Grútspældir strætófarþegar í morgun

Ásta kíkti í kaffi áðan og sagði farir sínar ekki sléttar. Hún missti af strætó í bæinn í morgun. Hún hafði ekki hugmynd um að áætlunin hafði breyst og vagninn færi sex mínútum fyrr en áður. Hún fór því á silfurlitu drossíunni. Maður á að hlusta á hugboð ... mér datt í hug í gærkvöldi að senda henni sms og vara hana við þessu, enda búin að lesa vandlega nýju sumaráætlunina. Klukkan var bara orðin svo margt og ég vildi ekki vekja hana.
Fleiri en Ásta misstu af vagninum í morgun og voru grútspældir. Það hefði nú alveg mátt auglýsa þetta eitthvað á Skaganum, t.d. í uppáhaldstímaritinu okkar, Póstinum. Við lifðum í þeirri blekkingu að engin breyting yrði hjá okkur, þar sem hvorki átti að fækka né fjölga ferðum. Gat þó upplýst Ástu um að strætó fer fimm mínútum fyrr frá Mosó, hún hafði ekki hugmynd um það heldur.

Annars var Ásta bara hress, fyrir utan það að ekkert sætt fannst í himnaríki nema ég. Eftir kvartanir hennar fann ég frosnar vöfflur í frystinum og ristaði handa henni. Sulta ofan á og hviss, bang, sykurþörfinni fullnægt. Vona að gullfiskaminnið mitt verði þess ekki valdandi að ég missi af strætó í fyrramálið, strax eftir klippinguna.
 

Mikið væri gaman að vita hvað gula grafan er að bardúsa hér við sandinn. Vona að það rísi ekki háhýsi fyrir framan himnaríki. Kannski er verið að bæta aðstöðu þeirra fjölmörgu sem koma á Langasandinn á sumrin. Bíð spennt.

Hugleiðingar um hárgreiðslufólk og annað gott fólk

Nú hefst vika hins mikla dekurs. Það er margt hægt að gera en ég er frekar andlaus, finnst ég dekra við mig á hverjum degi. Ef þið hafið einhverjar vænar hugmyndir sem innihalda ekki vélsleðaferð á jökli, gönguferðir í fárviðri eða sundferð og heitan pott þá væri vel þegið að fá eitthvað í kommentahornið.

Þetta hefst svo sem ekki nógu vel. Eini lausi tíminn í klippingu strax er klukkan níu í fyrramálið, arggg. Ég ætla að láta mig hafa það í von um smá höfuðnudd ... ummmm. Sumir kalla klippingu dekur, ég lít reyndar meira á það sem skyldu. Fór síðast hjá elskunni honum Skildi Eyfjörð núna fyrir síðustu jól en þá var hárið komið á það stig að vera bara flott ef ég hafði sofnað með það blautt ...

Einu sinni var ég með indæla hárgreiðslukonu ... nema hún talaði mikið um að ég ætti að gera meira fyrir sjálfa mig, elska mig meira og slíkt. Ég skildi aldrei almennilega hvað hún átti við, við þekktumst sama og ekkert. Kannski hefur henni þótt þetta bera vott um umhyggju fyrir kúnnunum ... en svakalega var þetta þreytandi. „Mundu svo að fara vel með þig, þú átt það skilið!“ voru iðulega kveðjuorð hennar. Fallega sagt en samt fannst mér þetta óvirðing og á endanum skipti ég um klippara. Svona misskilningur á hamingjustigi kúnnans er samt bara fyndinn. Kannski hefur þessi elska lesið yfir sig af sjálfsræktarbókum. Mér finnst líka óþægilegt þegar hálfókunnugt fólk gerir sér dælt við mig á þennan hátt, eins og það viti allt um líf mitt og reyni sitt til að stjórna því. Ef hún hefði bara vitað um allar trylltu hamingjustundirnar sem ég átti yfir nýjum spennubókum, ilmandi kaffi og í þægilegum sófa. Um samverustundir með góðu vinunum og margt fleira.

Ég er yfirleitt alltaf í góðu skapi en það er eins og sumir eigi erfitt með að trúa því. Einu sinni hitti ég gamlan vin á djamminu og hann spurði hvernig mér liði. „Bara ljómandi vel,“ svaraði ég. Þá fór hann að skamma mig fyrir að vera svo yfirborðskennd, ég segði alltaf bara allt gott. Ég var voða sár því að mér datt ekki í hug að fara að barma mér við hann yfir blankheitum, ástarsorg eða einhverju slíku sem ég var eflaust þjáð af, ekki svona á djamminu og ekki við hann, við vorum engir trúnaðarvinir. Nógu margir glíma við alvörusorgir og áhyggjur og því finnst mér engin ástæða til að væla yfir smámunum við kunningja.

Anna, guðdómleg vinkona til rúmlega 20 ára, á afmæli í dag.

Til hamingju, elsku krútt. Einnig Árni Magnússon, fv. félagsmálaráðherra, en við unnum saman á Stjörnunni í gamla daga og var hann hinn vænsti maður þótt hann hataði lagið To know him is to love him!

Þið frábæru manneskjur, til hamingju með afmælið!

Tilraunir í himnaríki

Gerði afar metnaðarfulla tilraun í eldhúsinu áðan, enda orðin sársvöng eftir eintóma kaffidrykkju í dag. Efniviðurinn sem ég hafði var: Útrunnar kjúklingabringur, rifinn ostur sem ég gleymdi á borðinu í gær, risastór sæt kartafla, gamalt krydd sem var ferskt í gær, paprikur, laukur, chili, hvítlaukur, svartur pipar, Best á allt og Top Chop, krydd sem Inga ráðlagði mér að kaupa í Einarsbúð á föstudaginn.

Jens Guð skammaði mig fyrir að hafa hent útrunnum kjúklingabringum um daginn þannig að ég ákvað að taka sénsinn. Ég verð þá bara veik og þið drepið Jens fyrir mig.

Ég kryddaði kjúklinginn með Top Chop og grillaði á svona mínútugrilli. Sauð þá risastóru og sætu í potti og bjó til kartöflumús, kryddaði hana með Best á allt frá Pottagöldrum og skellti rifna ostinum út í, það var ... athyglisvert. Kom önnur áferð á músina. Steikti síðan paprikur, lauk, hvítlauk og chilipipar (með nokkrum fræjum). Þetta var skrambi gott, svona miðað við að ég er betri í tertunum.

Fordómar og sálarflækjur

Kræst, Oprah Winfrey var að tala illa um offitu og reykingar, hefur hún ekkert skemmtilegra að gera? Gefa bíla eða eitthvað? Ég gleypi ekki alveg við þessum rökum að offita sé eingöngu af andlegum orsökum þótt það hafi átt við hjá Opruh sem var misnotuð sem barn. Það vill gleymast að sumum finnst matur einfaldlega góður.

Reynt er að fá hamingjusamar feitabollur, ánægar með sjálfar sig, til að falla saman og skæla í svona sjónvarpsþáttum og finna einhverja ástæðu fyrir fitunni, hún hlýtur að liggja djúpt niðri þarna. „Nei, þú getur ekki verið hamingjusöm þótt allt gangi svona vel í lífi þínu, þú ert nefnilega feit!“

Ég hef á lífsleiðinni hitt svona „djúpt“ fólk, sjálfskipaða sálfræðinga, sem eru að springa úr klisjum. „Hvernig líður þér? Nei, ég meina hvernig líður þér í alvörunni?“ „Þér hlýtur að líða illa, ég finn það.“

Góður vinur minn sagði vinkonu sinni upp vinskap af því að hún reyndi sífellt að stjórna tilfinningum hans á þennan hátt. Það tók hann nokkur ár að átta sig á því að honum leið alltaf illa nálægt henni. Hann reyndi sífellt að finna djúpar orsakir fyrir öllu en gekk ekkert of vel, líf hans var gott. Hann hlær að þessu í dag, er mjög hamingjusamur ... enda grannur.

Sjokkerandi ...

Dear Gurri,
Thank you for your interest in the test at www.IQTest.com.
Your general IQ score is: 87

AFSÖKUN: Ef enska er ekki móðurmál þitt gætir þú fengið lægra skor, sá ég áður en ég datt ofan í prófið.  

Tók reyndar annað greindarpróf á ensku einu sinni og fékk um 160. Þar var mikil stærðfræði og prófið tók 45 mínútur. Góð kunnátta í ensku skipti ekki jafnmiklu máli. En ... só vott!!!

Getur verið að það að sitja heima í sumarfríi, lesa, horfa á sjónvarp, taka á móti gestum og fara í bað hafi svona forheimskandi áhrif? Ég sem kíkti í heimsókn í vinnuna á föstudaginn.

Prófið endilega að taka þetta próf. Það má monta sig í kommentakerfinu, þarna gáfnaljósin ykkar.

Gráðugur banki og góð gestakoma

Hringdi í þjónustuver bankans míns um daginn til að spyrja hvað væri til ráða ef ég væri búin að gleyma leyniorðinu í Netbankann. Konan spurði mig lymskulega um reikningsnúmer og sagðist síðan ekki geta hjálpað mér, heldur átti ég að fara í útibúið á Akranesi og fá þar nýtt leyniorð. Mundi svo leynóið ... Þegar ég kíkti í Netbankann minn áðan sá ég að fyrir þetta símtal og ekkihjálp þurfti ég að greiða 65 krónur sem dragast af reikningum mínum. Ekki mikill peningur kannski en frekar ósiðlegt af svona forríku fyrirtæki að rukka mann aukalega fyrir lásí símtal. Ekki gefa upp bankanúmerið ykkar eða kennitölu nema þið vitið að þið fáið einhverja aðstoð, bara upp á prinsippið.

 Hilda systir og Lóa, vinkona okkar, komu í aldeilis dásamlega heimsókn í kvöld. Þær byrjuðu reyndar á því að fara í 40 mínútna gönguferð meðfram Langasandinum. Náði mynd af þeim þar sem þær hófu gönguna, ómeðvitaðar um leynilega myndatöku út um glugga himnaríkis.

Á meðan þær nutu ferska loftsins og hreyfingarinnar var ég í óðaönn að útbúa gúmmulaði fyrir þær. Bjó til samloku úr tortillum, smurði með sterkri Taco-sósu, setti líka rifinn ost og rjómaostsslettur á milli og steikti beggja megin á pönnu, skar svo niður í fjóra bita.

Þær emjuðu af sælu yfir þessu þegar þær komu móðar og másandi úr gönguferðinni. Það sem fólk leggur á sig fyrir hreyfingu og hreint loft. Ég fékk heilmikla hreyfingu líka og var með alla glugga galopna, sé lítinn mun á þessu. Heimsóknin var mjög notaleg og skemmtileg.

Tók mynd af þeim stöllum í sófanum í bókaherberginu þar sem þær lágu í bókmenntum. Þær þóttust eitthvað vera of þreytulegar og sjúskaðar fyrir myndatöku en ég hlustaði ekki á slíkt bull.  

11 ástæður fyrir því hvers vegna konur yfir fertugt eru bestar

Andy Rooney í 60 mínútum kom með þessar dásamlegu staðreyndir í þættinum fyrir nokkrum árum. Snilld.

 -   -   -   -   -   -   -   -   -   -   -   -   -   -   -   -   -   -   -   -   -   -   -   -   -

1. Kona yfir fertugt myndi aldrei snúa sér að manninum í rúminu og segja: „Hvað ertu að hugsa?“ Henni er nákvæmlega sama hvað hann er að hugsa.

2. Ef konu yfir fertugt langar ekki til að horfa á leikinn þá hlammar hún sér ekki í sófann og vælir um það. Hún einfaldlega finnur sér eitthvað annað að gera og yfirleitt er það eitthvað mun áhugaverðara. 

3. Kona yfir fertugt hefur gengið í gegnum næga sjálfsskoðun til að vita með vissu hver hún er, hvað hún er, hvað hún vill og þá frá hverjum. Langflestar konur komnar yfir fertugt láta sér í léttu rúmi liggja hvað þér finnst um hana eða það sem hún er að gera.

4. Konur yfir fertugt eru virðulegar í fasi. Það heyrir til undantekninga að þær æpi á manninn sinn í leikhúsinu eða á betri veitingastöðum. Á hinn bóginn, ef þú hefur unnið þér inn fyrir því, hika þær ekki við að skjóta þig á færi ef þær eru þess fullvissar að þær komist upp með það.

5. Konur yfir fertugt spara ekki gullhamrana, jafnvel á þá sem eiga það ekki skilið, því að þær vita hvað það er að vera vanmetinn.

6. Kona yfir fertugt hefur öðlast nægt sjálfsöryggi til að kynna manninn sinn fyrir vinkonum sínum. Yngri konur fela oft vinkonur sínar fyrir manninum vegna vantrausts á honum.  

7. Konu yfir fertugt gæti ekki verið meira sama þótt maðurinn sé hrifin af vinkonum hennar því hún veit að þær munu ekki svíkja hana.

8. Konur öðlast sjötta skilningarvitið með aldrinum. Menn þurfa aldrei að segja konum yfir fertugt syndir sínar. Þær vita!

9. Það klæðir konu yfir fertugt að nota æpandi, rauðan varalit, sama á ekki við um yngri konur og dragdrottningar.

10. Um leið og karlmaður getur litið fram hjá hrukku eða tveim gerir hann sér grein fyrir því að kona yfir fertugt er allverulega mikið kynþokkafyllri en yngri módelin.

11. Eldri konur eru hreinskilnari og heiðarlegri í framkomu en þær yngri. Þær láta þig strax vita ef þú ert fífl eða ert bara að láta eins og fífl. Þú þarft aldrei að vera óviss um hvar þú stendur gagnvart konu yfir fertugt.

Þær eru ótal ástæðurnar fyrir því að dást að konum yfir fertugt. Því miður er ekki hægt að segja það sama um karla á sama aldri. Fyrir hverja sláandi fallega glæsidrós yfir fertugt er sköllóttur, illa tilhafður, krumpaður karl að gera sig að fífli með einhverri 18 ára afgreiðslustelpu. 

Fyrir alla menn sem segja: „Hvers vegna að kaupa mjólkursamlagið þegar mann vantar slettu mjólk?“ er hér fréttatilkynning: Í dag segja 80% kvenna að þær séu ekkert á þeim buxunum að fara að gifta sig. Hvers vegna, gætu þeir spurt. Þær hafa komist að því að það er til auðveldari leið til að næla sér í pylsu en að fjárfesta í heilu sláturhúsi. 

Setti með myndir af skvísum sem eru að verða fimmtugar. 

Davíð og Golíat í sumarbúðum

Stórsnjallt ungmennakort er að detta inn í Reykjavík. Með því eru m.a. sumarbúðir niðurgreiddar. Heyrði Björn Inga tala um þetta í útvarpinu og fannst skrýtið að hann minntist bara á skátana og KFUM en ekki Ævintýralandið hennar Hildu systur sem þó er án efa með metnaðarfyllstu starfsemina, ég fer aldrei ofan af því. Í hittiðfyrra komu nokkrir ljúfir starfsmenn úr Vatnaskógi í heimsókn og þeir urðu stórhrifnir, eiginlega göptu ... Yfir 100 börn á staðnum en samt allt svo notalegt, allir höfðu nóg við að vera og góð stjórn á öllu.

 

Á forsíðu DV í gær sagði Hafsteinn Snæland, framkvæmdastjóri Samfés, að allir styrkir til barna- og unglingastarfsemi færu til sömu samtakanna og fulltrúar þessarra samtaka sitji í úthlutunarnefndinni!

 
Nú gengur mér betur að skilja allar þessar neitanir sem Ævintýraland hefur fengið. Auðvitað sjá þeir til þess að samkeppnisaðili fái ekki krónu. Þetta er nú meiri spillingin, ef rétt er. Ég er öskureið.

 

 -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -   -

Hilda hefur árangurslaust sótt um styrki í gegnum árin, enda þarf hún að greiða himinháa húsaleigu á meðan hin samtökin hafa komið sér upp góðum húsakosti með milljónastyrkjum.
Við komumst að því eitt árið að á meðan Hilda fékk ekki krónu þá fengu skátarnir og KFUM eitthvað í kringum 5-6 milljónir hvor aðili, m.a. til að greiða fasteignagjöld af húseignum sínum. Þetta hafði viðgengist í fjölda ára, til eru opinber gögn um það, en ég veit ekki hvernig þessu er háttað núna.

Samkeppnisaðilar Hildu reka eflaust ágæta starfsemi, ég efast ekki um það. Samt kostar nógu mikið að senda börnin sín þangað og ekki getur Hilda látið kosta meira en hinir vegna samkeppninnar.  

Munurinn á Ævintýralandi og öðrum sumarbúðum er t.d. sá að Hilda fylgir algjörlega reglugerð Barnaverndarstofu og er með fullorðið fólk í vinnu og eina manneskju á hver fimm börn. Ætli meðalaldur starfsmanna sé ekki 35 ára. Hún þarf að borga góð laun til að fá hæft fólk og vill ekki sjálfboðaliða, segir starfsemina of viðkvæma til þess. Það gæti þó hafa hrist upp í ónefndum sumarbúðum þegar leiðindamál komu upp fyrir nokkrum árum vegna sjálfboðaliða. 

 

Síðustu sumur hafa um 100 börn dvalið í hverri viku í Ævintýralandi. Vinsældirnar eru ekki vegna þess að hún hefur efni á því að auglýsa svo mikið, heldur er það góður orðstír sem veldur. Kostnaður við sumarbúðirnar er geðbilaður, það þarf að greiða húsaleigu, laun, mat, fá fólk á launum til að koma og ræða forvarnir og margt, margt fleira. Vá, hvað það myndi breyta miklu og vera upplyfting fyrir starfsemina ef fengist styrkur. Ég hvet bloggvini mína til að velja Ævintýraland ef þeir ætla að senda börnin sín í sumarbúðir í sumar og styrkja þannig Davíð gegn Golíat.