Vandræðalegar uppákomur, pínkubold og góð súpa

27.9.2007 | 12:28

Vandræðalegar uppákomur, pínkubold og góð súpa

Ylfa Mist skrifaði svo hryllilega fyndið komment hérna nýlega og sagði frá mjög persónulegu SMS-i sem hún sendi á rangt gemsanúmer ... fékk til baka fjandsamlegt svar þar sem hvorugt hjónanna í þessu númeri sagðist kannast við að þekkja hana ... arggggg! Ég hafði skömmu áður kommentað hjá Ólínu Þorvarðar sem bloggaði um það þegar einhver braust inn í gemsann hennar og sendi ótal skilaboð til hinna ýmsu ... Í fréttum komu síðan leiðbeiningar um það hvernig ætti að gera þetta og nú er ég hrædd. Sérstaklega eftir þetta sem kom fyrir mig og sagði frá hjá Ólínu ...þegar tölvan mín hóf að senda ókunnugum manni klámmyndir frá mér og ég vissi ekkert fyrr en hann baðst vægðar ... en ég var alsaklaus af þessu. Vírusar gengu mikið á þessum tíma, meira að segja í vinnutölvum. Óttast mest að vera klámdrottning í huga þeirra sem fengu kannski svona glaðning frá „mér“ og héldu að ég væri í alvörunni að senda dónapóst.
Æ, höfum við ekki öll lent í einhverju svona hræðilega vandræðalegu?

Súpan hennar Maríu í Skrúðgarðinum er einstaklega góð í dag. Bragðmikil og hlýjaði um hjartarætur sem veitir ekki af í þessu slagviðri. Ágætis bragðauki var svo að fá elskuna hann Tomma á staðinn þótt hann skammaði mig fyrir svik við Strætó bs, að hanga svona í einkabílum, eins og einhver prinsessa. Hélt hann vissi af bláa drossíublóðinu sem rennur um æðar mér ...

Þegar ég vaknaði í morgun var boldið byrjað og rekkjusnakk stóð yfir, ég bjóst við einhverju krassandi en þá voru það bara Nick og Bridget að væmnast eitthvað. Í gær voru jólin hjá Forrester-fjölskyldunni og sonur Nicks og Feliciu (dauðvona dóttur Erics og Stefaníu) var skírður, eða það stóð til. Stefanía og Felicia báðu hvor aðra innilega afsökunar á því að vera a) vond móðir, b) vond dóttir. Meira sá ég nú ekki ...

Jæja, best að fara að baka. Týndi sonurinn fer alveg að koma.

Meginflokkur: Bloggar | Aukaflokkar: Matur og drykkur, Sjónvarp, Vinir og fjölskylda | Facebook

Athugasemdir

Nei..ég hef aldrei lent í neinu svona vandræðalegu
Nema kannski.... pínulítið klámfengið sms sem átti að fara á "vin" minn en fór óvart á markaðsstjórann sem var næstur í röðinni í símaskránni minni

Heiða B. Heiðars, 27.9.2007 kl. 13:05

Hefur komið fyrir að ég hafi fengið vitlaus skilaboð í síman og látið þá viðkomandi vita af því en ekkert svo sem vandræðalegt...já það eru ansi oft jólin hjá bold liðinu Heyrðu já þú minnir mig á er alltaf á leiðinni að fara fá mér súpu í skúðgarðinum til að smakka en hef svo sem fengið gott kaffi og flotta tertusneið þar klikkar ekki góðgætið þar og svo ljúft að sitja þar inni

Brynja (IP-tala skráð) 27.9.2007 kl. 13:54

Bið að heilsa syninum þínum og vinsamlegast ekki fjúka á haf út þarna, mér þykir nóg um veðrið á Álftanesinu.

Ragnheiður , 27.9.2007 kl. 14:10

Ég hef aldrei lent í sms-vandræðum... svo ég viti, en ég er ekki viss um að einhver ókunnugur myndi nokkuð kippa sér upp þó hann fengi snyrtilega orðaðar pælingar um ráðningu á 9 lóðrétt. Kannski færi 6 lárétt eitthvað fyrir brjóstið á sumum, en virðist ekki hafa komið upp.