Langsóttur brandari og leiftur úr boldi síðustu viku

Sofnaði bjánalega snemma í gærkvöldi og uppskar enn hallærislegri fótaferðatíma. Líklega verð ég að horfast í augu við að það gengur ekki nógu vel að vera B-manneskja um helgar, eins og ég hef reynt. Ég veit aldrei hvað ég á af mér að gera svona árla morguns, eða 10. Latte og spennubók komu þó sterkt inn.

Mig langar að leiðrétta ákveðinn „brandara“ sem kom fram í Útsvari og var svo langsóttur að það skildi hann enginn nema ég. Dúa dásamlega leyfir bloggvinum sínum nú ekki að gera sig að fíflum þegjandi og hljóðalaust og sagði það sem allir hugsa ...
Þegar spurt var um Gleypni vissi ég ekki svarið, það var alla vega vel geymt inni í afkimum heilans. Máni hvíslaði að okkur að hann héldi að þetta væri Glitnir (eða það heyrðist mér). Ég kannaðist alls ekki við neinn Glitni og hugsaði með mér að það væri bjánalegt að láta virðulegan banka bera nafn fjöturs (skiljanlegra með bílalánsfyrirtæki). Svo kom Vífill símavinur í símann og sagði hátt og skýrt: Gleypnir! Aha, hugsaði ég ... alveg rétt, mundi þá eftir þessu þótt ég hefði ekki getað unnið mér það til lífs að gera það fyrr! Jamm, maður skyldi aldrei reyna að fara í brandarakeppni við alvörufyndið fólk (eins og Ragnhildi). Tek það fram að þetta er ekki í fyrsta sinn sem ég segi brandara sem enginn skilur, ég reyni jafnvel af alefli að útskýra þá þegar fólk starir hissa á mig ... en án árangurs. Vildi sem sagt að þetta kæmi fram, ég vissi ekki svarið ... en er ekki heyrnarlaus!

Heilmargt hefur gerst hjá þeim bólgnu og bráðfallegu. Ungi læknirinn hennar Feliciu er bróðir Hectors, brunakarlsins hennar Taylor! Læknirinn mætir með Hector í grillpartí og hittir Forrester-fólkið. Bróðir hans spyr spurninga um dularfulla sjúkling læknisins og það fyrir framan fólkið sem syrgir Feliciu og veit ekki sannleikann. Sannarlega æsandi fyrir sjónvarpsáhorfendur sem vita allt um málið. Bridget, alveg að springa úr hamingju, sækir Dino litla (minnir að hann sé kallaður það núna) og hefur nokkur orð um hvað hún sé hamingjusöm með þetta barn. Þegar hún kemur með orminn sér læknirinn sér til mikillar skelfingar að þetta er Dominic, barnið sem sat við sjúkrabeð móður sinnar og varð til þess að lífsviljinn kviknaði hjá mömmunni sem lá í kóma. Jamm, fólk deyr greinlega bara úr skorti á lífsvilja. Hann drífur sig á brott, alveg í sjokki, og fer að sjúkrabeði Feliciu. Hann segir Stefaníu (mömmu Feliciu) frá þessu og að það sé rangt að segja ættingjunum ekki að hún sé enn á lífi (hún lifnaði við í sjúkrabílnum). Að þessu sinni telur læknirinn rétt að tala, áður sagði hann Stebbu að það borgaði sig ekki að segja neitt. Stefanía heldur að  það borgi sig ekki að segja neitt strax til að láta fólkið ekki ganga í gegnum sorgina oll óver agen ... ef hún deyr sko.

Ridge er brjálaður út í Nick, hálfbróður sinn, og hefur fengið föður þeirra beggja, Massimo, í lið með sér. Massimo finnst að Brooke eigi að vera gift Ridge, þar sem þau eiga RJ litla saman, og heldur með eldri syninum sem hann vissi reyndar ekki af fyrstu c.a. 48 ár Ridge. Jamm, Ridge er fæddur 1952, alla vega leikarinn. Nú eru Nick og Brooke stödd á eyju, fóru á skútunni og tóku Hope litlu og RJ litla með. Ég fór að slefa úr leiðindum þegar Nick sýndi hvað hann er ofboðslega góður maður með því að syngja og spila á gítar fyrir börnin, það var skelfilegt, hræðilegt ... Eitt verð ég að segja. Hann Dominic litli horfir stundum í myndavélina, brosir út í loftið og þýðist illa meinta foreldra sína og ættingja. Það hlýtur að vera hægt að finna annað átta mánaða gamalt barn sem leikur betur.
Svo missti ég af boldinu á föstudaginn vegna anna, sorrí. Held þó að ekkert markvert hafi gerst sem ekki er hægt að vinna upp í komandi viku.

Athugasemdir

[Bryndís R (IP-tala skráð) 13.1.2008 kl. 14:32]

Ég er ekki með Stöð 2 en ég held að ég geti bara fylgst með Boldinu í gegnum bloggið þitt í staðinn

[Linda Linnet Hilmarsdóttir, 13.1.2008 kl. 14:39]

kvitt-búin að lesa

[Þorsteinn Ingimarsson (IP-tala skráð) 13.1.2008 kl. 15:23]

Hvað er B -manneskja  ?

[Guðríður Haraldsdóttir, 13.1.2008 kl. 15:34]

B-manneskja fer seint að sofa og vaknar seint, öfugt við A-manneskju. Virka daga er ég A, vakna ég upp úr kl. 6 og fer yfirleitt að sofa fyrir miðnætti ... nýt þess svo í tætlur að vera óþekk B-manneskja um helgar en það tókst ekki í gærkvöldi. Kannski sem betur fer ... stundum erfitt að snúa þessu við á mánudagsmorgnum.

[Ásdís Sigurðardóttir, 13.1.2008 kl. 16:39]

ÉG er B-manneskja, hef alltaf verið það og ætla alltaf að vera það.  Samt sem áður hef ég svo mikla sjálfsstjórn að þegar ég þarf og á að vakna fer ég á fætur þó svo að um miðja nótt sé og svo legg ég mig bara þegar ég get.  T.d. ef ég þarf til læknis eða eitthvað mjööög snemma dags t.d. 10 :):)  þá legg ég mig aftur þegar ég kem heim og tekur bar korter að sofna. Þegar ég vakna svo eftir það er ég búin að tvínýta daginn, þannig að sumar vikur hjá mér innihalda 10 daga.  Þú ert yndisleg með þinn húmor svo má ekki gleyma því að þú varst lang fallegust þetta kvöld.   

[Guðrún Jóhannesdóttir, 13.1.2008 kl. 16:51]

[jensen (IP-tala skráð) 13.1.2008 kl. 21:33]

Manstu nokkuð hvað gerðist í Bold-þætti númer 1542,vantar endilega að vita það.

[Guðríður Haraldsdóttir, 13.1.2008 kl. 22:24]

Hoppaðu, Jensen!!! Þú veist að ég fórna mér algjörlega fyrir bloggvinina og horfi á þessa þætti með hryllingi og skelfingu! Skrifa um þátt 1542 fljótlega fyrst þú baðst um það, þú veist að ég geri allt fyrir my blogfriends ...

[Jensen (IP-tala skráð) 14.1.2008 kl. 20:54]

Veistu það Gurrí,að þú ert bara YNDISLEG.Ég meina það.