Hjólasaga, kjúklingur og smá bold

Dagurinn gekk bara vel.  Eitthvað skolaðist til tíminn sem fjölskyldan átti að mæta á spítalann þannig að strætóferðin verður að bíða til næstu viku. Fengum erfðaprinsinn til að keyra okkur á sjúkrahúsið í einum grænum hvelli, það var sem betur fer eyða í stundaskránni hans þannig að þetta bjargaðist. Litlan mín, Nadeen, var að vonum harla ósátt við að vera stungin með sprautu en öll börnin fengu verðlaun fyrir dugnaðinn, flotta blýanta og þau minnstu blöðrur. Móttökurnar á sjúkrahúsinu voru þvílíkt hlýlegar, allir brosandi og glaðir. Hef ég ekki stundum sagt sögur um þetta frábæra sjúkrahús hérna á Skaganum?

Mér hefur farið ótrúlega fram í arabísku og má teljast nokkurn veginn altalandi ...

اولاد بلدي ، وعبد الله محمد ، سعيد علي الدراجات الهواءيه. Í þessarri setningu var ég t.d. að tala um hvað strákarnir mínir væru ánægðir með hjólin sín.

Inga fékk frábæra upphringingu í dag, svona áður en hún skrapp til Ameríku. Lína er búin að eignast hjól en Ragga Theódórs hjúkka á eitt gamalt og gott í geymslunni sinni sem hún vill gefa henni og við Kjartan sækjum það á morgun ef það hentar Röggu. Bara æði. Inga hélt að hún ætti einhvers staðar barnastól til að setja á mömmuhjólið og þá verður þetta „fjölskyldan hjólandi“.

Lína var að elda kjúkling þegar ég fór, hún var komin með góð krydd frá Pottagöldrum, kjúklingakrydd og pipar, fannst lyktin af þessum kryddum mjög góð og notaði óspart á kjúllann. Hún skar niður tómata og lauk og setti með kjúklingnum og lyktin var orðin mjög góð þegar ég yfirgaf samkvæmið. Okkur tókst að þvo eina vél og hengja út á svalir á þurrkgrind, vona bara að mér hafi tekist að koma henni í skilning um rokið sem von er á í kvöld, að hún verði að taka grindina inn. Held að ég sýni stundum svolítið leikræna þjáningu í stað tjáningar ... hehehhe. Er búin að komast að því að fjölskyldan er ekki hrifin af mjólkurvörum, jógúrti og slíku, enda eflaust ekki mikið borðað í Írak. Ávextir eru aftur á móti í miklu uppáhaldi.

Ég færði yngri stráknum, afmælisbarninu f. 090999, tvær DVD-myndir, Spiderman I og hina sígildu, fyndnu og góðu Ghostbusters í afmælisgjöf frá okkur Ingu. Strákarnir þekktu Spiderman heldur betur og urðu voða glaðir. Held að gamla DVD-tækið, sem þau fengu lánað, sé eitthvað ryðgað, það gekk ekki nógu vel að horfa á Spiderman. Kannski tölvusnillingurinn Kjartan kíki á tækið á morgun, mögulega þarf bara að hreinsa það. Hef tröllatrú á honum þótt hann hafi víst argað þegar hann sá flókið stjórnborðið á þvottavélinni. Okkur Línu tókst þó í sameiningu að setja í vél! Múahaha ..

Bold: Stefanía, sem er í rosa sálfræðimeðferð hjá Taylor, viðurkennir að hún eigi móður á lífi og Pam, „litla“ systir Steffíar, eftirlæti pabbans heitins, sjái um hana. Stefanía er beisk út í aldraða móður sína og hefur ekki talað við hana í 30 ár, mamman tók málstað pabbans sem barði Stefaníu með belti þegar hún var krakki ... Nú er allt að koma upp á yfirborðið og geðlæknirinn geðþekki, Taylor, á heiður skilinn fyrir að ná þessu upp úr Steffí, enginn í fjölskyldunni veit þetta. Nick, nýi eigandi Forrester-tískuhússins, rekur nokkra starfsmenn og aðrir ganga út. Ég flissaði þegar hann kynnti Donnu, systur Brooke, sem einhvers konar stjóra. Garrison, óþolandi hönnuður sem var hjá Spectra, kjaftakarl og leiðindapúki, er orðinn aðalhönnuður hjá Nick þannig að ... Nick finnst að honum hafi tekist að láta Forrester-fjölskylduna axla ábyrgð og er hreykinn af því.

Athugasemdir

[Jenný Anna Baldursdóttir, 12.9.2008 kl. 23:07]

Setti hón tómata í ofnskúffuna með lauknum?  Sounds like a plan.

Þú ert gimsteinn Gurrí.  Alveg á hreinu.

[Guðríður Hrefna Haraldsdóttir, 12.9.2008 kl. 23:22]

Skar tómatana niður og kryddaði og laukinn líka. Sýndi mikla snilld með hnífinn, þurfti ekki bretti ... vá, bara flott.

[Nanna Rögnvaldardóttir, 12.9.2008 kl. 23:42]

Jógúrt er mjöööög algeng í Írak og mikið notuð í írakskri matargerð, enda upprunnin einhvers staðar á þessum slóðum, en það er auðvitað alvörujógúrt, ekki þetta sæta ávaxtablandaða sull ... Prófaðu að benda þeim á hreina jógúrt og segja þeim að þetta sé laban (eða liban); hún er reyndar líklega töluvert þynnri og verri en þau eiga að venjast en það má þó stundum notast við hana.

[Brynja skordal, 12.9.2008 kl. 23:53]

En frábært að Lína sé að fá Hjól og stól á hjólið fyrir litlu skvísuna þegar maður sér arabísku skrifaða finnst mér það koma út sem mikil list skrautskrift ótrúlegt að geta lesið úr þessu en væri kannski auðvelt ef maður kynni það já missti af bold í dag svo takk fyrir upplýsingar maður er farinn að skilja reiði steffý ef hún hefur fengið svona uppeldi kellan sú hafðu ljúfa nótt elskuleg

[Guðríður Hrefna Haraldsdóttir, 13.9.2008 kl. 00:00]

Held að þetta sé hárrétt hjá þér, Nanna, þau hafa bara ekki fílað allan sykurinn í jógúrtinu. Spyr hana um laban/liban á morgun.

Já, og góða helgi!

[Halldór Jóhannsson, 13.9.2008 kl. 00:03]

Beið spenntur eftir ykkur í dag,en sjáumst vonandi í næstu....

[Sirrý (IP-tala skráð) 13.9.2008 kl. 00:11]

Ertu með tölvupóstfang? Mundi vilja gefa dvd spilara sem virkar til fjölskyldunnar.

[Guðríður Hrefna Haraldsdóttir, 13.9.2008 kl. 00:15]

[e-mail]

 Já, það voru vonbrigði, Halldór, að komast ekki í strætó. Reynum að komast á þriðjudaginn.

[Aprílrós, 13.9.2008 kl. 00:18]

Góða helgi mín kæra Gurrí

[Nanna Rögnvaldardóttir, 13.9.2008 kl. 00:36]

Það eru líka uppskriftir að heimagerðri jógúrt í íröksku matreiðslubókunum mínum ef er einhver hjálp í því.

[Edda Agnarsdóttir, 13.9.2008 kl. 01:57]

Ég kynntist palentískri fjölskyldu í DK og konan í þeirri fjölskyldu notaði jógurt. Það héngu iðulega þrjár léreftstuskur á höldum skápanna yfir eldhúsvasknum með jógurt í til að láta mysuna renna frá og svo var þetta notað í allskonar bakstur og mat.

Gott að fá framhald.

[Anna Ragna Alexandersdóttir, 13.9.2008 kl. 18:13]