Krassandi lífsreynslusögur ...

Það gengur á með dásamlegum éljum fyrir utan. Þess á milli skín sólin. Ekta íslenskt vetrarveður. Þetta veðurlag gerði lífsreynslusöguna sem ég var að skrifa í Vikuna bara enn dramatískari en í henni gengur á með skini og skúrum. Minni á að ef þið lumið á góðri sögu fyrir Vikuna þá má alveg hafa samband í [e-mail] ... afar vel þegið. Tek það fram að sögunum er undantekningalítið breytt þannig að erfitt er að þekkja fólk af þeim, sem er sjálfsögð tillitssemi. Sagan sjálf skilar sér hvort sem fólk býr í Reykjavík, á Vesturlandi eða fyrir norðan, á þrjú börn eða fimm.

Ég held að uppáhaldssagan mín sé sú sem vinkona mín sagði mér en þar hafði bróðir hennar kynnst góðri stúlku sem hann kynnti fyrir fjölskyldunni. Sama kvöldið og vinkona mín sá stúlkuna í fyrsta sinn fór hún niður í bæ ... á djammið. Í skotinu hjá Glitni í Lækjargötu sá hún góðu stúlkuna í keliríi við svarthærðan, ókunnan mann. Hún þagði yfir þessu og þjáðist fyrir hönd bróður síns sem alltaf varð meira og meira ástfanginn af þessari ... glyðru. Vinkona mín forðaðist að hitta hana og sat frekar inni í herberginu sínu eða fór út ef von var á henni í mat. Það var ekki fyrr en um vorið, í fermingarveislu litla bróður, sem hún áttaði sig á því að glyðran var til í tveimur eintökum, eða eineggja tvíburi, og sú sem kelaði í bænum er enn gift svarthærða manninum (40 árum seinna) og bróðir vinkonu minnar er líka afar hamingjusamur með „glyðrunni“ sinni líka.   

Jónas fær loks að leika lausum hala í dag. Erfðaprinsinn nennir ekki að láta hann trufla sig yfir sjónvarpinu á kvöldin og ég er eitthvað stressuð að láta hann ryksuga þegar enginn er heima, ef þessi elska myndi festa sig, sem er frekar ólíklegt en samt ... Annars hef ég heyrt um fólk sem hefur hækkað húsgögnin sín til að róbótinn geti ryksugað undir þeim. Það er helst að ofnarnir mínir séu af rangri hæð frá gólfi. Hann er bara svo klár að losa sig úr öllum klípum. Ég á svo erfitt með að fleygja ungunum mínum úr hreiðrinu, þannig að þeir verði sjálfstæðir og bjargi sér sjálfir, spyrjið bara rígfullorðinn erfðaprinsinn ...

Athugasemdir

[Guðmundur G. Hreiðarsson (IP-tala skráð) 29.1.2008 kl. 12:54]

Er myndavélin þín enn í ábyrgð?

[Jenný Anna Baldursdóttir, 29.1.2008 kl. 14:15]

Já þesi var fjandi góð.  Með tvibbana sko.

[Guðrún Jóhannesdóttir, 29.1.2008 kl. 14:27]

Góð "glyðru"sagan.

Er Jónas ekki hamingjusamur í dag að fá að leika svona lausum hala?

[Steingerður Steinarsdóttir, 29.1.2008 kl. 15:38]

Mér finnst tvíbbasagan batna því oftar sem ég heyri hana. Hafðu það gott Gurrí mín.

[Anna Ólafsdóttir Björnsson, 29.1.2008 kl. 16:28]

Alltaf himnesk þessi saga ;-) og svo er þetta málið: Er Jónas ekki foreldri, en ekki barn?

[Þröstur Unnar, 29.1.2008 kl. 16:38]

Er ekki málið að Birtíngur endurlífgi Samúel.

Þá færðu nóg af krassandi xxxlífsreynslusögum.

[Margrét Guðjónsdóttir, 29.1.2008 kl. 17:33]

Frábær sagan af tvíburunum.  Sjálfvirk riksuga í himnaríki??  þvílíkur draumur... 

Knús til þín kæra Gurrí

[Edda Agnarsdóttir, 29.1.2008 kl. 19:34]

Góð saga. Ég veit um einn á blogginuu sem á sjáfvirka ryksugu! Þú getur fengið að vita hvernig hún gengur, með því að spyrja hann hér.

[Ásdís Sigurðardóttir, 29.1.2008 kl. 20:10]

Gurrý, tvíburasöguna las ég einmitt fyrst í Vikunni, hún er lúmskt góð áminning um að dæma ekki fyrirfram.  Vona að allar ferðir gangi vel í misgóðu veðri, mundi ekki skilja Jónas eftir í gangi, kattanna vegna. 

[Guðný Anna Arnþórsdóttir, 29.1.2008 kl. 21:14]

 Dósin mín, ef ég bara myndi nú segja þér allar sögurnar mínar....later...later...

[Tiger, 29.1.2008 kl. 22:53]

*skellihlátur* ég gat ekki annað en hlegið dátt þegar ég las endirinn á tvíburasögunni - tær snilld. En já, sýnir nokkuð vel hversu fljót við erum að dæma og hve mikið vandamál misskilningur getur verið þegar maður leyfir honum að fljóta frjáls um á meðal okkar.

 Ég gæti nú sent þér fullmikið af virkilega undarlegum lífsreynslu sögum, bæði hvað mig varðar og samferðafólk mitt - en líklega eru þær sumar of sérstakar til að hægt sé að breyta þeim til að ekki þekkist til fólksins sem upplifði þær. En hver veit, kannski someday.

[Guðríður Hrefna Haraldsdóttir, 30.1.2008 kl. 11:13]

Tigercopper, plís!!! Hrikalega væri æðislegt að fá sögur frá þér!!! Og ég bíð róleg, Guðný Anna ...

Anna, Jónas er sonur minn, keppinautur erfðaprinsins um hylli mína ... ég þarf að sæta færis til að setja hann í gang (Jónas) til að allt logi ekki í slagsmálum í himnaríki ...

[Tiger, 30.1.2008 kl. 18:15]

Já sko ... ég á nú eina góða sögu - sögu sem má kalla öskubuskusögu - um fátæka, gullfallega og eftirsótta stúlku sem hefur ennþá hjarta úr gulli og er ímynd alls þess saklausa og flekklausa sem upp er hægt að finna. Stúlku sem fékk prinsinn sinn sem svo reyndist alls ekki vera sá draumaprins sem hana hafði dreymt um.

Honum fylgdu fjöldamörg ár óhamingju, óheiðarleika og að auki var til staðar "vonda stjúpan" í gervi tengdamömmu og "vondu stjúpsysturnar" í gervi tveggja mágkvenna... margt undarlegt sem átti sér stað þar um margra ára skeið. En ýmislegt er þessum atburðum tengt sem ekki færu framhjá þeim sem að máli komu svo ekki er víst að hægt sé að breyta sögunni án þess að hún missi "broddinn" og að "leikendur" muni ekki þekkja leiksviðið og leikara verksins...

En, kannski færðu yfirnóg af slíkum sögum - sögum sem maður telur einstakar og undarlegar en reynast svo bara hinar hversdagslegustu og svona eitthvað sem flestir í lífinu lenda einhvern tíman í.

Kannski maður ætti að reyna að setja hana niður í stórum dráttum og senda þér hana leynilega með þeim fyrirvara að þér finnst hún kannski bara ósköp venjuleg og ekkert sérstök - og að ef ekki verði hægt að breyta henni nógu vel til að "öskubuska" þekkist ekki - að þá verði hún dregin til baka óbirt.

[Guðríður Hrefna Haraldsdóttir, 30.1.2008 kl. 18:21]

Ég myndi sko gjarnan vilja fá þessa sögu ... áður en allir vinir mínir með símnúmerabirti hætta að svara þegar ég hringi og heimta sögu hjá þeim. Svo er hægt að senda mér símanúmerið og ég hringi og skrifa hana, svo þú þurfir ekki að hafa svona mikið fyrir þessu. Ég fékk eina mjög góða í vinnumeilinu í dag ... fá bloggvini og ekki væri verra að fá eina eða 20 frá þér.