Maður í einkennisbúningi-fullkomin byrjun á degi

Við Ásta ákváðum í gær að vera svolítið mikið snemma á ferðinni í morgun og ég stillti vekjaraklukkuna á áður ókunnar víddir ... eða 5.45, ég vissi satt að segja ekki að þessi tími væri til á klukkunni minni. Brottför 6.15 sem var bara fyndið og óraunverulegt en hvað er svo sem eðlilegt á þessum tímum? Það var meira að segja hvít jörð á Skaganum en þannig var það ekki á háttatíma í gær. Valdi skafari var greinilega enn steinsofandi og hálka og ömurð alveg að göngum. Hinum megin var sama sagan ... en klakklaust komumst við yfir "Kjalarnesheiðina" ... enda stórkostlegur bílstjóri undir stýri.

Ég reif upp alla glugga við komu og fjarlæg hringingin sem ómaði í eyrum mínum kveikti ekki á aðvörunarbjöllum í höfði mínu. Þegar ég opnaði þriðja og síðasta gluggann í salnum sá ég öryggisbíl koma brunandi inn á stæðið og þrjá vopnaða og vígalega verði stökkva út, alla vega einn. Tveir slefandi blóðhundar réðust á mig inn um opna gluggana og næstum sleiktu mig til bana eða hefðu gert ef þeir hefðu verið með í för, og mennirnir störðu ásakandi á mig þar sem ég hefði þá mögulega legið hlæjandi á gólfinu. Kannski ekkert sniðugt að vera svona snemma á ferð nema að því leytinu að þarna hittir maður sæta, ókunna menn ... í einkennisbúningi í þokkabót. Í raun ekki hægt að hugsa sér betri byrjun á degi.

Hún Ylfa Ósk Úlfarsdóttir, úlfhundur með meiru og mjög góð vinkona mín, reyndist vera hvolpafull eftir allt saman og nú um helgina fæðast 4-5 hvolpar í Mosfellsbænum. Algjör snilld. Allur harðfiskurinn sem ég hef stolið frá Hrund "samstarfs" og gefið Ylfu hefur ekki verið til einskis. Hún borðaði allan tímann fyrir fimm eða sex, þetta krútt. 

Athugasemdir

[Vera Knútsdóttir, 23.10.2008 kl. 12:08]

Mmmm einkennisklæddir menn í morgunsárið! Frábær byrjun!

[Guðrún Ágústa Einarsdóttir, 23.10.2008 kl. 12:28]

Ekki dónaleg byrjun á svölum degi....

kv Gunna.

[Lára Hanna Einarsdóttir, 23.10.2008 kl. 12:49]

Hvaða aðdráttarafl hafa einkennisbúningar?    Getur einhver útskýrt það fyrir mér?

[Guðríður Hrefna Haraldsdóttir, 23.10.2008 kl. 12:51]

Eiginlega ekkert, kaffigjafmilda skvísa. Ég reyni bara að viðhalda staðalímyndum í skrifum mínum, annað en þú þarna byltingardrottningin þín!!!

[Lára Hanna Einarsdóttir, 23.10.2008 kl. 12:53]

Góð...! 

[Jenný Anna Baldursdóttir, 23.10.2008 kl. 16:06]

Ég held að þú sért svag fyrir júníformum.

[Svala Erlendsdóttir, 23.10.2008 kl. 18:16]

eða kanski ertu bara svag fyrir stórum hundum...

[Helga Magnúsdóttir, 23.10.2008 kl. 18:42]

Einkennisbúningar? Ég verð að játa að ég sá nákvæmlega ekkert sexí við samstarfsmenn mína í löggunni þegar ég var að mæta á morgunvakt klukkan sex. Í besta falli voru þeir fyrir mér.

[Guðríður Hrefna Haraldsdóttir, 23.10.2008 kl. 18:53]

Iss, Helga, þú hefur ekki kunnað gott að meta ...

[Steingrímur Helgason, 23.10.2008 kl. 20:58]

Búníngablæti  betrakyns dugði bezdamann betur ...

[Svava S. Steinars, 23.10.2008 kl. 22:19]

Mmmmm, menn í einkennisbúning.. bjóddu mér með næst þegar þú setur kerfið á stað :D

[Breiðholtshatarinn (IP-tala skráð) 23.10.2008 kl. 23:56]

Manstu fyrstu 7 árin eftir að við kynntumst, þegar ég hélt að þú værir stöðumælavörður, hvernig átti mig að gruna að þú klæddist svona af fúsum og frjálsum vilja!!!!