Skyndileg frægð vinkonu og heilmiklar brjóstapælingar!

Ég á svo fyndna vinkonu (46). Hún var að hlusta á Bylgjuna í gærmorgun og heyrði að Heimir játaði á sig að eiga 48 ára afmæli þennan sama dag. Vinkona mín hrukkaði gáfulegt ennið, tók reikningsstokkinn fram, dró 1961 frá 2008 og fékk út aðra tölu en Heimir! Hún hringdi strax í Bylgjuna, alveg í sjokki, og komst óvænt inn í beina útsendingu.

„Ég þarf að leiðrétta þig, þú ert ekki 48 ára!“ sagði hún.

„Nú, hvað áttu við?“

„Ertu ekki fæddur árið 1961?“

„Jú, það er ég.“

„Hvernig getur þú þá fengið út að þú sért 48 ára?“

Útvarpsgengið bilaðist víst úr hlátri og Heimir varð alveg steinhissa, hann hélt í alvöru og líka konan hans, að hann væri 48 ára. Þarna græddi hann alveg heilt ár í viðbót. Gulli Helga, útvarps- og sjónvarpsstjarna, hélt að þetta væri úthugsað grín. Onei, þetta var hún vinkona mín, gömul skólasystir og jafnaldra Heimis.

Meira um aldur ... Kona í verslun (35) sagði við mig (49) í gær að ég gæti sko alveg verið tíu árum yngri, ótrúlegt að ég væri að verða fimmtug ... ég held að hún hafi viljað selja mér peysuna með öllum ráðum, þessi elska. Það tókst, ekki þó eingöngu vegna fallegu orðanna, heldur peysunnar sem Hrund ofurblaðamaður hrósaði síðan í hástert í morgun og staðfesti þar með sjúklega góðan fatasmekk minn. Það er ekki séns að nokkur segi við mig núna: „Nei, Gurrí, maður fer ekki á kínaskóm á árshátíð!“ eins og gerðist á DV-árunum í kringum 1984.

Ég var reyndar ósátt við ákveðna skyrtu í búðinni af því að hálsmálið glenntist svo í sundur (svona seventís-dæmi, stór viðbjóðskragi) og ekki hægt að hneppa upp í háls. Konan hélt að ég væri svona siðsöm og benti mér á fallegan háls minn og bringu (eins og ég vissi það ekki sjálf) og ég gæti alveg gengið í flegnu (djísus). Ég sagði henni að mér fyndist flíkin bara fallegri hneppt upp í háls. Sem minnir mig á ... Gömul vinkona kunningjakonu minnar sagði einu sinni við mig að ástæðan fyrir því að ég gengi ekki út væri sú að ég væri alltaf með hneppt upp í háls eða í rúllukragapeysu og slíkt. Sjálf gengur hún alltaf í mjög flegnu og er kölluð „Jóna“ með brjóstin, þegar hún heyrir ekki til. Brjóstin á henni eru orðin virkilega veðurbarin, enda hefur þeim verið flaggað sleitulaust í um 25 ár í öllum veðrum. Þessi Jóna (dulnefni) hefur kannski eitthvað til síns máls. Hún hefur gengið út margsinnis ... en ég hugga mig við að ég hafi sparað mér einhverjar ástarsorgir og jafnvel komið í veg fyrir kynni af mönnum með brjósta-blæti.

Jæja, páskarnir á næsta leiti. Mikið hlakka ég til á föstudaginn langa, að borða eitthvað vont með hnetum og rúsínum, lesa ævisögu afdalabónda um ævintýri hans við að komast á kirkjukórsæfingar í næstu sókn, hlusta á jólaplötu með Mariah Carey og berja mig með svipu. Eitthvað verður að gera fyrst ekki má spila bingó.

Athugasemdir

[Katrín Snæhólm Baldursdóttir, 19.3.2008 kl. 11:27]

Je minn Gurrí. Held það sé engi9n hætta á að þú drepsit ur leiðindum um páskana með þennan haus sem þú ert með á ösxlunum. Roslaega hlýtur að vera skemmtilegt að vera þú...allavega miðað við hvernig þú getur séð allt þetta brjálæðislega fyndna út úr einföldum daglegum atburðum.

Páskaknús

[Katrín Snæhólm Baldursdóttir, 19.3.2008 kl. 11:28]

Og er ekki fyndið hvað ég skrifa vitlaust þegar ég er ekkert að hugsa..bara skrifa??? Sjá dæmi fyrir ofan

..ég er sannfærð um að ég er með skrifblindu.

[Jenný Anna Baldursdóttir, 19.3.2008 kl. 11:54]

Þú gleymdir mikilvægu atriði.  Hvað er "Jóna" gömul?

Gott að vera með útitekin brjóst.  Ætli maður lifi ekki lengur?

Farin í sund.

[Edda Agnarsdóttir, 19.3.2008 kl. 11:57]

Gleðilega páskahátíð Gurrý mín!

[Nanna Rögnvaldardóttir, 19.3.2008 kl. 12:07]

Æi, ég er oftast með flegið niður undir nafla og það gagnast ekkert, ég hef ekkert gengið út sem heitið getur síðan einhverntíma snemma á síðasta fjórðungi síðustu aldar.

En með aldurinn, þá lenti ég einmitt í þessu einu sinni, ég var eiginlega aldrei 41 árs en var aftur á móti 42 ára tvö ár í röð og enginn fattaði neitt. Ég var svosem ekkert að reikna, hélt bara að ég vissi hvað ég væri gömul ...

Man reyndar eftir konu fyrir norðan sem skildi ekkert í því af hverju hún fékk ekki ellistyrkinn sinn á réttum tíma en þegar farið var að athuga málið kom í ljós að hún var ekkert orðin 67 ára, var bara 65 - engin reikningsskekkja, kirkjubækurnar höfðu bara brunnið og hún alin upp hjá vandalausum og aldurinn hafði verið mistalinn frá því að hún var barn eða unglingur. En þetta var nú fyrir tíma tölvu- og kennitöluvæðingar.

[Ásdís Sigurðardóttir, 19.3.2008 kl. 12:28]

Þú ert flott      

[Guðríður Haraldsdóttir, 19.3.2008 kl. 12:41]

Jóna (48).

Páskaknús á móti, dúllurnar mínar.  

[Guðmundur G. Hreiðarsson (IP-tala skráð) 19.3.2008 kl. 13:23]

Ja, konur í verzlunum geta verið óttalegir smjaðurskjallarar, sérstaklega ef koma þarf út einhverju seventísdrasli. Láttu mig þekkja það, hm.  

[Brynja skordal, 19.3.2008 kl. 13:53]

þú ert yndi með þínar færslurGleðilegt páskaknús

[Steingerður Steinarsdóttir, 19.3.2008 kl. 14:17]

Mér fannst þetta hryllilega fyndið en skil Heimir vel. Þetta eru akkúrat mistök sem ég gæti gert. Sonur minn er til dæmis alltaf ári eldri en hann raunverulega er í mínum huga og ég þarf að reikna út hvað systur mínar eru gamlar sé ég spurð.

[Hrafnhildur Ýr Vilbertsdóttir, 19.3.2008 kl. 15:14]

Ha ha óborganlega fyndin færsla hjá þér.....ég reyndi að telja börnunum mínum trú um að ég væri 37....fannst það í alvörunni, er hins vegar 42 ára.

[Þröstur Unnar, 19.3.2008 kl. 15:50]

Vildi sjá Maríu Karrey berja þig með svipu e-eitthvað. * Ne djók.

Habbðu það gott yfir páskana granna góð.

[Kolbeinn (IP-tala skráð) 19.3.2008 kl. 16:08]

Menn með brjósta-blæti...

það er að vísu yfirgnæfandi meirihluta gagnkynhneigðra karlmanna

[Guðríður Haraldsdóttir, 19.3.2008 kl. 16:28]

Ó ...

[Guðrún Jóhannesdóttir, 19.3.2008 kl. 17:46]

óborganleg færlsa hjá Himnaríkisfrúnni, enn einu sinni

Vona að föstudagurinn langi verði mjög langur svo þú komist yfir allt þetta meinlæti þitt

[Rebbý, 19.3.2008 kl. 17:54]

gleðilega páskana - vona að föstudagurinn langi verði ekki of langur hjá þér

[Jóhanna (ókunnug) (IP-tala skráð) 19.3.2008 kl. 18:58]

Sæl Gurrý og takk fyrir frábæra færslu. Langaði að segja þér smásögu  Fyrir skömmu vann og á bókasafni og þar sem  ég er sérlegur aðdáandi hlýrabola með blúndu  (á svoleiðis í bunkum í öllum regnbogans litum) þá gerði ég fremur óvísindalega tilraun. Gerði í því að vera í hlýrabol og einhverju fleiru utanyfir og get svo svarið það að það var alltaf löng röð við mitt afgreiðsluborð oft röð út að dyrum (karlmenn mest) en hinar bókavörðurnar voru meira og minna verkefnalausar. Lenti meir að segja á hörkuséns hraðgift konan (nota st. 36D) Held því fram að karlkyns gestum hafi fjölgað mikið á meðan þssari tilraun stóð. Eftir að daður eins gestsins var farið að líkjast boði á stefnumót tók ég upp á því að leggja hlýrabolunum tímabundið og fara í eitthvað skjólmeira. Þá fækkaði karlkyns gestum safnsins. Ég er enn harðgift mínum manni og elska hlýraboli en nota þá í hófi við núverandi störf.  Gleðilega páska

[Guðríður Haraldsdóttir, 19.3.2008 kl. 19:32]

Mæ godd, sonur minn er tengdur í tölvunni minni, komment númer 20 er frá mér!!!

[Guðný Anna Arnþórsdóttir, 19.3.2008 kl. 22:17]

Ég skil hann Heimi afar vel; ég man aldrei hvað ég er gömul og verð yfirleitt að reikna það út á blaði. Dálítið hallærislegt að draga upp blokkina þegar maður er spurður hvað maður sé gamall. Þó slíkum spurningum fari óðum fækkandi, skil ekki af hverju. Góða páska, elsku Gurrí!

[Lára Hanna Einarsdóttir, 19.3.2008 kl. 22:47]

Mikið er ég fegin að lesa hér um allt þetta fólk sem man ekki hvað það er gamalt án þess að beita reikningskúnstum. Það er alltaf góð tilfinning að finnast maður ekki einn í heiminum með sinn rugling.