Myndi líka ofsækja hann Conan

Það er eiginlega með ólíkindum að þættir Conans O´Brien skuli ekki vera sýndir á Íslandi. Skemmtilegur húmor og mikil fjölbreytni. Hann reynir ekki að gera öllum til hæfis og þess vegna tekst honum nefnilega að gera flestum til hæfis ... eða þannig. Jay Leno reynir að styggja engan og það er svo þreytandi til lengdar, fékk eiginlega nett ógeð á honum eftir 11. september 2001 ... þegar hann (handritshöfundar) gerði út í eitt grín að fólki frá Afghanistan fyrir að vera fátækt og brandararnir voru yfirleitt um að karlarnir byggju í hellum (af því að þeir voru svo heimskir) og hjökkuðust án efa á ösnunum sínum (af því að þeir eru svo heimskir). Hefndarþorstinn vegna árásanna kom svona út. Æ, æ.

Mér fannst bara krúttlegt þegar Conan gerði grín að okkur Íslendingum fyrir að vera "staðföst" og hlýðin þjóð við USA og birti myndir af konum með vopn (brauðtertur) í hönd í Árbæjarsafninu. Ég myndi líklega ofsækja hann Conan líka, væri ég prestur ... hann er soddað krútt.

U2 lék fyrir dansi á leiðinni í bæinn í drossíu Ástu í morgun. Ansi góð hljómsveit sem gaman væri að fara á tónleika hjá, heyrir þú það þarna Ragnheiður tónleikadrottning! Fátt bar til tíðinda á leiðinni. Ásta sagði mér að hún hefði farið á upplestur hjá Uppheimum, metnaðarfullu bókaforlagi á Akranesi (gefur m.a. út Gyrði Elíasson og Ævar Örn) í Skrúðgarðinum. Alveg fullt út úr dyrum og ég fjarri góðu gamni í reyndar dásamlegu afmæli. Hefði nú ráðlagt erfðaprinsinum að fara ef ég hefði vitað af þessu, hann er af þeirri kynslóðinni sem vill láta lesa fyrir sig ... annars kvarta ég ekki, hann er sílesandi, þessi elska, enda stórgáfaður eins og mammasín. Hann er einmitt að lesa eina af nýrri bókum Alistair MacLean sem kom út fyrir einhverjum árum, Ráðum dulmálið! Held að ég hafi æfst í hraðlestri í gamla daga þegar ég fékk alltaf nál og tvinna í jólagjöf og Gummi bróðir nýjustu Alister MacLean-bókina og yfirleitt náði ég að ljúka henni áður en hann fór að sofa á aðfangadagskvöld.

Ætti maður ekki að heimta skaðabætur fyrir andlegar misþyrmingar á árum áður að þurfa að upplifa bókalaus jól ár eftir ár eftir ár eftir ár? Þegar mér tókst loksins að fá móður mína til að gefa mér bók í jólagjöf, þá farin að búa með manninum síðar varð fyrrverandi maðurinn minn, þá gaf hún mér tvær bækur; Við matreiðum og Vinnan göfgar manninn, ástarsögu með vinnutengdum boðskap, minnir mig. (frá Sögusafni heimilanna). Jamm!

Prestur handtekinn fyrir að ásækja Conan O'Brien

Athugasemdir

[Ragnheiður , 8.11.2007 kl. 09:02]

Skaðabætur jú, ég er að hugsa um að sækja um svoleiðis vegna þess að mér var hent úr hreiðrinu án nokkurrar kunnáttu, ég hefði getað soltið til bana og gekk í götóttum fötum. Fékk nebblega enga nál og enga leiðsögn hmmm...

[Guðríður Haraldsdóttir, 8.11.2007 kl. 09:11]

Hehehehe, ýkti þetta aðeins en í minninu er þetta svona, kvenleg gildi og karlaskemmtun og það allt, arggggg!

[halkatla, 8.11.2007 kl. 09:14]

ég elska kónann

[krossgata, 8.11.2007 kl. 09:40]

 Ég hefði líklega umturnast ef ég hefði alltaf fengið nál og tvinna en bróðir minn bækur.  En við systkinin erum alin upp á sitt hvoru heimilinu og ég veit ekkert hvort hann fékk.  Við, ég og systir mín sem ólumst upp saman fengum svipaðar jólagjafir, afar sjaldan bækur, þær voru svo dýrar.   En það þýddi að ég flutti ung að heiman, um 9 ára, á bókasafn bæjarins. 

[Guðrún Jóhannesdóttir, 8.11.2007 kl. 10:53]

nál og tvinna, já gott mál, bókarlaus jól eru nú samt varla jól, en ég skil þetta með bækurna sem þú fékkst, hún hefur viljað halda í tengdasoninn hehehehehe (ekki að ég trúi að þú hafir ekki kunnað að elda "hóst hóst")

[Kristín Katla Árnadóttir, 8.11.2007 kl. 11:13]

Ég er sko sammála þér með Jay Leno. kveðja.

[Heiða B. Heiðars, 8.11.2007 kl. 11:42]

Ég sá U2 í Dublin sautjánhundruðogsúrkál.... fæ ennþá bólugæsir þegar ég hugsa um lokalagið. Bono ca tvo metra frá mér að syngja Presley´s Falling In Love With You.... án undirspils! Geðveikt!!

[pepsy (IP-tala skráð) 8.11.2007 kl. 12:40]

flöskur og dósir til sölu, mamma ræður

kveðja Jón 

[Þorkell Sigurjónsson, 8.11.2007 kl. 16:12]

Hefi ávallt haft það álit, að prestarnir séu hin mestu ólíkinda tól.

[Árni Gunnarsson, 8.11.2007 kl. 16:17]

Bara stórgáfaður eins og mamma sín!!!

Hefði ekki verið slæmt ef hann hefði verið stórgáfaður eins og mamma hans?

[Hildigunnur Rúnarsdóttir, 8.11.2007 kl. 17:52]

heh, það er ekki eins og það sé ekki alltaf verið að vinna í þessu :D

sjáumst við svo ekki 14. des?

[Ásdís Sigurðardóttir, 8.11.2007 kl. 18:10]

Ég fékk yfirleitt 6-8 bækur hver jól og át þær upp til agna, sumar á ég ennþá. Ellllska bækur. Sá Conan hérna um árið, hann var flottur.

[Guðríður Haraldsdóttir, 8.11.2007 kl. 18:13]

"Mammasín" er nú sérstakt orð, finnst mér ... Árni og eigi þörf að leiðrétta það! Hvað gerist 14. des, Hildigunnur?

[Guðríður Haraldsdóttir, 8.11.2007 kl. 20:41]

Heheheh, það er sko jólaboð hjá annarri skvísu, fékk boðsbréfið áðan.

[Jenný Anna Baldursdóttir, 8.11.2007 kl. 22:00]

Mammasín er hið rétta krúttorð yfir okkur hippamömmurnar.

Þetta með nálina og tvinnann hefur orsakað margar sálfræðiheimsóknirnar hjá mér og minni fjölskyldu, eða hefði gert það ef ég hefði ekki verið alin upp af ömmu minni sem gaf mér bækur út í eitt.  Hefði örgla skemmt mig fyrir lífstíð.

Bíð eftir boðskorti í jólahlaðborð til þín Gurrí mín, aþþí ég komst ekki í ammilið.

[Kristín M. Jóhannsdóttir, 9.11.2007 kl. 03:01]

Ég þoli ekki Conan. Hef reynt að horfa á hann en hann vekur með mér ógeð.