Heimildamynd, sumarbúðir, frændamont og afmæli

4.6.2008 | 20:41

Heimildamynd, sumarbúðir, frændamont og afmæli

Mikið var sérstök heimildamynd á dagskrá seint í gærkvöldi. Ég sá hana ekki frá upphafi en samt nógu mikið ... Hún fjallaði um Justin nokkurn, ungan og trúaðan mann, sem fer um Bandaríkin og frelsar unglinga hægri, vinstri. Hann virðist hafa næstum ótakmarkaðan aðgang að skólum, ja, nema einum, þar sem hann var beðinn um að koma kannski mögulega að ári liðnu þegar búið væri að koma á fót áfallahjálp. Hann grætti og stuðaði krakkana á samkomu þar og foreldrarnir urðu brjálaðir. Aðferðir hans eru umdeildar, hann er hörkutól, enda heitir herinn hans Harðjaxlarnir. Á samkomum er grátið og öskrað. Harðjaxlarnir „krossfesta“ hver annan, hæða, spotta ... og reyna að leika eftir ýmsa atburði sem gerðust fyrir 2000 árum, samkvæmt biblíunni.
Þegar Justin komst að því að Guð fórnaði syni sínum fyrir hann gerðist eitthvað innra með honum, sagði hann.

Svo fann Justin konu sem nú er farin að predika með honum. Hún hefur greinilega lítið álit á kynsystrum sínum og segir konur aðeins hafa tvo kosti í lífinu ... að freista (karlmanna) eða fela öðrum (karlmönnum) valdið. Sorrí, þannig er það bara, sagði hún. Svo er verið að tala um kvennakúgun hjá múslimum ... hehehe Justin er trúaður en líka bisnissmaður og klökknar og grætur á réttum stöðum. Honum tókst t.d. að fella gleðitár þegar hann fékk vænan fjárstyrk frá trúuðum ríkisbubba en hann hágrætur svo sem á samkomum líka, en sýnt var frá nokkrum þeirra. Finnst flott hjá Stöð 2 að sýna svona myndir. Engin dómharka gagnvart Justin kom fram í myndinni ... og það gerði hana eiginlega áhrifameiri. Justin er af ríku fólki kominn og er afar ósáttur við miðaldra foreldra sína sem safna fé og hafa það allt of gott, að hans mati og vilja auk þess ekki frelsast. Hann hefur sannfæringarkraft og nær unga fólkinu með sér með því að græta það, niðurlægja það og byggja upp aftur, tala fjálglega um kynlíf, vera einn af því ... o.s.frv. Í lok myndarinnar kom fram að kaþólikkar hafa bannað honum að predika í kirkjum sínum þarna í sýslunni/fylkinu þannig að hann hefur snúið sér að því að frelsa þá lúthersku. Sjá Justin í youtube-myndbút hér neðst.

Þegar erfðaprinsinn sótti mig í sjúkraþjálfun í gær sátu tveir litlir strákar í aftursætinu, mér til mikillar furðu. Þeir komu til hans þegar hann var að leggja af stað og spurðu hvort þeir mættu vera samferða niður í banka þar sem mamma annars þeirra, kunningjakona erfðaprinsins, átti að vera en var ekki. Annar strákanna er nágranni minn héðan frá Akranesi og hinn býr á Hellissandi. Ég spurði þá hvað þeir ætluðu að gera í sumar. „Við erum að fara í Sumarbúðirnar Ævintýraland,“ sögðu þeir og bættu við að þeir hlökkuðu rosalega til. Mikið verður gaman hjá þeim, enda bestu sumarbúðir í öllum heiminum þótt víðar væri leitað!

Smá frændamont: Kolbeinn frændi, sem leit varla í bók í vetur, náði þrátt fyrir það fínasta árangri í vorprófunum (samræmdu?). Hann var í Grundaskóla sem er í næsta nágrenni við himnaríki. Kolbeinn gerði sér síðan lítið fyrir og gekk langa vegalengd, frá Akranesi upp í Skorradal, með 10 öðrum skátum. Tilgangur ferðarinnar var að safna fé handa blindum dreng hér á Skaga og þeim tókst að safna um 200 þúsund krónum. Bara frábært!

Elsku Anna vinkona á afmæli í dag. Sendi henni hugheilar afmæliskveðjur nær og fjær til sjávar og Ungverjalands þar sem hún dvelur reyndar þessa dagana.

Flokkur: Bloggar | Facebook

Athugasemdir

Sælnú!

Kanar kolvitlausir sem aldrei fyrr, svona sumir hverjir allavega.

Skildi náungin skikka fylgifraukuna til skírlífsbeltisnotkunar, fröken Guðríður?

Minnir endilega að hafa lesið eða heyrt um eitthvað í þá áttina með einhvern túarofstækishópinn!

En er hún Ana þín rokkaða vinkona jafngömul.., eh, ég meina jafnung og sumar aðrar vinkonur hennar?

Magnús Geir Guðmundsson, 4.6.2008 kl. 20:57

Gaman að sjá að sumarbúðirnar Ævintýraland halda fullum dampi ár eftir ár. Það var skemmtilegt að starfa þar og krota sporðdreka og aðrar óvættir á börnin ásamt Hugleiki Dagssyni á sínum tíma.

Þær eru vissulega frábær staður.

Ragnar Þór Pétursson (IP-tala skráð) 4.6.2008 kl. 22:02