem einhver hafði gefið og við Inga fundum í Arnardal á dögunum en Arnardalur var áður æskulýðsmiðstöð og þar áður elliheimili (eða þegar ég var lítil), þar sem punt og annað var geymt. Bollastellið settum við á hilluna fyrir ofan eldhúsborðið. Kona sem var að flytja úr „nýju blokkinni“ hafði samband og vildi gefa þetta fína eldhúsborð og stóla og það var þegið með þökkum.

Ég vanræki erfðaprinsinn og kettina án nokkurrar miskunnar þessa dagana en kettirnir hafa víst bara sofið í dag og sonurinn lært dönsku og fleira. Hann tók reyndar handklæðaþvottinn alfarið að sér og uppskar pítsu frá Rauða krossinum í staðinn. Ég greip eina með heim, þar sem voru einhverjir afgangar.

Morgundagurinn verður annasamur líka, það þarf að búa um rúmin þegar Þröstur kemur með sængurfötin, leggja allra síðustu hönd á íbúðina, jafnvel þurrka af aftur og ryksuga, svo þarf að smyrja samlokur annað kvöld og hita kakó (súkkulaði) til að bjóða fólkinu þegar það kemur aðra nótt. Handbók á arabísku mun bíða allra með ýmsum nauðsynlegum upplýsingum. Við sýnum þeim það helsta um nóttina og látum okkur svo hverfa sem fyrst, þau verða örugglega dauðþreytt eftir langt og strangt ferðalag og þurfa að ná að sofna. Vá, það er bara alveg að koma að þessu! Mikið hlakka ég til að hitta „ömmubörnin“ mín.

Athugasemdir

[Sigríður Þórarinsdóttir, 8.9.2008 kl. 00:21]

Svakalegur dugnaður er þetta í ykkur.

[Jenný Anna Baldursdóttir, 8.9.2008 kl. 02:00]

Ég er nærri því farin að grenja hér um hánótt.  Þið eruð svo yndislegir Skagamenn.

[SigrúnSveitó, 8.9.2008 kl. 07:18]

Jiminn, brjálað að gera hjá þér, og fleirum. Þetta er orðið svakaflott. Gangi þér vel í ömmó, mín kæra.

Knúúúúús...

[Isa (IP-tala skráð) 8.9.2008 kl. 07:38]

It´s Ramadan girls! No food until after sunset and no breakfast after sunrise. It is Ramadan girls!

[Ragnheiður , 8.9.2008 kl. 09:41]

Þetta er frábært ! Allir að hjálpast að ..Ég er ekki betri en Jenný, næstum farin að grenja hér yfir þessu....það er gott að grenja af gleði.

Segðu erfðaprinsinum að hann þurfi að skrifa komment hjá mér á dönsku, hehe

[Guðríður Hrefna Haraldsdóttir, 8.9.2008 kl. 10:31]

Akkúrat, Isa, það var búið að segja okkur að það væri Ramadan, en fólkið kemur um nótt og þá verður gott að fá hressingu, held líka að börnin séu ekki látin fasta, a.m.k. ekki þau yngstu.

Þetta er voða skemmtilegt verkefni sem mæðir auðvitað mest á þeim í Rauða krossinum. Virkilega gaman að fá að taka þátt í þessu.

Anna mín, ég tala arabísku reiprennandi, hélt að þú vissir að ég talaði öll tungumál heimsins! 

[Katrín Snæhólm Baldursdóttir, 8.9.2008 kl. 11:23]

Kærleikur er alheimstungumál og það er tungumál sem allir í heiminum skilja.

[Helga Magnúsdóttir, 8.9.2008 kl. 11:26]

Rosalega er þetta flott hjá ykkur. Mér finnst frábært hvað þið takið vel á móti þessu fólki þar sem þetta leit alls ekki vel út í byrjun og menn töluðu um að það væri ómögulegt að þetta fólk kæmi. Það eru greinilega margar margar Gurríar á Skaganum.

[Guðríður Hrefna Haraldsdóttir, 8.9.2008 kl. 11:36]

Hehheheh ... hjálpsemi hefur verið viðloðandi Skagann alla tíð, ég hef heyrt margar fallegar sögur um það í gegnum árin. Í byrjun var kannski eðlilegt að það vöknuðu spurningar hjá sumum og einhver misskilningur var í gangi líka. Þessar raddir heyrast ekki lengur, nema þá helst áhyggjur af því að konunum eigi eftir að líða illa í þessu veðurfari, skammdeginu og svona ... Ég held bara að allt sé betra en það sem þær þurfa að búa við núna! Fyrst þær lögðu í þetta langa og erfiða ferðalag í von um að geta hafið nýtt líf eru þær pottþétt með bein í nefinu!

[alla (IP-tala skráð) 8.9.2008 kl. 12:20]

Þið eigið sannarlega heiður skilinn!

[Ásdís Emilía Björgvinsdóttir (IP-tala skráð) 8.9.2008 kl. 12:28]

Sæl Gurrý!

Ég er stolt, sem fædd og uppalin Skagamanneskja, af þessu framtaki. Það er frábært að lesa þessa færslu þína, um það hvað þið eruð að gera fyrir þetta blessaða fólk. Ég tek undir það sem þú segir, að það sé allt betra en það sem það býr við núna.

Kær kveðja úr Eyjum,

[Hanna, 8.9.2008 kl. 13:05]

Þið eruð ekki bara frábær - heldur líka heppin að fá að hjálpa til við þetta verkefni :)

[Halla Rut , 8.9.2008 kl. 14:30]

Mikið rosalega eruð þið öll dugleg. Gott að vita að svona vel sé tekið á móti þeim.

[Iris Björg Þorvaldsdottir (IP-tala skráð) 8.9.2008 kl. 17:35]

Glæsileg vinna og einstaklega gleðilegt að sja hversu vel verður tekið a moti folkinu.
Er hjukrunarfræðingur uti i DK og hef haft flottamenn fra þessum striðsþjaðum löndum sem sjuklinga og þau þurfa virkilega að finna það að það se til gott folk i þessum heimi. Það er hræðinlegt að heyra hvað þau hafa lent i, svo mörg af þeim.