Fræðingar og fegurðardísir í strætó ...

Skúli kom okkur af miklu öryggi í Mosó þar sem Haraldur brosmildi tók við okkur og ók af engu minna öryggi til Reykjavíkur. Og það í hálku. Ég hafði skemmtilegan sessunaut í strætó, lögfræðinginn hressa sem ég hef bloggað um áður, og ræddum við um bækur og fleira skemmtilegt alla leið frá Skaganum. Hann er að lesa Bíbí núna og ég var að enda við hina bráðskemmtilegu Doktor Proktor og prumpuduftið. Fyrir aftan okkur sat virðulegi guðfræðineminn Jóhanna sem var í öngum sínum af því að hún gleymdi gemsanum heima. Ég lánaði henni minn í smástund, enda á maður víst að vera góður við guðfræðinga til að lenda ekki í helvíti. Líka lögfræðinga ef maður myndi nú fyrir mistök lenda í helvíti .... múahahaha. Við lögfræðingurinn skiptumst á afmælisdögum, hann er fæddur í júní en samt ágætur og árið eigum við reyndar sameiginlegt og ekki með  ómerkilegra fólki en Madonnu, Viggo Mortensen og Guðmundi í Byrginu. Hann á einn kött, ég á tvo en ég held að hann eigi fleiri börn en ég.

Ætlaði svo að vera ógurlega fyndin þegar ég fór upp í leið 18 í Ártúni með tvöfaldan skiptimiða sem ég fékk óvart í Skagastrætó og sagði einlæglega við bílstjórann þegar ég afhenti honum allt of langan miðann: „Ég borga auðvitað tvöfalt af því að ég er svo feit!“ Bílstjórinn horfði blíðlega á mig og sagði: „Kaj pravite, krava?“

Ógreiddi maðurinn var í leið 18, þessi seinni ógreiddi sko, og mig grunar að hann sé, eins og allt skrýtna fólkið í vagninum, í Kvikmyndaskólanum með Davíð frænda. Þýðandinn lenti á "kvennafari" eða einhver, sæmilega sæt skvísa, hlammaði sér hjá honum og hann fékk ekki við neitt ráðið. Man hvernig kvíðinn nagaði mann í strætó í eldgamla daga yfir því að einhver ljótur settist hjá manni. Svo hefur örugglega ljóta fólkið á Íslandi dáið út á undanförnum árum eða gleraugun mín dofnað því að þetta hræðir mig ekki lengur. Set samt alltaf upp undarlegan svip, svona eins og ég sé til alls vís, jafnvel hættuleg, þegar einhver asnalegur gerir sig líklegan til að setjast hjá mér. Það virkar ekki oft, því miður. Aðeins þrír Indverjar voru í vagninum að þessu sinni.

Jæja, farin að vinna. Óska ykkur yndislegs dags, bloggvinir kærir, sem og bloggóvinir. 

Athugasemdir

[Sigurður Hreiðar, 15.10.2008 kl. 11:07]

Hefur aldrei hvarflað að þér að það sé ekkert ljótt fólk til lengur? Skýring mín á því er sú að eftir því sem maður eldist og væntanlega þar með þroskast sjái maður ekki bara útlitið heldur skíni mannkostirnir í gegn. Og allir hafa einhverja kosti (þó óneitanlega fari sumir vel með það!)

Kv.

[Guðríður Hrefna Haraldsdóttir, 15.10.2008 kl. 11:39]

Jú, minn elskulegi Sigurður ... ég var bara að gera grín að sjálfri mér, meintu sjónleysi og skorti á þroska!

[Ólöf Anna , 15.10.2008 kl. 11:43]

áttu marga bloggóvini?

[Guðríður Hrefna Haraldsdóttir, 15.10.2008 kl. 11:49]

Heheheh, sko heilan helling!!!! Er komin með lífverði hér í bloggheimum og allt!

[Guðmundur G. Hreiðarsson (IP-tala skráð) 15.10.2008 kl. 12:42]

Spjalla ótilneydd við lögfræðing? Þær eru margar birtingarmyndir kreppunnar, hm.

[Guðríður Hrefna Haraldsdóttir, 15.10.2008 kl. 12:47]

Verður maður ekki að halda þeim góðum á þessum tímum? heheheh

[Elín Íris (IP-tala skráð) 15.10.2008 kl. 13:21]

Sæl Gurrí mín, ég vil kvitta fyrir mig þar sem ég er einlægur aðdáandi þinn hér. Ég hef gefist uppá "þínum" strætó og tek þann sem kemur korteri á undan. Í honum þarf ég enn aldrei að efast um að fá sæti og get jafnvel breytt úr mér með Fréttablaðið Baráttukveðja Elín Íris

[Guðríður Hrefna Haraldsdóttir, 15.10.2008 kl. 15:09]

Já, þú getur gert þetta yfir vetrartímann, þegar strætó er ekki lengur á hálftíma fresti. Það bættust ansi fáir við í Mosó, þetta er Skagaferðin greinilega, stappfullur strætó, nokkrir stóðu. Sakna þín, elskan.

[Anna Ólafsdóttir Björnsson, 15.10.2008 kl. 15:10]

Hressandi pistill úr hálkuheimum.

[Katrín Snæhólm Baldursdóttir, 15.10.2008 kl. 17:11]

[Guðný Anna Arnþórsdóttir, 15.10.2008 kl. 17:56]

- if you want my opinion:  það ætti að vera til miklu, miklu meira af þér ....

[Guðríður Hrefna Haraldsdóttir, 15.10.2008 kl. 17:56]

Vegna "fjölda" fyrirspurna: "Kaj pravite, krava" þýðir "Hvað sagðir þú, belja?" á slóvensku.

[Ásta S. (IP-tala skráð) 15.10.2008 kl. 18:08]

Sæl,  bara svo þú vitir, þá eru flestir indverjarnir okkar farnir af landi brott ..  .. í kjölfar bankahörmunganna.

Þannig að nú get ég ekki lengur blaðrað í þá blogginu þínu  .  Sakna þeirra.

[Guðríður Hrefna Haraldsdóttir, 15.10.2008 kl. 18:38]

Takk, Ásta. Þetta voru frábærir menn, þessir tveir sem ég spjallaði stundum við og allt þetta fólk bauð af sér góðan þokka. Skil að þú saknir þeirra, það mun ég líka gera. Gott að vita þetta, takk enn og aftur.

[Helga Magnúsdóttir, 15.10.2008 kl. 19:38]

Ég sat alltaf í sætinu nær ganginum ef ég fór ein í strætó svo enginn settist hjá mér. Lenti einu sinni í því að maður með Brut-rakspíra settist hjá mér og ætlaði sko ekki að láta það koma fyrir aftur. Þurftir að fara úr strætó mörgum stoppistöðvum of snemma.

[Aprílrós, 15.10.2008 kl. 19:45]

innlitskvitt ;)

[Breiðholtshatarinn (IP-tala skráð) 15.10.2008 kl. 21:26]

Kaj pravite, krava þýðir Ólögulega afsláttarskækja. Þú gætir kannski kvartað við strætó vegna ónota, en ekki vegna lyga!

[Jóna Á. Gísladóttir, 15.10.2008 kl. 22:02]

ég er svo sammála bílstjóranum Gurrí mín

mér líkar vel plottið þitt og fyrirvarinn: lögfræðingur, guðfræðinemi, efra og neðra

[Brynja skordal, 15.10.2008 kl. 23:12]