Ósýnileg morgunhjálp og afmælistilhlökkun hafin

Að mörgu leyti er betra að sitja aftar en í fremsta sæti í strætó, sérstaklega þegar það eru hviður á Kjalarnesinu. Eftir nokkra afslappandi, dormandi morgna aftarlega undanfarið stóð ég mig að því að fylgjast grannt með úr fremsta sætinu að ljósin við Hvalfjarðargöngin breyttust örugglega úr rauðu yfir í grænt. Ég hjálpaði líka bílstjóranum heilmikið við að halda strætó á veginum í verstu vindhviðunum með því að gera mig stífa þegar þær skullu á okkur. Ég segi ekki að ég sé mjög þreytt eftir ferðina í bæinn, kannski frekar svolítið uppgefin.

------------------ o O o -----------------

Byrjaði að lesa ansi áhugaverða bók í gær og kíkti aðeins á hana í strætó í morgun áður en hjálpsemin við bílstjórann náði yfirhöndinni. Bókin heitir Móðurlaus Brooklyn og er eftir Jonathan Lethem. Leynilögreglusaga ... en ekki hefðbundin. Sú á eftir að stytta mér stundir, ásamt Potter-restinni, nú um helgina og svo er ég komin í frí fram að afmæli. Ég er farin að undirbúa afmælið í huganum. Ég vona að sem flestir "nánir" bloggvinir mínir mæti, alla vega þeir sem geta keypt almennilega afmælisgjöf handa mér. (djók) Þetta er nú hálfgert stórafmæli ... eða 49 ára. Mér skilst að Jenný Anna ætli örugglega að koma og þá hittumst við í fyrsta skiptið, gaman, gaman. Já, og þetta er ekki konupartí, það kemur alltaf hellingur af sætum körlum, nema Þröstur, hann verður í Danmörku! Þeir sem reykja fá heilt, stórt og flott herbergi fyrir sig, eins og í fyrra, eða bókaherbergið (sjá mynd), og þar sat t.d. Auður Haralds á milli þess sem hún sótti sér tertur og kaffi. Mikið fjör þar, eins og í öllum herbergjum. Jamm, ég er sko farin að hlakka til. Er þó ekki byrjuð á afmælisboðskortinu, ætli ég hringi ekki bara þetta árið og sendi tölvupóst og sms ... geri bara geggjað stórafmælislöglegamiðaldrakort næsta ár.

Athugasemdir

[Jenný Anna Baldursdóttir, 3.8.2007 kl. 09:21]

Við Jóna ætlum að storma í afmælið með rándýra afmælisgjöf.  Segir Cartier þér eitthvað.  Úje

Ég er líka aðstoðarbílstjóri.  Mér finnst það skylda mín, öðrum finnst að ég geti eins sleppt því.

Hm..

[Guðríður Haraldsdóttir, 3.8.2007 kl. 09:26]

Jesssss! Líst á ykkur. Cartier segir mér helling ... múahahahahah! Er byrjuð að baka í huganum!

[Þröstur Unnar, 3.8.2007 kl. 09:35]

Dísús, önnur gleðihelgi á Skaganum. Hvernig verður umhorfs hérna eftir það. Var ekki nóg komið eftir Írsku-dagana?

Þetta verður að fara í umhverfismat.

[Rebbý, 3.8.2007 kl. 09:37]

TIL lukku með 39 árin - nei stóð 49 í blogginu þínu .... hvort skyldi nú vera ritvilla???
Allavega vona að þú sért bara solt af þroskanum sem þú ert búin að safna - þannig sé ég afmælin mín orðið

[Kristín Katla Árnadóttir, 3.8.2007 kl. 09:54]

hvenær áttu aftur afmæli . Gurrí mín ég er búinn að gleyma því .

[Guðríður Haraldsdóttir, 3.8.2007 kl. 09:56]

Þröstur minn, þú getur ekkert rifið kjaft ... þú verður í útlöndum þessa helgi og umhverfisráðuneytið löngu búið að láta taka til þegar þú kemur aftur ...

Rebbý, verður þú ekki líka í útlandinu?

[Svava S. Steinars, 3.8.2007 kl. 10:53]

Verður

[Svava S. Steinars, 3.8.2007 kl. 10:55]

Humm, tölvan vistaði áður en ég gat skrifað meira en eitt orð !  Verður ekki Séð og Heyrt á staðnum í afmælinu, eins og við aðra stórviðburði ?  Þarna verður allt fallega fólkið samankomið  

[Guðríður Haraldsdóttir, 3.8.2007 kl. 11:12]

Hmmm ... Séð og heyrt hefur nú þrisvar mætt sl. ár ... en það var á Hringbrautinga, efast um að þeir nenni á Skagann.

Ætlið þið stórglæsilegu systurnar ekki að mæta?

[Tinna Eiríks (IP-tala skráð) 3.8.2007 kl. 13:40]

Guð minn almáttugur hvað ég tek mig vel út á þessari mynd með bæði sígóið og kaffibollann. Eins og gangandi auglýsing fyrir heilbrigt líferni ;) Þarf ég ekki að endurtaka þetta aftur í ár, hangandi í reykherberginu á endalausri kjaftatörn? :)

[Guðríður Haraldsdóttir, 3.8.2007 kl. 14:41]

Jú, þetta þarftu að endurtaka, Tinna mín, og í þetta skiptið að taka kærastann með til að hann geti verndað þig fyrir undarlegum konum ... annars er engri undarlegri konu boðið í ár, múahahahahahah!

[Tinna Eiríksdóttir (IP-tala skráð) 3.8.2007 kl. 16:41]

Hjúkket maður, ég átti nú bara erfitt með mig þarna í fyrra ;) En sú undarlega setti þó sinn svip á partýið hehehehehe. En við kæróinn mætum á svæðið. Gott að hafa einhvern til að hertaka reykherbergið með mér :)

[Rebbý, 3.8.2007 kl. 19:11]

Jah Gurrí, þú nefnir ekkert hvenær afmælið er svo ég veit ekki alveg hvar í heiminum ég verð - en vona að svæðið verði ekki eins og eftir Írsku dagana því það var skelfilegt umhorfs eftir lopapeysuballið  -  mín kíkti úr borginni sko

[Guðríður Haraldsdóttir, 3.8.2007 kl. 19:23]

Amlið er sunnudaginn 12. ágúst, hefst kl. 16 ... ef fólk fær sykursjokk verða kannski læti, en hér er aldrei brennivín, ekki í afmælinu mínu, never, ever! Kýs frekar góða fermingarveislu með tertum og kaffi. 

[Rebbý, 3.8.2007 kl. 20:44]

ahhh ég rétt missi af kökunum, en fæ kökur daginn eftir því þá kem ég heim með stjúpuna og þá verður afmæliskaffi heima hjá henni.