Frábærir Skagamenn ...

Sama hvert farið er á Skaganum er ekki talað um annað en slysið í gær. Samhugur Skagamanna er einstakur og fólk hugsar greinilega með mikilli samúð mikið til aðstandenda strákanna. Þótt Akranes sé ekki lengur lítill staður þá finnst mér hann samt hafa ákveðna kosti smábæjar, sérstaklega þegar kemur að einhverju á borð við þetta.

Elskan hann Tommi kom á Skrúðgarðinn þar sem ég sat og úðaði í mig kínverskri súpu eftir átökin í sjúkraþjálfuninni þar sem Beta barðist við gömul stríðsmeiðsl mín. Það urðu fagnaðarfundir, alla vega mín megin, honum finnst ég svikari við strætó að fara svona oft með Ástu í drossíunni og kallar okkur alltaf glyðrur. Ég sagðist reyndar hafa blikkað hann á föstudaginn á Kjalarnesi og hann mig á móti með bílljósunum en Tommi hnussaði og sagðist hafa verið að blikka Gumma. Það er sem ég segi, ekki séns að reyna að binda trúss sitt við strætóbílstjóra, þeir blikka bara hver annan.  

María var með tvo yndislega unglinga í „starfsþjálfun“, man bara að strákurinn heitir Freyr og hann tók dansspor þegar hann færði mér kaffið, algjör sjarmör. Svo kom unga stúlkan eftir smástund til að spyrja mig hvernig mér hefði líkað veitingarnar. Besta þjónusta sem ég hef fengið lengi.

Í gærkvöldi ætlaði ég að vera rosagóð við okkur erfðaprins og bjóða okkur upp á eitthvað gott að borða. Við hringdum á Galito og pöntuðum okkur mat. Ég gat ekki hugsað mér pítsu, bara gamla, góða Tandoori-kjúklinginn. Sömu fyrirskipanir og áður ... krydda kjúklinginn betur (meira tandoori-bragð) og engar furuhnetur í salatið, takk. Nú ... maturinn var meira kryddaður eins og ég bað um en bara saltari og ég hata mikið saltbragð. Engar furuhnetur voru í salatinu, bara kasjúhnetur (arggg) og ég hata hnetur! Hvílík vonbrigði. Svona getur misskilningur orðið, maturinn hjá Galito er alltaf frábær en þegar ég panta næst ætla ég að vera skýrari í máli. Hvernig átti ég að vita, enda langt síðan ég pantaði síðast, að þeir væru farnir að setja fleiri hnetutegundir (ókei, furuhnetur eru fræ) í salatið? Ég hringdi voða sár og fékk svo ljúft viðmót í símanum að pirringurinn hvarf eins og dögg fyrir sólu. Kisurnar voru hrifnar af kjúklingnum, alla vega Tommi. Kubbur vill bara þurrmat.

Brooke er komin að sjúkrabeði Ridge eftir að Stefanía grátbað hana um það, faðmaði hana og lofaði að vera alltaf góð við hana. Nick er frekar óhress, enda búinn að fá hana alla leið til Mexíkó í dekur og daður. Dante er farinn að reyna við Feliciu eftir að Bridget hryggbraut hann. Mér sýndist þau kyssast þegar mér var litið á skjáinn áðan. Jamms, Ridge er að vakna og kominn með lífsviljann aftur. Stefanía grætur. Var ég búin að minnast á að pabbi Brooke, Bobby í Dallas, er farinn að deita Jackie, mömmu Nicks, hún gafst upp á Eric sem giftist alltaf Stefaníu þegar eitthvað bjátar á.

Athugasemdir

[Arna Dögg (IP-tala skráð) 19.2.2008 kl. 20:11]

ooohh... hvernig geturðu horft á Bold and þe bjútífúll...  mér finnst þessir þættir svo óhugnanlega, sorglega, hræðilega leiðinlegir. En smekkur fólks er vitaskuld misjafn eins og við erum mörg.

Alveg hræðilegt að heira af þessu slysi á Akranesi.. ég sá í fréttum að bíllinn og húsið voru í rúst. Og piltarnir ekki í belti. Enda slösuðust þeir báðir mikið kom fram í fréttum.

Keyrum öll á löglegum hraða og verum í belti.. þetta eiga allir að hugsa um áður en þeir keyra af stað. 

Gaman að lesa bloggið þitt Gurrí mín. Kveðja Arna Dögg

[Helga Magnúsdóttir (IP-tala skráð) 19.2.2008 kl. 20:55]

Hrikalegt að heyra af þessu slysi, var að lesa að öðrum þeirra væri haldið sofandi á LSH. Bókin með myndinni er á skrifborðinu þínu.

[Linda Linnet Hilmarsdóttir, 19.2.2008 kl. 21:35]

kvitt kvitt og bestu kveðjur.

[Ásdís Sigurðardóttir, 19.2.2008 kl. 21:50]

Boldið er magnað á köflum.  Hræðilegt þetta slys, vona að blessaðir drengirnir nái sér.  Kær kveðja.

[jensen (IP-tala skráð) 20.2.2008 kl. 00:19]

Það er óskandi að ungu mennirnir er lentu í þessu slysi nái heilsu.

[Steingrímur Helgason, 20.2.2008 kl. 00:48]

Svona atburðir snerta alla, enda samfélagið þarna ennþá millismátt á mælikvarðanum, flestir & þekkja til einhverra nástaddra.  Vonum bara það besta fyrir strákana.

En, með tandoorii,  ~U cant have a ball if U dont like nut's~ ....

[Anna Ólafsdóttir Björnsson, 20.2.2008 kl. 02:03]

Hæ, mér finnst svo gott að búa í litlu samfélagi og skil svo vel hvað þú ert að tala um. Dreymir um að allt Ísland sé samsett úr manneskjulegum einingum, einmitt þess vegna stofnuðum við Íbúasamtök Vesturbæjar, á meðan ég bjó stutta stund í Reykjavík.

[Steingerður Steinarsdóttir, 20.2.2008 kl. 09:54]

Kjúklingurinn hljómar spennandi og ég hefði ekki fúlsað við hnetunum.

[Kjartan Pálmarsson, 20.2.2008 kl. 10:45]

Það er satt, ömurlegt með þetta slys. Bið fyrir bestu kveðjur til drengjana og vona að þeir fái fljótann og góðan bata.

Tekur þú eftir því Gurrí að við Þröstur höfum fengið liðstyrk í BBBB= Bandalag Bölvandi Bloggara um BÓLDið.

[Guðríður Hrefna Haraldsdóttir, 20.2.2008 kl. 11:00]

Jamms, frá Örnu Dögg. Ég veit ekki hvað þið hafið greitt henni mikið fyrir að tala þvert gegn huga sínum en allar konur elska boldið, svona eins og allir karlar elska fótbolta og bjór og eru voða vitlausir .... (djók). Já, Kjartan minn, ég tók eftir þessu.