Strætóbílstjórahvíslarinn

Golan var ansi köld í morgun og minnstu munaði að það væri tveggja trefla veður. Gummi bílstjóri brosti sætt þegar ég steig upp í vagninn. Úti á stoppistöð var Lilja, dóttir mannsins sem býr fyrir neðan mig, við settumst saman og okkur tókst að spjalla með smáblundum alla leið í bæinn. Mikið held ég að hún vinni á skemmtilegum vinnustað, liðið hennar sigraði í Apprentice-keppni og einn dómarinn var með Donald Trump-hárkollu til að gera þetta skemmtilegra. Bílstjórinn á leið 15 brosti líka sætt til mín, eins og Gummi. Þegar ég skalf úr kulda í golunni í Ártúni hlýnaði mér hratt um hjartarætur þar sem bílstjórinn á 18 var alveg jafnbrosmildur og hinir tveir. Stundum held ég að ég sé svona strætóbílstjórahvíslari.

Sæti, ljóshærði, ungi maðurinn, sem segir frá skrýtnum hlutum úr Skakka turninum í þættinum Svalbarða á SkjáEinum, er yfirleitt samferðamaður minn í leið 18. Við höfum sameinast um að elta íþróttaþáttaþýðandann af Stöð 2 því sá er með kort. Núna í morgun þurftum við ljóshærði (en samt ágæti) maður að leggja lykkju á leið okkar til að komast í vinnuna þar sem þýðandinn var hvergi sjáanlegur. Ég vissi að þetta gæti gerst ef ég fengi ekki kort og nú rættist martröð mín.

Haffi Haff hóf störf hjá Vikunni í morgun. Ekki leiðinlegt! Hann mun sjá um allt sem viðkemur tísku og útliti, þessi elska. Sjá næsta Séð og heyrt ...

Athugasemdir

[Helga Magnúsdóttir, 21.4.2008 kl. 10:45]

Ég verð þreytt og mér verður kalt þegar ég les þessar strætósögur. Samt eru þær alveg yndislega skemmtilegar.

[Jenný Anna Baldursdóttir, 21.4.2008 kl. 11:29]

Hver er Haffi Haff?  Það tala allir um þennan mann eins og fjölskylduvin.  Af hverju er ég að missa?

[Guðríður Hrefna Haraldsdóttir, 21.4.2008 kl. 11:37]

Hehhehe, fjölskylduvinur ... hann er rosalega vinsæll, börn alveg dýrka hann. Hann tók m.a. þátt í Laugardagslögunum (undirbúningi Evróvisjón), og komst ansi langt. Hann er förðunarfræðingur og farðaði t.d. í Bandið hans Bubba.

[Ásdís Sigurðardóttir, 21.4.2008 kl. 13:34]

Góðan daginn glaða kona.  Ég átt eftir  5 tíma svefn þegar þú varst komin í strætó, misjafn skipt svefntíma kvenna.  Eigðu ljúfa vinnuviku mín kæra.    

[Guðmundur G. Hreiðarsson (IP-tala skráð) 21.4.2008 kl. 15:40]

"Töffari, strætóstjórarnir allir,

Stínu, á rósrauðröndóttu

mjaðmasíðbuxunum kannast við.

Og fram í hangir hún pískrandi,

pipruðum Pálínum steingervist

heilagri meitlaþykkjunni svipmótið".

                           {höf. Megas}.

[Katrín Snæhólm Baldursdóttir, 21.4.2008 kl. 17:14]

Jiiiii ertu að fara að vinna með Haffa sem lét mig lesa bókina The Giver??? Magnað...biddu hann um að kenna okkur kerlunum einhver töfraráð sem gera okkur yndisfríðar í skjannahvítri dagsbirtu....engar svona kertaljósa farðanir takk!!!

Já Gurrí þú ert örugglega svona strætóbílstjórahvíslari...

[Marilyn, 21.4.2008 kl. 17:53]

Styð síðustu athugasemd og reyndar finnst mér að allir dagar á Birtíngi ættu að byrja eins og hjá ykkur vikustelpum í morgun; með léttri förðun frá Haffa Haff. Very nice!