Kaldranalegheit, björgun og sölumannsstríð vegna stóls ...

Fremur kaldranalegt var að koma út í morgun en mun kaldranalegra hefur verið að koma út í Kaldrananesi í Kaldrananeshreppi, ég huggaði mig við það. Ekki lagaðist veðrið á leiðinni með Gumma í strætó, heldur versnaði, nú fór þetta hvíta að fjúka um allt, næstum því í skafrenning.

Engin Erla var í strætó svo að ég ákvað að taka 15 alla leið í Ártún hoppa niður (milljóntröppur), upp (lúmsku brekkuna) og taka leið 18 í vinnuna. Bílstjórinn á 18 var mjög laglegur en ekki sérlega gáfaður ... hann ók framhjá stoppistöðinni minni  án nokkurrar miskunnar og samt var ég búin að hringja og alla vega þrír aðrir voru staðnir upp, héldu í stöngina og biðu eftir að komast út. Strætó hélt bara áfram að keyra og keyra ... Þegar hann loksins stoppaði, eftir að við grátbáðum hann um það, vorum við komin svo langt upp í sveit að gangstéttirnar þar eru aldrei mokaðar. Við gengum því nokkur saman, steinþegjandi og kúl, á götunni áleiðis að vinnunni. Bíll sem kom á móti okkur tók stóran sveig, þessi elska, en næsti bíll (jeppi) neitaði að færa sig og nú voru góð ráð dýr. Ekki var sjéns að komast upp á gangstéttina akkúrat þarna en ungi maðurinn sem gekk aðeins fyrir aftan mig hafði haft vit á því að fara upp á hana á betri stað, aðeins fyrr. Hann sá vandræði minn, hættulega jeppann sem nálgaðist skjótt og grimmdarlega, rétti hönd sína út á götuna og ég gat vippað mér upp á gangstétt. Það var svo hált að ég hefði ekki komist upp, líklega bara runnið undir grimma jeppann, þessu nema taka í styrka hönd ... herramannsins unga sem ég tók eftir að er greinilega samstarfsmaður minn þar sem hann gekk inn um sömu dyr og ég. 

Svo er spáð vitlausu veðri seinnipartinn eða í kvöld. Það er ekkert lát á ævintýrunum! Það var svo ekki allt búið enn, kvöldsölumaðurinn kvikindislegri var búinn að leggja fyrir mig lævíslega gildru og breyta stólnum svo mikið að það hefði orðið mitt síðasta ef ég hefði sest í hann. Mér tókst að laga stólinn og og bjarga þannig lífi mínu og gladdist líka yfir að þurfa ekki að skríða undir borð eftir inniskónum. Tókst að teygja vel á fótunum og smokra þeim nær skónum og það tók ekki nema fimm mínútur. Á morgun þori ég ekki annað en að leita eftir teiknibólum, handsprengjum og slíku. Þetta er stríð, gott fólk!

Athugasemdir

[Ásdís Sigurðardóttir, 27.2.2008 kl. 11:13]

Teiknibólubelti það er málið. Einar verður að redda slíku fyrir morgundaginn, annars legg ég enn fram þá tillögu að þetta sé og verði þinn einkastóll, söludýrið getur bara setið á koll.  Vona að það gangi vel heim í kvöld, og svo með þennan bílstjóra á strætó, sannas alveg "bjútí nó brein"  eigðu ljúfan dag.   

[Arafat í sparifötunum, 27.2.2008 kl. 11:16]

Takk fyrir síðastþú eignaðist aldeilis aðdáanda í gær. Hún ætlaði sko að segja öllum á leikskólanum frá góðu Gurrý sem á Tomma.

Ég myndi fara í góða hriðirinn fá síma á slikk og setja svo harpix á símann. Það kvöld límist allt við hann.

[Lára Hanna Einarsdóttir, 27.2.2008 kl. 11:16]

Í fyrrakvöld hringdi í mig ungur maður frá Birtingi til að selja mér áskrift af nýju tímariti. Ég var komin á fremsta hlunn með að spyrja hann hvort það væri hann sem sæti í stólnum hennar Gurríar og hóta honum öllu illu ef hann hætti ekki að breyta stillingum og sparka inniskónum hennar út í hafsauga. Glætan að ég keypti áskrift af slíkum skemmdarvargi.

En þar sem ég hafði ekki haft tóm til að kynna mér tímaritið urðum við ásátt um að hann hringdi aftur seinna. Kannski hef ég uppi hótanir þá, hver veit... 

[Guðríður Haraldsdóttir, 27.2.2008 kl. 11:21]

Heheheh, þið eruð svo miklir snillingar!

[Helga Magnúsdóttir (IP-tala skráð) 27.2.2008 kl. 11:43]

Hæ. Ég verð á kvöldvakt í næstu viku. Er ekki bara gráupplagt að ég tölti yfir og taki ærlega í lurginn á bannsettum sölumanninum?

[Guðríður Haraldsdóttir, 27.2.2008 kl. 12:01]

Jú, og spyrjir hann hvort hann hafi virkilega verið að krassa á borðið mitt með penna (og á útprentaða grein) og snúi upp á símasnúruna mína, hafi tekið niður myndina af Jason Statham sem ég hafði hengt aftan á tölvuna hennar Bjarkar svo ég hefði eitthvað fallegt að horfa á þegar ég hugsa ... Glæpir hans eru úthugsaðir og afar kvikindislegir. Jú, taktu hann í gegn, krakkarassgatið!!!

[Vera Knútsdóttir, 27.2.2008 kl. 13:02]

Ég legg til að þú skiljir eftir "fallegt" hótunarbréf á skrifborðinu núna seinnipart dags. Svona til að sýna honum að þetta gangi ekki lengur og að tekið verði til harðra aðgerða ef að hann fer ekki að kröfum þínum

[Guðríður Haraldsdóttir, 27.2.2008 kl. 13:35]

Frábær hugmynd. Fyrri bréf mín hafa verið of vingjarnleg! Nú hóta ég að slíta handleggina af og svona ... múahahahha

[Brynja skordal, 27.2.2008 kl. 13:40]

Fallegt gluggaveður á skaganum í dag góða ferð heim

[Oddný (IP-tala skráð) 27.2.2008 kl. 13:42]

Leggðu á hann álög, þess efnis að hann fái flær þúsund kameldýra en handleggir hans verði svo stuttir að hann geti ekki klórað sér!

[Guðrún Jóhannesdóttir, 27.2.2008 kl. 13:51]

aldeilis óborganlegar ráðleggingarnar sem þú færð hér Gurrí ætla ekkert að leggja inn nema góða kveðju til þín og ósk um að veðrið verði jafn gott í kvöld þegar þú átt heimferð eins og það er hérna núna, SÓLKSIN

[Sigga (IP-tala skráð) 27.2.2008 kl. 14:19]

Fyrirfinnst ekki stóll í þessu fyrirtæki sem er kominn til ára sinna og er ekki notaður?   Þú ættir að athuga það og fá að setja þann stól við borðið þitt á kvöldin og koma þínum stól fyrir á góðum stað þar sem hann fær að vera í friði.  Svo má skreyta stólinn með títuprjónum og teiknibólum og öðru tilheyrandi.  Svo þegar þú mætir á morgnana þá bara dregurðu þinn stól með þínum stillingum úr felustaðnum og geymir draslstólinn annarrstaðar þar sem hann er ekki fyrir.  Það er nú ýmislegt leggjandi á sig til að fá að hafa stólinn sinn í friði.

[Linda Linnet Hilmarsdóttir, 27.2.2008 kl. 14:30]

Innlitskvitt og kveðjur

[Helga Magnúsdóttir, 27.2.2008 kl. 14:54]

Ók, hann fær að finna fyrir því í næstu viku. Byrja vitanlega á að segja honum að ég hafi verið rekin úr lögreglunni fyrir hrottaskap. Það ætti að hræða hann aðeins.

[Birna Dis Vilbertsdóttir (IP-tala skráð) 27.2.2008 kl. 15:04]

 

[Guðríður Haraldsdóttir, 27.2.2008 kl. 15:12]

Hahhahaha, rekin úr löggunni vegna hrottaskapar, það finnst ekki dásamlegri manneskja. Hahahahhaha, sammála, ljúgum að gæanum samt!  Ætla að prófa að skipta um stól, það er góð hugmynd.

[Kristín Katla Árnadóttir, 27.2.2008 kl. 16:53]

Kveðja til þín Gurrí mín

[Magnús Geir Guðmundsson, 27.2.2008 kl. 17:20]

´Hmmm, mér sýnist nú á góðri leið sé að koma efniviður í sakamálaleikritið "Sölumaður deyr 2"! höfundur þess fyrra var Arthur Miller, en þess nýja Gurrie Killer!

(en svo öllu sé nú til skila haldið fyrir þá sem ekki þekkja, þá var fyrrnefnda leikritið ekkert sakamálaleikrit, heldur svona fjölskyldudrama!)

[Magnús Geir Guðmundsson, 27.2.2008 kl. 17:25]

Og já, mér finnst það nú ekkert svo slæmt þótt Helga hérna (sem einhver laumaði að mér að væri tröllvaxin, en jafnframt tíguleg kvinna) hafi verið rekin úr löggunni fyrir harðneskju. Væri öllu verra ef hún hefði fengið reisupassan fyrir já tja, "Berari" sakir, eins og þessi ungverska þarna sem Moggin sagði frá í gær!

[Tiger, 27.2.2008 kl. 20:43]

   Jamm, mér líst vel á hugmyndina um að skipta um stól. Er viss um að það mun virka vel. Byssudæmi og sakamáladæmi eða teiknibólur eru bara til að skapa meiri vandamál sko... hehehe.

  Ef stólaskipti ganga ekki upp - skal ég koma með baseball dótið mitt og lána þér...

[www.zordis.com, 27.2.2008 kl. 22:06]

Það er almennilegt veður hjá ykkur!  Vona að baráttan með stólinn gangi vel.  Límið er grimmdarleið því þá hittir þú viðkomandi á snúrunni undir morgun ....

[Anna Ólafsdóttir Björnsson, 28.2.2008 kl. 00:31]

Þetta veður, þessi vetur!