Skrýtinn dagur - úttektir hjá sparifjáreigendum

Hér í vinnunni hefur ríkt skrýtið andrúmsloft í dag, eins og örugglega víðar í þjóðfélaginu. Sögusagnir um hrun Landsbankans ganga fjöllunum hærra og einn samstarfsmaður minn frétti að heilir 2 milljarðar hefðu verið teknir út bara í Landsbankanum í Mjódd í dag ... af hræddu fólki sem vill frekar hafa peningana undir koddanum en mögulega tapa þeim. Veit um einn karl sem tók reyndar allt sitt út í dag, en ekki þó í útibúinu í Mjódd en í öðru Landsbankaútibúi. Kannski óþarfapanik, verst að enginn veit neitt og ráðamenn vilja sem minnst segja og bara þegja sem gerir almenning enn hræddari.

Einhver sagði í matsalnum (fínasti matur í dag) að landið hefði ekki efni á bensíni nema í stuttan tíma í viðbót, síðan fengist ekki meira keypt inn, og þá þurfum við að fara að labba í vinnuna. Ég á líklega óhægt um vik en Eiríkur Jónsson sagði að nú yrði líklega leyft í fyrsta sinn síðan 11. júlí 1998 að fara fótgangandi í gegnum Hvalfjarðargöngin. Ja, eða á hlaupahjóli, sem væri sniðugra, bætti snillingurinn við. Jamm, hvaða stórfréttir ætli skelli á okkur um helgina? Eða á mánudaginn?

Athugasemdir

[Magnús Geir Guðmundsson, 3.10.2008 kl. 16:34]

Bévítans bölmóðstal erðetta Guðríður!

Ég hélt nú bara upp á fallegan, sólroðin, en smá kaldan föstudagsmorgun með því að kaupa tvær bleikar slaufur, táknræn aðgerð til heilla hinum fallegu uppsprettulindum sem konunnar brjóst eru!

Bið að heilsa þínum vænu, mín kæra Vikusnót!

[Guðríður Hrefna Haraldsdóttir, 3.10.2008 kl. 16:51]

Takk, Sigurður Helgi, auðvitað 1998.

Þetta eru spennandi tímar, Magnús Geir, enginn bölmóður hér!!!  

[Ben.Ax. (Benedikt Jóhannes Axelsson), 3.10.2008 kl. 16:51]

Hertu upp huga þinn,
hnýttu allt í hnút.
Leggur ekkert inn
tekur bara út.
Syndir þínar o.s.frv.

Eigum við ekki að líta á björtu hliðarnar? Við eigum enn menn eins og Davíð og Golíat og Gunnar og Geir. Og ekki má gleyma snillingunum í háskólanum, sem allt vita, en ég man ekki hvað heita.

[Guðríður Hrefna Haraldsdóttir, 3.10.2008 kl. 17:11]

Einmitt, ég er sallaróleg og treysti mínu fólki alveg til að bjarga landinu. Þetta er einhver panik sem hefur gripið fólkið ...

[Hulda (IP-tala skráð) 3.10.2008 kl. 18:16]

... ef ég byggi uppá skaga þá sæi ég mig ekki fyrir mér þjótandi niður hvalfjarðargöngin (á leið í bæinn) á hlaupahjóli

[Guðríður Hrefna Haraldsdóttir, 3.10.2008 kl. 22:55]

Ég er búin að skamma hann Eirík svo oft hérna á blogginu mínu og næstum leggja hann í einelti á köflum að ég varð að "kolvetnis"jafna þetta svolítið ... hann er alla vega fínn samstarfsmaður.