Matarboð ... og listinn sjálfur

Matarboðið í kvöld var hjá sjöunda besta bloggara landsins, skv. nýjasta Mannlífi. Nú hugsa eflaust margir, úps, var hún hjá Stefáni Pálssyni, Jónasi Kristjánssyni, Agli Helga eða kannski Mengellu? Onei, það var hjá Nönnu, einu sönnu Nönnu Rögnvaldardóttur, þeirri sem gerði þriðja hvern dönskustíl fyrir mig í landsprófi á Króknum í gamla daga og ég má teljast heppin að hafa ekki verið sett í sálfræðimat fyrir bragðið. Alltaf gaman að rugla góða dönskukennara í ríminu.  

Það var þríréttað sem telst ekki til tíðinda á Grettisgötunni, ég hef heyrt af sjörétta veislum þar á bæ, svo ekki sé minnst á Þorláksmessuboðin landsfrægu. Hilda systir segir margt um jólin, enda mikil jólastelpa, og eitt af því er að það komi engin jól nema hafa farið í boðið til Nönnu á Þorláksmessu. Lagt var fínt á borð og ekkert verið að spara silfrið. Fyrst kom einstaklega góður forréttur sem var í hráskinka, grænmeti, furuhnetur og sósa. Aðalréttur var skötuselur og bleikja, steikt með portobellosveppum og borið fram með sætkartöflumús. Í eftirrétt var heimalagaður ís með saftsósu. Maturinn var æðislegur og kvöldstundin mjög skemmtileg kvöldstund. Nanna hló að mér þegar ég fór út á svalir í smók því að ég sogaði að mér í leiðinni andrúmsloftinu í miðbænum. Er komin á þá skoðun að annað hvort vilji ég búa niðri í bæ eða á Akranesi. Sama hamingjan. Nanna tók undir það. Hentugt hvað Nanna býr nálægt Hlemmi svo að ég náði Mosóstrætó (15) á réttum tíma og fannst ekki mjög leiðinlegt þegar ég sá Tomma undir stýri á Skagastrætó, enda varð ferðin heim bara skemmtileg.

Jæja, hér kemur listinn yfir bloggarana, skv. Mannlífi og birt handa þeim sem búa í útlöndum, hinir mega helst ekki lesa.

Bestu bloggararnir:
1. Mengella
2. Stefán Pálsson
3. Jónas Kristjánsson
4. Henry Birgir Gunnarsson (Bolur djöfull)
5. Ármann Jakobsson
6. Eiríkur Örn Norðdal
7. Nanna Rögnvaldardóttir
8. Pétur Gunnarsson
9. Hnakkus
10. Arna Schram

Verstu bloggararnir:
1. Stefán Friðrik Stefánsson
2. Ellý Ármanns
3 Jón Axel Ólafsson
4. Egill Helgason
5. Steingrímur S. Ólafsson
6. Jónína Ben.
7. Björn Ingi Hrafnsson
8. Sóley Tómasdóttir
9. Katrín Anna Guðmundsdóttir
10. Jón Valur Jensson

Þetta er bara hrár listinn, greinin sjálf er upp á fjórar síður.

Ég er ekki sammála öllu þarna, það vantar marga góða bloggara inn á efri listann og nokkrum er ofaukið á hinum.  Vona að ég hafi svalað forvitni útlendinganna minna. Þeir verða að fá að vera með.

Athugasemdir

[Fjóla Æ., 5.9.2007 kl. 22:52]

mmmm frábær matseðill. Þarf að fara að finna tilefni til að halda svona flott matarboð fljótlega. Þarf kannski ekki tilefni?

Þar sem ég er ekki í útlöndu, ekki einu sinni í Vestmannaeyjum ætla ég að láta sem ég hafi ekki séð bloggvinsældalistann úr Mannlífi og sekk mér niður í nýjustu Vikuna.

[Þröstur Unnar, 5.9.2007 kl. 22:54]

Sá ekkert nema matinn, glæsilegt kvöld hjá þér.

En held að það séu 20 prentvillur þarna.

[Jenný Anna Baldursdóttir, 5.9.2007 kl. 22:54]

Ég þekki ekki þetta fólk, mestan part.  Svo finnst mér brjálæðislega fyndið að Bolur skuli vera á bestubloggaralistanum.  Maðurinn fréttabloggaði út í eitt, með stuttum setningum.  ROFL

[Þröstur Unnar, 5.9.2007 kl. 22:55]

Meina í lsitanum sem ég sá ekki.............

[Guðríður Haraldsdóttir, 5.9.2007 kl. 22:56]

Henry Birgir bloggar á Vísisblogginu um íþróttir. Gat ekki stillt mig um að skamma hann óbeint, þetta krútt.

[Jenný Anna Baldursdóttir, 5.9.2007 kl. 22:56]

Vá hvað þetta er girnilegur matur.  Hefði gjarnan viljað gúffa þessu í mig.

[Guðríður Haraldsdóttir, 5.9.2007 kl. 22:59]

Hann var líka ansi góður! Eiginlega alveg rosalega góður! Nanna er snillingur!

[Ólöf Anna , 5.9.2007 kl. 22:59]

mmmm girnilegt.

 Ekki að ég taki það nærri mér hver er á þessum listum en mikið rosalega leiðist mér svona listar.Finnst þeir svo hrokafullir og segja meira um manneskjuna sem skrifar þá og blaðið sem vill birta þá en innihaldið. Finnst þetta ekki góð blaðamennska. Er viss um að greinin er líka yfirborðskennd mundi ekki vekja áhuga minn eða löngun til að lesa þetta þar sem listin er örugglega feitletraður og áberandi líka.

Fúff vona að ég móðgi engan.

[Edda (IP-tala skráð) 5.9.2007 kl. 23:06]

Ég bý í útlöndum og þú og Jens Guð eruð alltaf fyrst á morgunrúntinum, svona ásamt mogganum.  Blæs á alla hina, þið eruð best!

[Katrín Snæhólm Baldursdóttir, 5.9.2007 kl. 23:11]

Asnar að hafa þig ekki þarna með!!! Hvaða snillingar settu saman þennan lista???

Og út frá hverju??? En mikið trú ég að þú hafir notið matarins!!!!! Jummí nammí!!!

[Guðríður Haraldsdóttir, 5.9.2007 kl. 23:19]

Svona listar ... sammála þér Ólöf, það er ákveðinn hroki að setja saman eitthvað svona. Það er líka smekksatriði hvað fólk vill lesa, sum bloggin á óvinsældalistanum fá mjög margar heimsóknir sem segir helling. Tek það fram að ég birti þetta bara fyrir "útlendingana" okkar, þeir hafa ekki kost á því að sjá þetta annars. Ég hef alla tíð óttast að lenda á listum ... t.d. yfir verst klæddu konur landsins, er sem betur fer ekki nógu fræg eða grönn til þess. Ég er trygglynd að eðlisfari og hendi þ.a.l. ekkert fötum sem enn er hægt að ganga í. Undantekning var þó snjóþvegnar gallabuxur einu sinni. 

[Jenný Anna Baldursdóttir, 5.9.2007 kl. 23:25]

Snjóþvegnar, voru þær ekki steinþvegnar?  Dem, er orðið svona langt síðan?

[Magnús Geir Guðmundsson, 5.9.2007 kl. 23:27]

Já, þetta eru asnar Guðjón, eh, ég meina Gurrí!

Um þennan listaleik segi ég annars ekki eitt einasta orð!

En voruð þið vinkonurnar annars að spjalla eitthvað skemmtilegt eða skipuleggja, svona mitt í "Smókum og smjatti"!?

[Hildigunnur Rúnarsdóttir, 5.9.2007 kl. 23:59]

hahaHAHAHA, sjáið þið ekki moggabloggs/ekkimoggabloggsskiptinguna þarna. Djöfull er ég annars (að mestu leyti) sammála þessum listum. Nanna hefði samt mátt vera talsvert ofar.

[Jóna Á. Gísladóttir, 6.9.2007 kl. 00:02]

Ég vil vera á lista Gurrí  Bara any lista. Put me on a lista

[Kristín M. Jóhannsdóttir, 6.9.2007 kl. 00:15]

Takk takk kæra Gurrí. Ég held að Hildigunnur komi með góðan punkt. Það er greinilega skipting þarna.

[Svava S. Steinars, 6.9.2007 kl. 02:35]

Mmmmm, mikið vildi ég að ég þekkti Nönnu Rögnvaldar og gæti komið í Þorláksmessuveisluna.  Öfunda þig líka af þessari veislu.  Yummy ! 

[Gísli Ásgeirsson, 6.9.2007 kl. 07:41]

Svona listar eru álíka marktækir og þeir sem settu þá saman. Persónuleg óvild ræður ferðinni við tilnefningu þeirra verstu.  Ég hef meiri áhuga á að vita hverjir útbjuggu þennan lista.

[www.zordis.com, 6.9.2007 kl. 09:03]

Þetta er nú bara krúttlegt blaðaefni .....   Girnilegt matarboð, eiginlega kvik"YNDISLEG" færsla hjá þér FRÚ Gurrí .....

[Heiða B. Heiðars, 6.9.2007 kl. 13:07]

Mér finnst svona listar svo skemmtilegir! Finnst þessir skemmtilegir og ég er bara ferlega sátt við valið :)

[Hildigunnur Rúnarsdóttir, 6.9.2007 kl. 13:13]

Svava S, farðu bara að lesa Nönnu og kommenta, þá þekkirðu hana nógu vel. Öllum lesendum boðið í þorláksmessuveislu, þannig kynntist ég einmitt Nönnu. (Nema þú lesir ekki út fyrir Moggabloggið : > )

[Ingibjörg Gunnarsdóttir, 6.9.2007 kl. 21:50]

Ég játa mig með "óþroskaðan smekk" - er sek um að lesa blog "lélegu" bloggaranna - en hef aldrei svo mikið sem kíkt á góða listann. Það var gott að einhver benti mér á hvað ég er rugluð....... takk fyrir mig!

[Halla Rut , 6.9.2007 kl. 22:03]

Mér langar ekkert smá í þennan eftirrétt núna, nennir þú ekki að koma með hann?

[Guðríður Haraldsdóttir, 6.9.2007 kl. 22:20]

Ekki málið, Halla Rut!

Þegar ég hef góðan tíma skrepp ég út fyrir Moggalandið og les mörg einstaklega skemmtileg blogg á öðrum blogglendum og verð að segja að það er ekkert mál að kommenta þar. Nennti aldrei að kommenta hjá fólki hjá mbl.blogginu fyrr en ég byrjaði að blogga sjálf, frekar fjandsamlegt kerfi fyrir utangarðsfólk. Að öðru leyti líður mér mjög vel hér, margt frábært fólk með góð blogg. Eiginlega of mörg. Ég er farin að vanrækja sjónvarpið ... og Harry Potter. 

Svona listar geta verið skemmtilegir en oft rætnir þegar talað er um leiðinleg blogg, ég skammast mín ekkert fyrir að segja að ég les blogg margra á vonda listanum mér til yndisauka! Og hana nú! Flissa líka oft yfir Hnakkusi og fannst Mengella fara á kostum í Lúkasarmálinu.