Strætóblogg dauðans!

Hann var vonsvikinn hópurinn sem sat í hægfara strætó sem kom rúllandi eftir Garðabrautinni í morgun. Við grétum innra með okkur þegar við sáum bílinn, troðfullan af fólki. Ásta sat beisk við hlið ungs manns og ég náði rétt svo sæti fyrir aftan hana og lenti við hlið fjallsins Herðabreiðar. Of kors!!!

Nú, djákninn og þroskaþjálfinn voru við sama heygarðshornið og áður, þessar elskur, og búin að stela sætunum okkar Ástu. Maður hefði haldið að djákni vissi þetta með Þú skalt ekki stela-dæmið þarna!Svo blés köldu lofti á okkur alla leiðina, eins gott að ég var með þrjá trefla.Sessunautur minn, sem var farinn að hnerra, vildi meina að ekki væri lokað fyrir loft-eitthvað en mig grunar að það hafi bara átt að kæla okkur niður!  Já, ég blaðra svo mikið að ég gleymdi að segja að hraðferðin fór ekki í morgun. Ekki voru nógu margir komnir að Skrúðgarðinum kl. 6.47 til að geðvonda bílstjóranum þætti réttlætanlegt að hreyfa vagninn ... eða voru kannski enn laus bílastæði á Kirkjubrautinni (fyrir þá farþega sem komu á bílum sínum)?

Þegar við beygðum inn á Kjalarnesið brunaði svo hraðferðin fram úr okkur á leið í bæinn, galtóm!!!! Og allt á kostnað Akraneskaupstaðar. Við gátum varla hlegið fyrir illsku.

Er ekki bara mál að finna nýtt starf fyrir geðvonda bílstjórann? Það getur ekki verið skemmtilegt að vera strætóbílstjóri og vera svona herfilega illa við farþega!

Þessi elska sem keyrði hægfara vagninn í morgun heldur örugglega að Skagamenn séu fúlir og leiðinlegir upp til hópa. Það var hreint út sagt þykkt andrúmsloftið af geðillsku fram að Hvalfjarðargöngum.

Verkefnið Hraðferð-betri þjónusta virðist vera að klikka á aðeins tveimur dögum ... nema þetta séu bara byrjunarörðugleikar.  

 

Ég rétt náði leið 18 þegar ég var komin inn í borg ekki lengur óttans, heldur svifryksmengunar. Bílstjórinn þar horfði á mig með fyrirlitningu og tók ekki undir kveðju mína ... fleiri geðvondir en Skagamenn ...  

Og ég mætti fyrst allra í vinnuna núna rétt fyrir átta. Mikið skal ég montrassgatast við Gullu prófarkalesara þegar hún kemur. Þetta verður góður dagur. Þrátt fyrir smá hóst hóst í strætó finn ég góðu heilsuna vera að taka yfir.

Athugasemdir

[ekkert (IP-tala skráð) 26.2.2007 kl. 10:10]

Þú ættir kanski að fara að átta þig á að það er ekkert til sem heitir hraðferð, þessi ferð er eingöngu til að taka umframfjölda til að ekki þurfi fólk að standa og á ekkert að vera neitt fyrr kominn til Rvk.

[Systir þess brosmilda (IP-tala skráð) 26.2.2007 kl. 10:31]

HAHAH ég held að einhver geðvondur sé farinn að lesa bloggið þitt miðað við færsluna fyrir ofan. Frábærar lýsingar á strætóferðunum. Láttu þá bara heyra það !Fylgist spennt með.

[Guðríður Haraldsdóttir, 26.2.2007 kl. 10:31]

Fara að átta mig á ...???  

Þessi ferð gengur undir nafninu hraðferð hjá strætófarþegum þar sem hún stoppar hvergi á leiðinni. Ég var minnst fúl í morgun af þessu liði, enda ætlaði ég ekki að taka hraðferðina. Vagninn var bara stappfullur af fólki sem hafði ætlað að taka UMFRAMVAGNINN!!!

[Guðríður Haraldsdóttir, 26.2.2007 kl. 10:32]

Ó brosmilda systa, ég var að svara kommenti 1.

[gua, 26.2.2007 kl. 11:05]

giska á að þessi geðvondi sem skrifar færslu 1 sé 10 ára miðað við orðaforða 

[Katrín Snæhólm Baldursdóttir, 26.2.2007 kl. 11:15]

Hvað getur verið svona stjarnfræðilega flókið við að láta einn strætó virka fyrir fólkið? Heldurðu að kaupstaðurinn vilji kannski ráða snjalla mig til að aðstoða við svona verkefni. Ég er svo flink að fá góðar hugmyndir og hjálpa fólki að brosa. Gæti meira að segja hugsað mér að keyra bara strætóinn ef það myndi hjálpa. Æðislegt að góða heilsan sé loksins að rata heim. Knúsaðu hana frá mér. Hun er svona dæmi sem mðaur getur sagt enginn veit hvað átt hefur fyrr en mistt hefur. Svo dýrmæt. Og þess vegna er líka skandall að frysta fólk á hægferð.

[Guðríður Haraldsdóttir, 26.2.2007 kl. 12:43]

Aha, gott að vita þetta! Takkkk!

[Guðný Anna Arnþórsdóttir, 26.2.2007 kl. 22:23]

Já, bloggarar stöndum saman, - um leið og einhver geðvondur laumar sér nafnlaus inn, þá bara smöllum við hann! Þið strætónótendur eigið alla mína samhygð og ég óska ykkur framförum (í strætókerfismálum) og geðheilsu (ykkar eigin). Veit reyndar að sem betur virðist hún í einkar góðu lagi hjá ykkur Sakgamönnum..

[Guðríður Haraldsdóttir, 26.2.2007 kl. 22:53]

Við vorum nú soldið geðvond í morgun en það rjátlaðist af okkur ... svo var líka gott að fá það rétta fram. Allir héldu að þetta yrði dýrindis hraðferð en það voru bara draumórar ... eða rangar upplýsingar! Ekkert skrýtið þótt við yrðum fúl!