Brosandi bæjarstjóri og skortur á pervisnum mönnum

Ætlaði að verja deginum í sjálfsvorkunn yfir hósta, hálsbólgu og svona en á Skaganum er það ekki hægt. Eilífar símhringingar og brjálaðar vinsældir ... ja, ég fékk alla vega eitt símtal sem leiddi mig í kaffi í Skrúðgarðinn. Og þar var annar dularfullur fundur í gangi. Um daginn var það Frjálslyndi flokkurinn í óreykmettuðu óbakherbergi ... núna í dag var það bæjarstjórnin!!! Og bæjarstjórinn, þessi dúlla, brosti til mín! Nú fær hann atkvæði mitt hvenær sem er!

Þarna hefði ég vissulega átt að notfæra mér þetta og fara að spjalla við bæjó um strætóhraðferðina sem þýtur út úr bænum undir sjö á morgnana og tekur ekki upp farþega leiðinni, bara þá sem búa rétt hjá Skrúðgarðinum eða sem eiga bíl og aka þangað. Hálftómur ekur hann í loftinu eins og fjandinn sé á eftir honum og skilur okkur alvörufarþegana eftir með sárt ennið.
EN ... þakklæti mitt fyrir að fá stoppistöð fyrir framan himnaríki er svo mikið að ég nenni ekki fárast lengur yfir svona smáatriðum, synd þó að missa af Ástu sem hlýjum sessunaut en Ásta býr rétt hjá Skrúðgarðinum.

Verst er ef maður fær núna einhvern herðabreiðan og karlmannlegan gaur við hliðina á sér og herðar hans þrýsta manni að ganginum milli sætaraðanna. Pervisnir menn eru bestir sem sessunautar en þeir fyrirfinnast ekki á Skipaskaga. Eftir uppeldið í ÍA, hlaupin á Langasandinum og annað eru þetta flottustu menn landsins þótt víðar væri leitað.

Fréttir eru að hefjast á Stöð 2, ég fór fram í stofu til að skipta um stöð, var með seinkaða dagskrá í gangi. Tommi vaknaði og fattaði að ég væri komin heim úr kaffihúsinu og hljóp mjálmandi á eftir mér inn í bókaherbergi aftur. Hver þarf eiginmann til að eltast við sig ef maður á svona kött?  

Athugasemdir

[Svava S. Steinars, 25.2.2007 kl. 18:49]

Hvaða hvaða, þú biður bara herðubreiðu mennina að taka utan um þig svo þú hafir það gott við hliðina á þeim.  Eitt leiðir svo að öðru og áður en þú veist af ertu komin í bullandi ástarsamband.  Færð ekkert út úr einhverjum pervisnum væskli !

[Saumakonan, 25.2.2007 kl. 20:17]

hmm.. það er nú stundum gott að hafa einhvern hlýjan að halla sér að í köldum strætóvagni á morgnana

[Sigríður Jósefsdóttir, 25.2.2007 kl. 20:47]

Hmm, er ástæða fyrir því að fara að hafa áhyggjur af öllum þessum kaffihúsaferðum, er kannski einhver huggulegur fastagestur þar?  Held samt að Gísli bæjarstjóri, frændi minn (fjórmenningar út frá Einari Hálfdánarsyni á Hvítanesi við Djúp) sé harðgiftur maður.  Kveðjur,

[Guðríður Haraldsdóttir, 25.2.2007 kl. 20:51]

Sko frú Grafarþögn ... maðurinn, bæjarstjórinn, frændi þinn, brosti og fær atkvæði mitt hvenær sem er, ekki ástir mínar!

Og nei, það eru engir huggulegir fastagestir þarna, held ég. En það breytist þegar fréttist af öllum þessum sætu stelpum sem hanga þarna.  

[Guðný Anna Arnþórsdóttir, 25.2.2007 kl. 21:59]

 

[Ólafur fannberg, 25.2.2007 kl. 22:05]

[www.zordis.com, 25.2.2007 kl. 23:23]

Hlýr faðmur og ólgandi ástleitið hjarta leynast víða.  Visinn eða hokinn ...... who cares ef hann er vellauðugur, andlegur sjarmur!  Syngja bara í strætó, "i´ll close my eyes while you kiss me" la la la .........  

[Guðríður Haraldsdóttir, 25.2.2007 kl. 23:24]

Vá hvað verður gaman í strætó á morgun. Ég ætla ekki að vera ástleitin ... ég ætla að vera ástREITIN! Múahahhahaha. Sjá skýrslu á morgun.