Mánudagskvöld til þriðjudagsmorguns

Mikið var skrýtið og skemmtilegt að gista á höfuðborgarsvæðinu í nótt, hlusta á háværan umferðarniðinn, heyra öskrin í fólki sem ribbaldar voru ábyggilega að misþyrma, sjokkerandi brothljóð í búðagluggum, dúndrandi tónlist, bunuhljóð í laumulegum körlum og æsispennandi sírenuhljóð. Lyktin var líka framandi; krydd, olía, vín, tóbak, piss, reiði, popp og fleira.

Sagði við Hildu þegar við ókum niður að Galtalindinni hennar að það væri munur fyrir hana að hafa stærsta hús landsins svona nálægt en sá turn er í byggingu í næsta nágrenni hennar. Ef það yrði sprengt í loft upp af morðóðum múslimum (sorrí, Shabana) eða vondafólkinu í Veginum (sorrí, Jónas frændi) eða klikkuðum kaþólikkum (sorrí, erfðaprins) þá hefði hún þetta líka fína útsýni.

Til að fyrirbyggja allan misskilning þá elska ég líka sjávarnið, brimgný og fuglagarg (þótt Jónatan mávur hafi yfirgefið mig).

Ég gisti sem sagt í Kópavoginum í nótt en ferðaðist aðeins um sjálfa höfuðborgina í morgun, 101 Reykjavík, og fannst það unaðslegt. Er búin að átta mig á því að þótt ég vinni í Reykjavík þá er 110 Reykjavík enn meira utanbæjar en nokkurn tíma 300 Akranes. Á Skaganum eru tvö kaffihús, hér í 110 Reykjavík er ekki neitt (held ég).  

Mikið nýt ég borgarinnar betur eftir að ég varð dreifbýlistútta. Hlakka samt gífurlega til að fara heim eftir vinnu og hitta Kubb, Tomma og Jónas. Inga kíkir á eftir og hótaði því að sleppa mér ekki út úr bílnum fyrr en við himnaríki, í þetta sinn ætlar hún að þiggja kaffi.

Athugasemdir

[Glúmur Gylfason (IP-tala skráð) 25.9.2007 kl. 14:30]

*****

[Guðríður Haraldsdóttir, 25.9.2007 kl. 14:32]

Vil bæta því við að ég er ekkert fúl út í stóra turninn í Kópavogi, á meðan hann verður ekki hærri en sementsstrompurinn minn.

[Glúmur Gylfason (IP-tala skráð) 25.9.2007 kl. 14:41]

Þessar konur hérna tala bara um turna og strompa. (Freud)

[Guðríður Haraldsdóttir, 25.9.2007 kl. 15:14]

Hmmmm, satt segir þú Glúmur. Við erum nú meiri "dömurnar." Best að fara í smá sjálfskoðun ...

Guðmundur, ekki dissa Kópavog ... hún Hilda verður alveg brjáluð!!! Ekki samt gleyma Salnum, þar fer nú aldeilis fram menningarleg starfsemi.

[Glúmur Gylfason (IP-tala skráð) 25.9.2007 kl. 15:53]

Var ekki að kvarta.

[Guðríður Haraldsdóttir, 25.9.2007 kl. 15:54]

Það er örugglega best að búa í Kópavogi ...

[krossgata, 25.9.2007 kl. 16:10]

Æsispennandi stórborgarupplifun.  En hér í rólegheitunum við ystu mörk borgarinnar í Breiðholtinu horfi ég út um stofugluggann á gufustróka rísa frá Hellisheiðinni, fjallahringinn og hlusta á fuglasöng.  Gerist ekki sveitarómantískara. 

[Jenný Anna Baldursdóttir, 25.9.2007 kl. 17:22]

Vá ég er greinilega að missa af helling hér í 109, hér mígur ekki sála utandyra, engin partý haldin, né er fólk úti eftir átta á kvöldin.  Er enn að jafna mig eftir langa búsetu í 101.

Smjúts á þig.

[Lindablinda (IP-tala skráð) 25.9.2007 kl. 17:34]

Blásteinn kona, Blásteinn

[Lesandi (IP-tala skráð) 25.9.2007 kl. 18:20]

Bakarískaffið kona, Bakarískaffið, við hliðina á Bónus, í versl.miðstöðinni Ásnum.

[Oddný Sigurbergs (IP-tala skráð) 26.9.2007 kl. 11:02]

Hvaða vitleysa er þetta. Það eru amk 3 ef ekki 4 kaffihús í 110 :)

[Hjördís G. (IP-tala skráð) 26.9.2007 kl. 16:18]

Guðmundur þú ert að misskilja þetta. Akranes er ekki á stór höfuðborgarsvæðinu - heldur er höfuðborgin (og úthverfi) á stór Akranessvæðinu.....