Snyrtipinninn nýi og ánægður femínistaboli himnaríkis

Mikið er sallarólegt hérna í vinnunni svona snemma á morgnana (7.30). Enginn annar í húsi, nema þá helst blaðamaðurinn á dv.is en hann er hinum megin í húsinu. Það er mikið stuð að vera fyrstur á staðinn, ég get sest í alla skrifboðsstólana í salnum og rúllað mér á milli borðanna ... og get á nýjan leik boðið prófarkalesurunum gott kvöld með hæðnistóni þegar þær mæta undir átta.

Nýi þrífukarlinn okkar hefur greinilega ekki fengið neina tilsögn því að áður en ég gat hugsað mér að fá mér kaffi þurfti ég að fleygja ótrúlega miklu rusli sem var í kringum kaffivélina. Hella úr bollum afgangskaffi síðan í gær í sérstaka tilþessætlaða-fötu og síðan fleygja drykkjarmálunum í ruslafötuna, allt er þetta í innan hálfs metra radíus til að auðvelda okkur ... en sumt samstarfsfólkið gerir þetta ekki ... og ekki heldur ræstingamaðurinn í gærkvöldi.

Svona varð ég nú mikill snyrtipinni við það að bætast í hóp eldri borgara í síðustu viku. Jibbí! Þann 11. ágúst sl. á meðan ég tilheyrði enn ungu kynslóðinni, hefði ég horft kæruleysislega á þetta og vitað að þetta væri ekki mitt vandamál, einhver 50 plús gæti bara gert þetta. Múahahahahahaha!

Femínistanautið í himnaríki (erfðaprinsinn) verður sífellt ánægðara með mig, enda hef ég gengið einstaklega vel um í heila tíu daga. Ég vissi að eitthvað gott myndi fylgja aldrinum. Ég hef beðið árangurslaust (reyndar frá því ég varð fertug) eftir kostunum sem eiga að fylgja, m.a. fjarsýni (til að verða minna nærsýn-ef það virkar), minni svefnþörf en ekkert hefur miðað, ég er ekki einu sinni komin með alla endajaxlana, þrír þrjóskast enn við að láta sjá sig. 

Gífurleg þreyta kom óvænt yfir okkur stuðboltana, mig og erfðaprins, í gærkvöldi. Eina sem ég man er að hafa horft á Ghost Whisperer (sem er spúkí spennuþáttur) setið í leisígörl með elskuna mína í fanginu (mjúka teppið úr Rúmfatalagernum) ... þangað til ég vaknaði um miðja nótt, eða klukkutíma fyrir áætlaðan fótaferðatíma (6.15). Útlit mitt er einstaklega gott miðað við að hafa sofið upprétt næstum alla nóttina en leisígörl er þrjóskur stóll og vill ekkert láta halla sér mikið aftur ... það þarf alla vega mjög einbeittan vilja til þess. Það getur mögulega kannski skipt einhverju máli tískusýningardömuvaxtarlagið á mér; langar lappir á kostnað búksins þegar kemur að því að nota leisígörl rétt. Hverjum datt í hug að hanna stólinn svona asnalega? Lappirnar á mér standa langt út fyrir fótaskemilinn og ég hef ekki afl til að ýta mér aftur vegna skorts á búklengd. Hönnun þessa stóls er ekkert annað en aðför að mér.

Ásta vill breyta brottfarartíma frá himnaríki úr 6.50 í 6.40 á morgnana. Það verður bara stuð, ég er í eðli mínu algjör B-manneskja og get því staðið í ströngu um miðjar nætur.

Óska ykkur gleðilegs morguns, farsæls komandi eftirmiðdags og heillaríks kvölds.

Athugasemdir

[Jenný Anna Baldursdóttir, 21.8.2008 kl. 11:32]

Þú drepur mig einn daginn.  May it be on your head.

Var að skoða leisígörl týpu í IKEA í gær.  12 þúsund og eitthvað spírólur kostaði fyrirkomulagið.  En ég er svo hrædd um að ég eldist hratt ef ég festist í kvikindinu.

[Jóhanna Sigrún Jónsdóttir, 21.8.2008 kl. 11:49]

Sæl Gurry !

hvað er netfangið þitt. Langar að senda þér mynd.

kveðja Hanna Rúna

[e-mail]

[Sigurður Hreiðar, 21.8.2008 kl. 12:08]

Leyfðu mér að leiðrétta þig, gæska: þú verður ekki eldri borgari fyrr en eftir áratug!

Njóttu lífsins!

[Guðrún Ágústa Einarsdóttir, 21.8.2008 kl. 12:15]

Ég er einmitt með tvo svona leisígörl stóla og það er ekki mikið setið í þeim eins og er, næ alveg að halla honum en hann tekur upp á því að rétta úr sér svona hægt og rólega...ég er greinilega ekki nógu stór og þung til að halda honum í lágréttri stöðu.. kv Gunna.

[Guðmundur G. Hreiðarsson (IP-tala skráð) 21.8.2008 kl. 12:37]

Starfið þér með Baggalúti? Þeir eru allavega þarna í bakgrunninum.

[Guðríður Hrefna Haraldsdóttir, 21.8.2008 kl. 13:49]

Jamm, Guðmundur, ég er leikfang mánaðarins hjá Baggalútum núna, múahahahahah!

Sigurður, takk fyrir leiðréttinguna, veit að ég á minnst 20 ár eftir í eitthvað slíkt, MINNST! Ef ég miða við mömmu.

Vildi, Guðrún, að ég gæti sagst vera of létt fyrir leisígörl 

12.000 er enginn peningur, Jenný. Minn kostaði rúmlega 20.000 í RL-Magasín. (Rúmfatalagernum) ...

Eins gott að þú sofnir ekki í vinnunni, Anna!

[Sigurður Hreiðar, 21.8.2008 kl. 14:26]

Nei, Gurrí, þetta er allt fest í lögum -- við verðum eldri borgarar 60 ára sama hversu síung og sprellfjörug við erum fram undir nírætt!

[Steingrímur Helgason, 21.8.2008 kl. 14:51]

Mizrétti er lokzins náð hjá femínzyzdabeljum bloggsins , 'leizýgörlí stólar' kosta klárlega bara brotabrot af því sem við við aumir karlapar þurftum að 'púnga' út fyrir okkar 'lötustrákastóla'.

En við erum reyndar sáttir við okkar...

[Guðríður Hrefna Haraldsdóttir, 21.8.2008 kl. 15:07]

Hahhah, já Steingrímur, það er rétt. Annars hef ég séð ansi ánægða karla í svona leisígörlstólum. Það eru örugglega svona femínistakarlar.

[Elín (IP-tala skráð) 21.8.2008 kl. 15:53]

Ég sakna þín úr strætó Takk fyrir mig, ógisslega fyndin og málefnaleg í senn. Kær kv Elín

[Ásdís Sigurðardóttir, 21.8.2008 kl. 16:14]

Skemmtileg að vanda gamla mín   hafðu það sem best. 

[Lilja G. Bolladóttir, 21.8.2008 kl. 20:51]

Oooog, enn ein færslan frá þér sem kom mér til að brosa, já jafnvel hlæja.....