Nýtt hótel, sjónvarpsstjarna og fyrirhugaðar móttökur

Samstarfskona mín skutlaði mér í Háholt eftir vinnu á föstudaginn og þannig gafst tími til að kíkja á nýja hótelið sem var að opna rétt við stoppistöðina mína, Hótel Laxnes. Fékk boðskort í opnunina og fannst voða gaman að geta kíkt þótt það væru bara í 10 mínútur. Þetta var mjög flott og næst þegar skellur á brjálað veður og strætóbílstjórarnir væla: „Vindhviðurnar eru 40 m/sek á Kjalarnesi, snökt, snökt, við förum ekki,“ þá verður hægt að gista þarna og hafa það virkilega gott. Tala nú ekki um ef maður getur gripið sætan karl af stoppistöðinni með sér ... múahahahaha, ókvæntan að sjálfsögðu, ég er dama! (Myndin er stolin af öðru bloggi, sorrí glamour-lady)

Íbúafundur hófst núna kl. 17 í dag í Bæjarþingsalnum á Akranesi um starfsleyfi Sementsverksmiðjunnar. Það verður án efa fjörugur fundur, enda margir mjög á móti því að leyfið verði endurnýjað. Ekki séns að fara þótt ég hafi heilmikinn áhuga á að kynna mér málstað beggja aðila.

Heyrði í Shymali, indversku vísindakonunni minni sem var alltaf samferða mér í strætó, en hún vinnur hjá Rauða krossinum núna. Hún segir að barnasængurnar komi í dag og þar með létti af mér stærsta áhyggjuefninu. Shymali og Anna Lára hjá RK hafa ótrúlega mikla yfirsýn. Ein stuðningskonan sagði í gær að það vantaði dýnu í barnarúmið sem hún var með. „Talaðu við Ingu eða Gurrí, þær eru með aukadýnu,“ og konan kom í gærkvöldi og sótti dýnuna. Sumir þola ekki að vinna undir álagi en þessar tvær hafa sýnt að það er hægt að hlæja og hafa gaman þótt mikið sé að gera. Mikill heiður að fá að taka þátt í þessu verkefni með þeim.

Stuðningsfjölskyldurnar koma líka úr Hvalfjarðarsveit og Borgarnesi, a.m.k. ein úr Reykjavík, og vegna fjarlægðar eru þær vissulega óvirkari en samt ... einn í þeim hópi er meira að segja talandi á arabísku sem er bara snilld. Svo ætlar hún Amal, the Palestínukona á Íslandi, að flytja á Skagann í heilt ár til að vera konunum innanhandar. Þessar elskur verða farnar að borða þorramat áður en við vitum af! Hehehehe ...

Viðbót: Ísskápur er kominn, barnasængin líka, búið að búa um rúmin og sækja meira punt sem elsku Habitat gaf. Inga er að sækja matvöruna í Einarsbúð núna og þá verður hægt að gera eitthvað af viti matarkyns handa fólkinu okkar í kvöld/nótt þegar það kemur. Maður finnur sér alltaf eitthvað til að hafa áhyggjur af ... núna er það gatið þar sem uppþvottavélin var, hvað er hægt að setja þar ... arggggg!

Ég fékk upphringingu frá bæjarskrifstofunum áðan og í framhaldinu kom Gísli Einarsson, the vestlandssjarmör, og myndaði íbúðina „okkar“. Ef vel tekst til með fréttina þá ætti Þröstur bloggvinur að sjást en hann kom um sama leyti með tandurhrein sængurfötin og svo auðvitað tuskudúkkurnar og bangsana eftir hreinsunina. Því var öllu hrúgað í barnarúmið hjá litlunni og myndað en megnið af því fór reyndar ofan í poka aftur og verður dreift til fleiri barna. Býst við að þetta komi í fréttum RÚV klukkan sjö í kvöld. Vil sérstaklega taka fram að sjónvarpsvélar bæta a.m.k. 20 kílóum á sumt fólk og sumt fólk blaðrar þvílíkt þegar það er stressað þótt það líti út fyrir að vera rólegt og kemur ekki helmingnum að sem það langar til að segja ...

Mér líst mjög vel á móttökuathöfnina sem verður í kvöld/nótt. Tveir sjálfboðaliðar um hverja fjölskyldu munu bíða á tröppunum og bjóða fjölskylduna velkomna, afhenda konunni lyklana, fara með henni og börnunum inn í íbúðina og gefa þeim hressingu, sýna þeim það allra helsta og leyfa þeim svo að fá frið. Finnst þetta frábær hugmynd hjá Rauða krossinum. Svo verður móttaka á morgun þar sem við getum spjallað við okkar fólk með aðstoð túlka, þá getum við t.d. spurt hvort við eigum að færa einhver rúm milli herbergja, hvað vanti og hvað þær vilji mikla aðstoð frá okkur. Mín kona sér út á hafið, svona á milli húsanna, og úr hinum enda íbúðarinnar sést í Akrafjallið, bara gaman.

Athugasemdir

[Jenný Anna Baldursdóttir, 8.9.2008 kl. 17:43]

Krúttið þitt.  Linkaði á þig í dag.  Þetta er orðin eins og spennandi framhaldssaga með komu fólksins.  Skagamenn eru búnir að taka verðlaunapeninginn fyrir samkennd og hjartahlýju á einu bretti.  Ekkert eftir í pokanum handa okkur dauðlegum í Reykjavíkurkjördæmi.  The höfuðborg.

[Helga Magnúsdóttir, 8.9.2008 kl. 17:57]

Þetta er allt alveg meiriháttar. Það hlýtur að vera gaman að koma að svona þörfu verkefni og vita að maður er að hjálpa fólki sem virkilega þarf á því að halda. Heill þér og öðrum sem að þessu koma.

[Guðríður Hrefna Haraldsdóttir, 8.9.2008 kl. 17:59]

Hlaut að vera, Jenný, fannst komnir eitthvað svo margir gestir! Þetta er svo gaman og ég hef kynnst svo mörgum frábærum Skagamönnum síðustu daga og vikur! Þetta þjappar okkur bara saman. Við tölum og "míns" og "þíns" (fjölskyldur) og bara tilhlökkun í gangi.

[Guðríður Hrefna Haraldsdóttir, 8.9.2008 kl. 18:00]

Já, Helga, þetta er nefnilega bara skemmtilegt.

[Þröstur Unnar, 8.9.2008 kl. 18:08]

Gardínugorm og hengi fyrir gatið, góða mín.

Þetta er náttúrulega alveg hræðilegt athæfi kona. Að stefna me and my self, órökuðum og ótilhöfðum beint í flasið á "The Vestlandssjarmör" him self. Og í þokkabót að láta okkur bíða svona lengi eftir þér á tröppunum.

Held að hann sé núna með ævisögu mína á hreinu.

[Guðríður Hrefna Haraldsdóttir, 8.9.2008 kl. 18:11]

Jamm og hvar fær maður gardínugorm á þessarri stundu? Ertu með tillögu?

[Kristín Katla Árnadóttir, 8.9.2008 kl. 18:13]

Stórt knús

[Vera Knútsdóttir, 8.9.2008 kl. 19:11]

Heyrðu ég reyni að koma handklæðunum til þín á miðvikudaginn, verð í bænum nefnilega í kvöld og ætla nú að þvo þau áður en ég læt þau frá mér. Þetta eru fínustu baðhandklæði, held 4 stk eða svo.

[Guðríður Hrefna Haraldsdóttir, 8.9.2008 kl. 19:22]

Heheheheh, og líka hann Þröstur bjargvættur!

[Guðríður Hrefna Haraldsdóttir, 8.9.2008 kl. 19:53]

Frábært, Vera ... og takk, Jón Arnar.

[Lilja G. Bolladóttir, 8.9.2008 kl. 20:10]

Vá, en skemmtilegt og spennandi verkefni að taka þátt í. Ég er að snúa til baka í bloggheima eftir smá fjarveru, svo ég hef alveg misst af þessarri framhaldssögu en nú ætla ég að byrja að lesa, aftur á bak

Gangi ykkur vel í nótt, það er ótrúlega dýrmætt fyrir þetta fólk að fá svona flottar móttökur. Ég er ánægð með ykkur, Skagamenn!!

[Anna Ólafsdóttir Björnsson, 8.9.2008 kl. 20:24]

Þú varst flott í sjónvarpinu eins og við var að búast, heyrði í þér og Ari sá þig. Aðalatriðið er þó það sem þú ert að gera, frábært bara.

[Þröstur Unnar, 8.9.2008 kl. 20:35]

Þú ert ágæt gormurinn þinn. Ég á engan gorm.

Fékstu sendinguna frá Láru Hönnu?

[Magnús Geir Guðmundsson, 8.9.2008 kl. 20:39]

Ýmislegt í gangi já, Þröstur með nýtt tungumál, örlar á ástleitni og boðar sendingar frá öðrum!

En ég ætla bara að kvelja þig sem alltaf, heimta af þér meðan þú dundar við að bíða, að sauma, prjóna eða hekla svona eins og einn klukkustreng, fjórir þetta og hitt, sérð til með það forkur dugnaðar!

[Edda Agnarsdóttir, 8.9.2008 kl. 20:56]

Fögur og blíð með þröstinn sér við hlið!

[Hrafnhildur Ýr Vilbertsdóttir, 8.9.2008 kl. 22:01]

Frábært að sjá hvað fólk er tilbúið að gera fyrir komu flóttafólksins...gangi ykkur öllum vel..

[Halldór Jóhannsson, 8.9.2008 kl. 22:24]

Takk fyrir kaffið um daginn,varð að renna því hratt niður við Grundaskóla,eins og þú varst vör við var traffik þá.Ég býð næst og þitt lið fær líka.Viltu fyrirgefa að ég tók ekki beygju þá að himnaríki.Verið hjartanlega velkomin í strætó.Hver veit nema að við flöggum á strætó.Óska þér og öllum góðs gengis og skemmtunar og fólkinu býð ég hjartanlega velkomið.Vona svo að samhugur sé hjá öllum Skagamönnum.

[Aprílrós, 8.9.2008 kl. 23:19]

innlitskvitt fyrir svefninn ;)

[Brynja skordal, 9.9.2008 kl. 00:56]

[Anna Ragna Alexandersdóttir, 9.9.2008 kl. 10:29]

Skemmtilegt og spennandi verkefni að taka þátt Gangi þér vel vina.