Stór brjóst úr tísku - uppnám í himnaríki

26.4.2008 | 16:42

Stór brjóst úr tísku - uppnám í himnaríki

Mikið var gaman á Safnasvæðinu í dag. Fjöldi skemmtilegs fólks var á staðnum, bæði að selja og kaupa. Stoppaði smástund við básinn hjá Hrönn Eggerts listakonu en einhvern daginn á ég eftir að kaupa mynd eftir hana. Ég fékk meira að segja koss á kinnina frá myndarlegum skólabróður úr barnaskóla. Það var sem smyrsl á sárin eftir eina búðarkonuna sem tilkynnti mér upp úr þurru að hún ætti svona flottheit í x-large. Við, þessar brjóstgóðu, lendum oft í þessu, enda erum við jússulegri en aðrar konur þótt við séum ekki endilega þyngri. Það kemur alveg fyrir að mig langi til að hringja í Pamelu Anderson og Dolly Parton og stofna hagsmunafélag brjóstgóðra með þeim. Þetta var svona til að kóróna það sem ég sá í Fréttablaðinu eða 24 stundum í gær að stór brjóst væru úti (out). Nokkur ráð voru gefin til að klæða af sér „ógeðið“, t.d. aldrei vera í rúllukragabol, bara V-hálsmálsbol. Þyrfti að endurnýja fataskápinn þar sem úir og grúir af alla vega þremur siðsamlegum rúllukragabolum. Í greininni var líka bent á samfellur úr Lífstykkjabúðinni sem krumpa saman spiki og brjóstum og gera konur örmjóar (sjúr). Svona samfellu eins og ég keypti um árið á laugardegi á leið í brúðkaup og konan í búðinni reyndi að selja mér afar stórar síamstvíburahúfur sem brjóstahaldara. Henni þótti ekki leiðara en það að hafa skjátlast svona með stærðina að hún reyndi að pranga inn á mig risastórri samfellu sem hefði passað á tvær Gurríar. Þá fauk nú svolítið í mína. Keypti reyndar samfelluandskotann en í talsvert minna númeri en nota hann svo aldrei af því að hann er samt of stór á mig. Hefndi mín grimmilega með því að fara aldrei í Lífstykkjabúðina framar. Viðmót fólks og almennir mannasiðir skipta mig meira máli en vöruúrval, held ég. Brúðhjónin Andrés og Auðna hafa sitt af hverju á samviskunni ...

Veðrið reyndist ekki jafnslæmt og ég hélt og var bara notalegt að smakka á heilgrilluðu lambi á hlaðinu og kaupa eins og eina bók í annars yfirfullt bókahimnaríkið. Nokkur biðröð var í spádómana hjá Magnúsardætrum, Nínu og Möggu, en einn bróðir þeirra var grillmeistarinn á staðnum. Ég styrkti Kvennakórinn um marga, marga hundraðkalla og það verður ekki síst mér að þakka að kerlurnar komast í kórferðalag til útlanda ... en einnig lagði ég mitt af mörkum (500 kall) til að koma KFUM úr landi.

Svo var Hilda systir að hringja, hún er á leiðinni með fullan bíl af mömmu, Ellen og börnum og ætlar á Safnasvæðið. Hún vonast til að hitta mig þar eða í Skrúðgarðinum. Mig langar mest af öllu að leggja mig ... enda útvinda eftir móðganir og kossa. Hún var að hringja aftur og ég ætla í bíltúr með henni og mála bæinn rauðan. Held það nú.

Flokkur: Bloggar | Facebook

Athugasemdir

Hrikalegt fjör er þetta hjá þér,brjóstgóða kona!

Bestustu kveðjurnar til þín og ekki seinna vænna en að bjóða þér gleðilegs sumars!

www.zordis.com, 26.4.2008 kl. 17:10

Hahaha-góður yndislegur þessi pistillþú ert nú ótrúleg en svo yndislegtakk fyrir mig og já veðrið er æðislegtalla vega hjá mér ég og minn maður ásamt börnum og köttum erum að Grilla yndislegan mat og bara yndislegt og gaman að vera tilÁstarkveðjur og´góða helgi

Linda Linnet Hilmarsdóttir, 26.4.2008 kl. 17:15

Þú drepur mig vúman.

Hvaða viðbjóðslega mynd er þetta af konunni með bobbingana? Ekki er þetta alvöru?

Ef stórar brjóllur eru úti þá hlýt ég að vera á leiðinni að verða tískufenómen.

Hm.. vandlifað.

Knús

Jenný Anna Baldursdóttir, 26.4.2008 kl. 19:24

Jamm, tískan fer í hringi, ég verð inni aftur eftir nokkur ár.

Guðríður Haraldsdóttir, 26.4.2008 kl. 19:34

hahaha, þú getur já verið skemmtileg! Hef samt afskaplega litlar áhyggjur af stöðu þinni gagnvart brjóstastærðarvísitölunniog Gurrí, konur af ýmsum brjóstgæðastærðum eru oftar en ekki miklu meira spennandi í rúllukragapeysum en v-hálsmálsbolum!

Eða mig minnir það!

Magnús Geir Guðmundsson, 26.4.2008 kl. 20:52

Ég verð nú bara ánægð með mig og mitt bú (þó ég sé oft á leiðinni í minnkun, en hætti jafnharðan við...) þegar ég sé þessa til hægri. Jemundur eini, beini. Hlýtur að þurfa netbelgi, axlabönd, belti og fleiri hjálpartæki.