Hvernig tískan verður til

Nú veit ég að sjúkraþjálfarar eiga mikinn þátt í því að skapa hártískuna. Ég lá á bekknum hjá Betu í morgun með blautt hárið og alls kyns liðir og lokkar urðu til. Þegar ég kom fram tóku allir andköf af aðdáun, sumir hrópuðu upp yfir sig. Það lá síðan við umferðaröngþveiti þegar út var komið. Til að forða mér út úr kastljósinu (já, hógvær Ljón eru til) hoppaði ég upp í innanbæjarstrætó og slapp þannig. Sem betur fer var bílstjórinn með augun á umferðinni og þess vegna komst ég klakklaust heim. Ég veit ekki alveg hversu smart þetta er, miðað við eigin tískuvitund, en þetta vakti alla vega brjálaða aðdáun á Skaganum. Mikið verður gaman að fara í strætó í fyrramálið og sjá tískuóða Skagamenn sem hafa sofnað viljandi með blautt hárið.

Mig grunar að leiðin til að næla sér í sjúkraþjálfara sé einmitt sú að vera með krumpað hár, alveg eins og tannlæknar slefa yfir mér þegar ég fylli munninn af bómull og þingmenn missa sig þegar ég sletti frumvörpum eða reglugerðum. Verndun svæðislýsinga smárása í hálfleiðurum nota ég þó alltaf spari á þá síðastnefndu.

Athugasemdir

[Jenný Anna Baldursdóttir, 21.8.2007 kl. 13:11]

Hahahahahaha

[Gúrúinn, 21.8.2007 kl. 13:55]

Ert þú á myndinni?

[Ingibjörg Gunnarsdóttir, 21.8.2007 kl. 15:14]

Hef lent í þessu með hárgreiðsluna - í minni fjölskyldu er þessi greiðsla kölluð: Presley lifir!

[Kristín Katla Árnadóttir, 21.8.2007 kl. 15:23]

HaHaHa  úff Gurrí.

[gua, 21.8.2007 kl. 15:35]

Gurrí trendsetter hahahahaha góð

[Guðrún Jóhannesdóttir, 21.8.2007 kl. 15:44]

eftir að hafa lesið þessa færslu og skoðað myndina hef ég ákveðið að vera ekkert að breyta til  :)

[Rebbý, 21.8.2007 kl. 15:53]

elska svona trendsettara .... farðu í andlitsbað á snyrtistofu .... talandi um flotta toppa og geggjaða vængi í hárið

[mongoqueen, 21.8.2007 kl. 16:58]

hahaha 

Svona kem ég alltaf út frá tannsa, ég er alltaf svo yfir mig stressuð að ég iða öll í stólnum.....og út kemur þessi flotta greiðsla

[krossgata, 21.8.2007 kl. 17:03]

Hiti og rakt loft og greiðslan er komin, ekkert mál. 

[www.zordis.com, 21.8.2007 kl. 17:49]

Tískulöggan hefur ekkert í mig eftir nuddarann minn því þá er hárið á mér ca. svona og svefndrukkið andlitið eftir dásamlegt nuddið!  Hot dæmi!

[Rannveig Lena Gísladóttir, 21.8.2007 kl. 19:59]

Ég er nú svo "lánsöm" að þurfa ekki á hárgreiðslumanni að halda til að fá svona "fína" greiðslu... bara að sofna með blautt hárið og málið er dautt!

[Þröstur Unnar, 21.8.2007 kl. 20:08]

Verndun svæðislýsinga smárása í hálfleiðurum......

Snilld. Má ég fá þetta lánað til að nota á Orkuveituna eftir rafmagnsleysið? Þá er viss um að þeir bjóða mér háa bótafjárhæð án nokkurra spurninga.

[Jóna Á. Gísladóttir, 21.8.2007 kl. 21:01]

Verndun svæðislýsinga smárása í hálfleiðurum

ég les þessa setningu aftur og aftur og aftur og ég skil hana ekki. What does that make me?

[Guðríður Hrefna Haraldsdóttir, 21.8.2007 kl. 21:23]

Þetta VERNDUN SVÆÐISLÝSINGA ... er reglugerð eða frumvarp eða eitthvað svoleiðis, tengist Evrópusambandinu auðvitað, og var í alvörunni!!! Ég tók einu sinni viðtal við elskuna hann Pál Pétursson, sem þá var félagsmálaráðherra. Spurði hann hvort þetta væri ekki örugglega rétt nafn á þessu. Hann fór að hlæja og sagði það svo sannarlega vera. Held að það væri virkilega "gaman" að rúlla í gegnum allar reglugerðir Evrópusambandsins, þær hljóta að vera svona mikil snilld, milljónum saman. Hehehehehe. Jóna, ég skil hana ekki almennilega sjálf, en Páll sagði þetta mjög lógískt!

[Edda Agnarsdóttir, 21.8.2007 kl. 21:40]

Ég hef prófað þetta og hárið var alveg eins og á manninum með gleraugun!

[Svava S. Steinars, 21.8.2007 kl. 21:41]

Uppáhaldið mitt persónulega er reglugerð um varnir gegn mengun vatns af völdum köfnunarefnissambanda frá landbúnaði og öðrum atvinnurekstri.  Hárið á fólki verður eins og á myndinni þinni þegar ég er búin með nafnið.

[Guðný Anna Arnþórsdóttir, 21.8.2007 kl. 22:20]

Mig hefur lengi grunað að þú værir trendsetter, enda ljón.... Sjúkraþjálfarar komast ekki með táslurnar þar sem þú hefur hælana...nema kannski stöku ljón. Varstu að tala um hógvær ljón, hvaðan hafðirðu það, cara bella?

[Anna Ólafsdóttir Björnsson, 21.8.2007 kl. 22:23]

Við með slétta hárið beitum ýmsum brögðum til að það sjáist ekki að hárið er nánast eins og spreyjað á hauskúpuna, m.a. lagði ég það á mig á tímabili að plása hárið ,,á hvolfi" (frjáls aðferð). Einnig að leggja hárið upp í loft á koddann, blautt, áður en ég fór að sofa. Mæli með hvorugu. En svo fattaði ég að það var ekki eins þungt og lá ekki eins rennislétt ef það var stytt um metra, svo það hjálpar, fyrir þá sem þannig stendur á fyrir. Bara smá ábending - og svo er Vernd svæðislýsinga smárása í hálfleiðurum alltaf góð til að ýfa hárið.

[Jens Guð, 21.8.2007 kl. 23:02]

  Skemmtilegt að skella myndinni af Phil Spector - þegar hann mætti fyrst í réttarhöldin vegna morðsins - inn á myndina af Jesú-parinu!