Treysti á Akraborgina

Þótt ég sé mikill kattavinur fannst mér ekkert sérlega huggulegt að vakna með afturenda Kubbs óþægilega nálægt andlitinu á mér í morgun. Svona notfæra gæludýrin sér veikleika manns, ég á ekki mann og er því varnarlaus gagnvart slíkum uppákomum, enda hef ég ekki „Feng Shui-að“ herbergið mitt í svona ástarskyni. Rúmið mitt stendur t.d. upp við vegg en skilyrði til að ná sér í gæja er víst það að hægt sé að komast fram úr rúminu beggja megin. Svo eru ekki alveg eins lampar á báðum náttborðum hjá mér, bara eitt náttborð og einn lampi. Svo er mikilvægt að hafa ekkert drasl undir rúmi (tékk), tvær eins styttur í suðvesturhorni herbergisins (tékk), engan spegil sem maður sér sig í úr rúminu (tékk) og ekkert „drasl“ (hmmm, allt of mikið af bókum en bækur eru svo sem ekki drasl).

Í gær var haldin skemmtileg hátíð til að bjóða palestínska flóttafólkið velkomið á Skagann. Við mættum með góðgæti og flestum datt greinilega í hug að koma með súkkulaðidæmi (jesssss) því nóg var af því (jessss). Konurnar dönsuðu við undirleik æðislegrar arabiskrar tónlistar og sýndu frábæra takta. Held ég endurskoði þessa reglu mína um að dansa bara við lagið Luftguitar.

Ég hef hreinlega ekkert gáfulegt til málanna að leggja í sambandi við kreppuástandið hjá þjóðinni/heiminum. Er að hlusta á elsku Silfur Egils, hef lesið ógrynnin öll af bloggfærslum fram á nætur, hlustað vandlega á fréttir og nú er ekkert annað að gera en að bíða eftir því að málin leysist eða ekki. Held í þá von að ég hafi verið berdreymin fyrir hálfum mánuði þegar mér fannst landið vera í rúst en við (Íslendingar?) skoppuðum um á skipi, sem minnti mjög á gömlu Akraborgina, og höfðum það af. Ég bloggaði strax um þennan draum og fannst verst hvað ég var búin að gleyma miklu úr honum en þennan sama morgun var Glitnir ríkisvæddur. 

Skipbrot nýfrjálshyggjunnar, landflótti ungs fólks ef allir skrilljarðarnir lenda á okkur ... og fleira og fleira, heyrist í Silfrinu. Held að almenningur setji mikið traust á Jóhönnu Sigurðardóttur. Kannski er hún „Akraborgin“.

 

Athugasemdir

[Brynja Dögg Ívarsdóttir, 12.10.2008 kl. 13:36]

Hæ Gleymmerei hér.

Æ kisinn, honum finnst bara notalegt að kúra, fundist hlýtt og notalegt. Knúsaðu hann frá mér og segðu honum að hann sé fínn kisi.

Kv frá Spáni Gleymmerei.

[Jóhanna Sigrún Jónsdóttir, 12.10.2008 kl. 13:50]

Gurrý þú er snillingur hehe...  Jóhanna Sigurðar eins og Akraborgin, ég sem var svo hræðilega sjóveik, ælandi og spúandi stanslaust í hverri ferð.

[Helga Magnúsdóttir, 12.10.2008 kl. 15:55]

Jóhann er sú eina sem fólk treystir orðið. Allir hinir eru búnir að gera stórt upp á bak.

[Anna Ólafsdóttir Björnsson, 12.10.2008 kl. 16:54]

Akraborgardaumurinn þinn virðist vera rétt túlkaður, ég hef alla vega góða trú á að við komumst af.

[Jenný Anna Baldursdóttir, 12.10.2008 kl. 16:56]

Í þessari ríkisstjórn er Jóhanna svo sannarlega Akraborgin.

[Hlynur Þór Magnússon (IP-tala skráð) 12.10.2008 kl. 18:43]

Smávægileg athugasemd eða leiðrétting: Nauðsynlegt er að hægt sé að komast fram úr rúminu beggja megin ...

[Guðríður Hrefna Haraldsdóttir, 12.10.2008 kl. 18:48]

Takk, Hlynur, búin að breyta! Takk, hin líka fyrir gáfuleg og skemmtileg komment!

[Aprílrós, 12.10.2008 kl. 18:49]

;)

[Sigrún Jónsdóttir, 12.10.2008 kl. 21:53]

Ég sakna Akraborgarinnar í víðtækri merkingu

[Guðríður Hrefna Haraldsdóttir, 12.10.2008 kl. 23:43]

Ójá, sammála, sakna Akraborgarinnar!

[Guðrún Ágústa Einarsdóttir, 12.10.2008 kl. 23:59]

Ekki hef ég farið eftir þessu Feng Shui-dæmi, þú ert bara að lýsa mínu fyrrverandi herbergi..rúmið klesst upp við vegg og eitt náttborð og einn lampi, fótagaflinn snéri í átt að hurðinni ( sem á að vera mjög slæmt) en rúmið var á sökkli svo ekkert drasl komst þar undir ekki nema að ryk og lóg flokkist undir það dæmi...hmmm... og bókahilla bak við hurð full af bókum, en ég náði mér samt í karlmann..ekki nema að ég hafi beytt einhverjum göldrum... ég hef að vísu verið spurð hvort ég væri norn.... það hefur kannski verið galdurinn????

Knús á kisu ég á tvo sem eru gjarnir á þetta sama... sérstaklega prinsinn....prinsessan kann sig þó pínu.

En gangi þér vel að finna kk, hann kemur áður en þú veist af.

kv Gunna.

[Guðríður Hrefna Haraldsdóttir, 13.10.2008 kl. 00:14]

Takk fyrir að gefa mér von í svartnættinu ... hehehehhe! Er reyndar virkilega sæl með að vera bara kattakerling með eitt náttborð.

[siggi (IP-tala skráð) 13.10.2008 kl. 08:26]

heil og sæl Frú Gurrí. Enn saknar maður boggunnar, það var svo notalegt að sjá hana sigla út og inn úr Reykjavíkurhöfn, það var svo notalegt að setajst niður úti á dekki og anda að sér sjávarloftinu.

 'Eg tók þá ákvörðun um að horfa ekki á Siflur E, né opna fyrir fréttir í útvarpi né sjónvarpi, maður verður að fá hvíld frá þessu öllusaman ekki satt.

 Við vorum hér 3jú á laugardagskvöld og spáðum í Medicine Cards, þú þekkir þau eftilvill? spilin er komu upp fyrir okkur pesónulega komu upp á hvolfi, en sögu  margt gott, margt til að hugsa um. Síðan drógum við eitt spil fyrir þjóðina og uppkom Björnin, þar segir " The strength of Bear medicine is the power of introspetion. It lies in the west on the great medicine wheel of life. Bear seeks honey, or the sweetness of truth, within the hollow of an old tree. In the winter, when the Ice Queen reings and the face of death is upon the Earth, Bear enters the womb-cave to hibernate, to digest the year´s experience. it is said that our goals reside in the West also. To accomplish the goals and dreams that we carry, the art of intospection is necessary"  sem sagt okkur er hollt að líta innávið og eins og Björnin að draga okkur til hlés, og ekki berja okkur á brjóst útávið í útrás, né hefja okkur uppá stall varðandi aðrar Þjóðir. Það er miklu meir sem þessi gamla Indjánaspeki segir en of langt mál hér, ef þú getur og hefur aðgang að þessum spilum, skoðaðu þau þá.

Kv siggi

Ps ertu farin að búa þér til grautinn?

[Guðríður Hrefna Haraldsdóttir, 13.10.2008 kl. 08:55]

Játa mig lélega, Siggi, á ekki svona spil og hef ekki enn prófað grautinn. Sorrí. Sammála þessu með að hefja okkur ekki upp á svaka stall eða berja okkur á brjóst. Hættum þessu monti, við búum í fínu landi, ekki besta landi í heimi.

[Sigríður Ágústa Þórólfsdóttir, 13.10.2008 kl. 11:07]

Gott að heyra frá þér aftur,saknaði þín um helgina Jóhanna er flott,sá hana í mannamáli í gærkvöldi,mér finnst hún og Björgvin koma lang best frá þessu af ríkisstjórninni,ég held þau nái okkur út úr brimskaflinum