Kúlurass af völdum Strætó

Að ferðast með strætó er góð skemmtun. Að ferðast með mörgum strætisvögnum sama morguninn er bara stórkostlegt. Það rigndi mikið á Akranesi en steypta skýlið við stoppistöðina á Garðabraut er ónothæft því að skemmtanaglaðir utanbæjarmenn nota það til að kasta af sér vatni um helgar og hafa víst gert í fjöldamörg ár. Því var hárið blautt, krullað og krúsílegt þegar stigið var upp í 7.41 vagninn í morgun. Ég bauð bílstjóranum gott kvöld, þar sem ég var klukkutíma seinna á ferð en vanalega en það var viljandi. Það tók þennan klukkutíma að hrekja óvænt hausverkjarkvikindi á brott. Held svo að Jónatan Bíbí hafi elt mig út á stoppistöð, alla vega heyrðust undurþýð hljóð frá mávi sem settist á ljósastaurinn við stoppistöðina.

Við farþegar í leið 15 lentum í umferðarsultu á leið inn í höfuðborgina og það var voða spennandi, allt gengur vanalega svo snurðulaust fyrir sig og það verður leiðigjarnt. Blá lögguljós í göngunum "voru alveg að gera sig" líka og virkilega æsandi að velta fyrir sér hvernig fólk löggan greip þar og fyrir hvaða glæpi. Ákvað að fara út hjá Ártúni og rifja upp kynnin af milljóntröppunum, undir brúnni og lúmsku brekkunni og taka 18 í vinnuna. Ekki séns að ég nennti labba frá Vesturlandsveginum núna, ég var nógu blaut fyrir. Leið 18 er hætt að ganga Stórhöfðann, við heilmikla sorg mína og annarra, heldur gengur upp í Árbæinn áður en hann fer hjá Lynghálsinum. Fullt af vögnum fer í Árbæinn, alla vega leið 5, og því óskiljanlegt að láta okkur afplána þennan rúnt, samt næs fyrir Árbæinga að fá loksins góða þjónustu. Ég velti því fyrir mér í morgun hvort það gæti verið að erfiðleikar mínir við að fá strætófar alla leið í vinnuna tengdust því að Strætó bs vildi að ég hefði flottan kúlurass af brekkugöngu á morgnana? Neeee, hugsaði ég, þeir vita af Nóa Síríus á leiðinni og hættunum þar, nema þeir séu að stjórna því að ég fái kúlurass og reyni á sjálfsstjórnina í leiðinni. Allir velkomnir með mér á þetta frábæra námskeið hjá strætó. Gangan upp Súkkulaðibrekkuna hefst stundvíslega kl. 7.25 á morgnana.  

 

Michael Jackson, if you are reading this, Happy Birthday, karlinn.

Já, MJ er 49 ára í dag, einhverjum dögum yngri en við Madonna!

Svo á Borghildur Anna myndlistarmaður afmæli í dag og líka hún Herdís Hallvarðsdóttir sem var í Grýlunum.

Til hamingju líka, stelpur mínar!

Athugasemdir

[Fjóla Æ., 29.8.2007 kl. 11:20]

Ég er viss um að kúlurassar hafi verið einn af liðum stjórnarfundar Strætó þegar ákveðið var að breyta leið 18. Las það örugglega  á mbl eða The Sun eða einhvers staðar

[Guðríður Haraldsdóttir, 29.8.2007 kl. 11:46]

Við Sigþóra og hellingur af Pólverjum verðum sem sagt rosaflott!

[Jenný Anna Baldursdóttir, 29.8.2007 kl. 12:27]

Vóó þú verður að passa þig að verða ekki of mikið babe, með krullað og krúsílegt og kúlurass.  The three kkk.

[Fjóla Æ., 29.8.2007 kl. 12:33]

Já ekki spurning um að þið Sigþóra og hellingurinn af Pólverjunum verðið miklu mun flottari en áður.

Er þetta ekki annars fullkomin leið fyrir konur til að komast í kjólinn fyrir jólin og fyrir karla að sjá tólin fyrir jólin?

[Ásdís Sigurðardóttir, 29.8.2007 kl. 14:10]

Kúlurass, ekki slæmt, kannski þú farir þá að fá fleiri tilboð um einka akstur, en vertu þá í leggings, þá sést hann betur úr fjarlægð. Það verður greinilega margt merkilegt fólk 50 ára á næsta ári.  Blautar strætókveðjur til þín og segðu hæ við Jónatan frá mér

[krossgata, 29.8.2007 kl. 15:11]

Fallegt af Jónatan að fylgja þér á leið.  Ætli hann hafi ekki veifað hægri vængnum virðulega þegar strætó lagði í hann með þig innanborðs.

[Hrefna S. Reynisdóttir (IP-tala skráð) 29.8.2007 kl. 16:36]

Vil nú ekki vera gagnrýnin og leiðinleg eftir svona gefandi dag, en hvar í andsk.. er updeitið frá Sköllóttum og fallegum? Ég treysti alveg á þig!

[Bragi Einarsson, 29.8.2007 kl. 16:55]

Blautar kúlurassa- og mávakveðjur

[Magnús Geir Guðmundsson, 29.8.2007 kl. 18:04]

Þú særir blygðunarkennd mína með þessu bossatali fröken Guðríður, auk þess sem þú hefur gullfallegar kúlur á öðrum stöðum...

...hnjánum auðvitað!

En svo gleymdurðu alveg aðalafmælisbarninu, langflottustu gellunni að auki,

AKUREYRi!

145 ára í dag!

[Jóna Á. Gísladóttir, 29.8.2007 kl. 18:18]

Veit ekki alveg með Jónatan.... er þetta kannski bara stalker? Passaðu þig á honum Gurrí. Oft leynist flagð undir fögru skinni

[Guðríður Haraldsdóttir, 29.8.2007 kl. 18:51]

Ég verð mjög varkár, Jóna!

Guðmundur, spælandi ... ég sat heima og vann í gær og hefði alveg þegið að standa upp og gefa ykkur kaffi. Vinn yfirleitt heima á þriðjudögum.

Skal reyna, Magnús minn, að særa blygðunarkennd þína ekki oftar. Þetta er allt Ellýju að kenna. Maður smitast af fyrirsögnunum hennar ... og Jennýjar! Djisús!

Uppdeitið af boldinu ER AÐ KOMA ... 

[www.zordis.com, 29.8.2007 kl. 19:30]

Jónatan elskar þig ...

Ég óska mömmu til hamingju með ammlið líka

[Rebbý, 29.8.2007 kl. 20:03]

flegni bolurinn frá múttu og leggins utan yfir kúlurassinn og mennirnir í singlesklúbbnum á Skaganum missa sig af spennu 

[Anna Ólafsdóttir (anno) (IP-tala skráð) 29.8.2007 kl. 20:04]

Ég var svo græn að ég vissi ekki hvernig kona ber sig að við að fá kúlurass ... má ekki vera að því að kommenta meira, er að fara að búa til æfingabrekku ...

[Þröstur Unnar, 29.8.2007 kl. 20:10]

Já Anna K. Þarna komstu með það. Er hægt að fá ykkur Gurrí til að ræða við Gísla bæjó um þetta mál, þetta yrði samþykkt á stundinni.