Sjónvarpseinelti, berdreymni og stressandi frídagar

Kiddi kom okkur af öryggi heim á Skagann seinnipartinn og við Sigþóra blunduðum ekkert á leiðinni, heldur spjölluðum af miklu offorsi, enda langt síðan við höfum hist almennilega. Hana dreymdi nýlega að hafnar væru strætósamgöngur milli Hólmavíkur og Reykjavíkur. Skyldi hún vera berdreymin? Sagði henni að þetta vissi ábyggilega á eldgos í Heklu innan 20 daga.

Það verður ansi mikið að gera þessa viku og þá næstu þar sem erfitt er að gefa út vikublöð með fimmtudagsfrídögum, eins og 1. maí, sumardeginum fyrsta, uppstigningardegi og slíkri dásemd, nú veldur þetta bara aukaálagi ... en samt met ég þessa frídaga mikils. Það verður því mikill dúndurvinnudagur heima í himnaríki á morgun.

Sjónvarpið í stofunni er nú svarthvítt sem rifjar upp ljúfar minningar úr æsku þegar horft var með áfergju á Maður er nefndur, Stundina okkar, Dýrlinginn, Forsythe-fjölskylduna, Onedin-skipafélagið og stillimyndina. Allt jafnskemmtilegt! Litur prýðir aftur á móti gamla tækið í vinnuherberginu. Þetta sjónvarpseinelti í himnaríki er örugglega engin tilviljun, var ekki vika bókarinnar að hefjast? Kláraði reyndar tvær bækur um helgina og byrjuð á enn einni sem er hrikalega skemmtileg og heitir Kuðungakrabbarnir, eftir sama höfund og Berlínaraspirnar.

Athugasemdir

[Ólöf Anna , 21.4.2008 kl. 20:19]

er etta ekki bara svarthvítur þáttur, sem þýðir að sjónvarpið í vinnuherberginu er bilað

[Guðríður Hrefna Haraldsdóttir, 21.4.2008 kl. 20:34]

Aha ... það gæti verið!!!

[Ásdís Sigurðardóttir, 21.4.2008 kl. 21:00]

Læt vita ef Hekla fer af stað er með þetta í sjónlínu.  Góða ferð í fyrrmálið eldsnemma, fyrir allar aldir, áður en haninn galar og allt það

[Magnús Geir Guðmundsson, 21.4.2008 kl. 21:14]

Þér er bara að hefnast fyrir að kíkja ekki á mig á afmælisdaginn! Því skaltu ekki vera hissa á sjónvarpsloftnetsveseni, kólnandi vatni, kergju í þinn garð að hálfu nágranna, himinháum viðgerðarreikningum og komandi krýsu í lífi þínu!

Ég segi nú bara það!

[Jenný Anna Baldursdóttir, 21.4.2008 kl. 22:05]

..og Upstairs´- Downstairs eða Húsbændur og hjú.  Jösses hvað það var skemmtilegt.

[Þröstur Unnar, 21.4.2008 kl. 22:36]

Mæli með að öllum sjónvarpsviðtækjum sé kastað út á The Long Sand, og letistelpustóllin fylgji á eftir. Fá sér tjalddýnu í stofuna, stílabók og blýant, og gera 324 magaæfingar á dag, minnst.

Kveðja úr sveitinni.

[Steingrímur Helgason, 22.4.2008 kl. 00:07]

Hólmavík - Hekla ?

Atarna er skrítin tenging.

Sjónvarp er ofmetið sem afþreyjíng & enn eru merkustu kvikmyndaverkin  líka í gráskala þannig að ég vorkenni þér lítt klaufagang erfðaprinsins.

[Þorsteinn Briem, 22.4.2008 kl. 00:26]

Rétt hjá þér að fara ekki inn á bloggið hans Magnúsar Geirs, Gurrí mín. Hann er alveg snarbilaður.

Það verður bara svart-hvítt í Sjónvarpinu eftir að nefskatturinn verður tekinn upp um áramótin. Spara spara.

Og bara nefin sýnd.

[Helga Magnúsdóttir, 22.4.2008 kl. 10:44]

Svarthvítt sjónvarp vekur algera nostalgíu. Mikið vildi ég að ég fengi endalaust svona bækur upp í hendurnar. Bækur eru það besta sem til er. Allar vikur ættu að vera vika bókarinnar.

[Kolbrún Baldursdóttir, 22.4.2008 kl. 12:25]

Krafturinn i þér