Opinberun II. hluti

Hingað til hefur fólk ranglega haldið að það sem hér er ritað sé heilagur sannleikur. Þar sem senn er ár liðið síðan ég ýtti þessari bloggsíðu úr vör finn ég mig knúna áður en lengra verður haldið að segja sannleikann og ekkert nema sannleikann. Jólin eru líka á næsta leiti og á aðventunni verður maður eitthvað svo meyr og samviskubitið ólgar sem aldrei fyrr.
Sumt hefur að vísu verið nálægt sannleikanum en ég ætla þó ekki að reyna að afsaka mig með því.

Jú, jú, ég heiti Gurrí og allt það ... og vinn í krembrauðsverksmiðju hér á Akranesi. Góða fólkið á Vikunni féll frá málsókn ef ég opinberaði sannleikann.

 Ég á ketti en þeir eru ekki þessi krútt sem ég hef haldið fram, heldur sóðaleg, lúmsk og grimm kvikindi sem stökkva froðufellandi á tærnar á mér ef ég gleymi að fara í inniskóna. Ég notaði númer 39 af skóm hér áður fyrr ... er nú 35.

Ég bý í íbúð ... en hún heitir hreinsunareldur, ekki himnaríki, og er á miðhæð ... í hjólhýsi. Hún er pínkuoggulítil og snýr að porti þar sem öskutunnurnar eru geymdar.

Ég á vissulega barn. Dóttir mín, sem ég hef ranglega nefnt erfðaprinsinn á blogginu, er stöðumælavörður hér á Skaganum. Hún á indælan kærasta sem er hér eins og grár köttur þótt það sé eiginlega hvergi pláss fyrir hann. 

Ætla ekki að viðurkenna meira núna. Þetta er eiginlega meira en nóg. Fyrir bloggafmælið stóra (í janúar 2008) verður þó allt komið upp á yfirborðið. Líka hneykslismálin!

Athugasemdir

[Guðrún Jóhannesdóttir, 4.12.2007 kl. 22:53]

Þar kom "sannleikurinn" fram í allri sinni dýrð

Gott að þau hjá Vikunni hættu við málsókninni hehehehehe 

[Þröstur Unnar, 4.12.2007 kl. 23:29]

Loksins

[Jenný Anna Baldursdóttir, 4.12.2007 kl. 23:35]

Hahaha, ég dey, myndirnar maður minn.  Arg. 

[Jenný Anna Baldursdóttir, 4.12.2007 kl. 23:36]

Hei, ég sleppi aldrei úr færslu og hvar er þá Opinberunarblogg I?

[Jensen (IP-tala skráð) 4.12.2007 kl. 23:40]

Jæja góða,ertu þá bara plötuskjóða.?

[Guðríður Hrefna Haraldsdóttir, 4.12.2007 kl. 23:47]

... held að ég hafi einhvern tíma skrifað dásamlegan pistil sem heitir: Opinberun Guðríðar. Man ekkert hvað var þar, örugglega e-ð lygilega guðdómlegt.

Nú er ég farin að sofa ... (alveg satt) les kannski aðeins í HPotter. 

[Fishandchips, 4.12.2007 kl. 23:52]

 En hvar finnurðu allar þessar brjáluðu myndir?

[Guðríður Hrefna Haraldsdóttir, 5.12.2007 kl. 00:11]

Laug því náttúrlega með svefninn, erfitt að slíta sig frá blogginu ... myndirnar finn ég flestar á google.is. Var ekki að leita að mynd af Kubbi neitt sérstaklega, heldur cat comic, gæti verið eitthvað slíkt og þá kom kisumyndin meðal annars. Hin myndin kom í ruslpósti (urrr) sem ég bað reyndar um, hún líkist erfðaprinsinum mínum ótrúlega mikið nema hann sefur aldrei á klósettinu, held ég. Þriðja myndin sem átti að birtast var af "dauðum" manni á Langasandinum, játning mín um mannaveiðar átti að fylgja með. Myndin var tekin uppundir manninn og sást aðeins í fjölskyldudjásnin hans. Erfðaprinsinn ritskoðaði af grimmd og sagði að fín frú á Skaganum birti ekki svo dónalegar myndir á bloggi sínu. Játningin fór því í ruslið en myndin er enn á desktop ... heheheheh NÚ ER ÉG FARIN AÐ SOFA. HARRY POTTER BÍÐUR ... Get sofið til níu í fyrramálið, vinn heima á morgun líka.

[Jóna Á. Gísladóttir, 5.12.2007 kl. 01:22]

hehe vantar ekki fólk í krembrauðsverksmiðjuna?

[Einar Indriðason, 5.12.2007 kl. 06:10]

HVER ERT ÞÚ, OG HVAÐ HEFURÐU GERT VIÐ HINA GURRÝ?

[siggi (IP-tala skráð) 5.12.2007 kl. 07:22]

hæ Gurrí, er til hið gamla góða krembrauð? eru osofin kelling? ég veit að þú lest mikið þessa daganna, getur verið að þú sért eitthvað vansvefna þessa daganna, þá játar maður ýmislegt.

siggi

[Matthildur Ágústa Helgadóttir Jónudóttir, 5.12.2007 kl. 09:29]

Svei mér þá ég skellihló og það fyrir hádegi.  Þú ert góð þykir mér.

[Ragnhildur Sverrisdóttir, 5.12.2007 kl. 09:40]

Ég hef aldrei efast um neitt af því sem þú skrifar, svo þetta kom mjög á óvart! Jú, annars, eitt hef ég aldrei skilið: Þessar Bold-frásagnir, eru þær ekki örugglega uppspuni? Ég veit að Bold er í sjónvarpinu, en er þetta í alvöru söguþráðurinn? ekki bara húmor í þér? Mjög öflugur húmor? Það skrifar í alvöru enginn handritshöfundur svona framvindu, er það nokkuð??

[Lára Hanna Einarsdóttir, 5.12.2007 kl. 09:45]

Ég get staðfest frásagnir Gurríar af söguþræðinum í Bold, Ragnhildur. Þær eru dagsannar og hún dregur frekar úr flækjunni en hitt, væntanlega til að auðvelda mögulegan skilning á vitleysunni. 

[Jenný Anna Baldursdóttir, 5.12.2007 kl. 09:58]

Kona sem komin er í beinan hvorukynslegg af Jóni Hreggviðssyni, lýgur auðvitað ekki á blogginu.  Ónei, allt heilagur sannleikur.  En dásemdarþættirnir BOLD eru ævintýri líkastir.  Er það ekki annars Gurrí mín?

[Ragnhildur Sverrisdóttir, 5.12.2007 kl. 10:10]

Takk fyrir upplýsingarnar. Ég veit ekki hvort þær verða til þess að ég horfi aldrei, aldrei á Bold, eða hvort ég stekk núna að tækinu daglega. Mikil dilemma í gangi á þessu heimili.

Mig grunar samt að endursögn Gurríar sé bæði menningarlegri og heilsusamlegri en þættirnir sjálfir

[Steingerður Steinarsdóttir, 5.12.2007 kl. 10:37]

Já, það voru dýrðardagar hjá okkur í krembrauðinu í gamla daga. Maður ber ekki sitt barr eftir að hafa hrakist úr krembrauðinu í kókosbollurnar. Njóttu lífsins í hjólhýsi ljúfan mín.

[Ásdís Sigurðardóttir, 5.12.2007 kl. 10:48]

Þú ert nú meiri púkinn. En ávallt skemmtileg. Litar tilveruna með blandi af gamni og alvöru, haltu áfram krembrauðskona í skrúðgarði, ég fíla þig.    

[Guðríður Hrefna Haraldsdóttir, 5.12.2007 kl. 11:27]

Jamm ... frekari játningar bíða betri tíma. Nú er það bara alvara lífsins, vinna, vinna og vinna, með kvef í nös ... Takk fyrir að trúa mér.

[Laufey Ólafsdóttir, 6.12.2007 kl. 01:41]

Hvar er miðhæð í hjólhýsi???

[Hulda (IP-tala skráð) 6.12.2007 kl. 12:09]

góður!!

[Breiðholtshatarinn (IP-tala skráð) 8.12.2007 kl. 09:43]

Guðmar, hvað ætlarðu að halda lengi áfram að fífla allt þetta fólk?

Reyndar er þetta lið ferlega tregt að sjá ekki að þú notar mynd af Divine fyrir þessa "Gurrí"