Fullkomið kvöld í góðum félagsskap

5.10.2008 | 01:25

Fullkomið kvöld í góðum félagsskap

Hrikalega var gaman í kvöld. Gömlu skóla-félagarnir hafa ekkert breyst, eru alveg jafnsætir og í gamla daga. Algjör heppni að einn jafnaldri okkar, Nonni, er safnstjóri á Safnasvæðinu og þar héldum við okkur allan tímann. Fyrst í Stúkuhúsinu sem er í upprunalegri mynd en var flutt á safnasvæðið, mjög flott hús. Þar átti ég góða tíma í barnæsku og lofaði að snerta hvorki áfengi né tóbak. Ég stóð við það til 13 ára aldurs, enda flutt af Skaganum þá. Við fengum fínar veitingar, meira að segja sushi, og hámuðum í okkur góðgerðir, klukkan bara rúmlega fimm og langt í matinn sjálfan.

Við vorum dregin í stuttan göngutúr í gegnum kirkjugarðinn að turninum sem S. Heiðar hélt í gamla daga að væri kirkjuturn nema kirkjan hefði sokkið og væri neðanjarðar. Við hlógum illgirnislega að þessum barnaskap hans þangað til við mundum að hann er umsvifamikill í fjármálabransanum.

Svo settumst við niður í sal Steinasafnsins og við borðfélagarnir vorum sannarlega ekki af verri endanum. Stjarneðlisfræðingur, bankastjóri, búðareigandi, bæjarfulltrúi og blaðamaður. Í tónlistargetrauninni seinna um kvöldið lentum við í 2. sæti, snillingarnir, helvítið hann Bjöggi Halldórs eyðilagði allt fyrir okkur, það var nefnilega ekki nóg að nefna Björgvin sem flytjanda, heldur HLH, Brimkló eða Lónlí blú bojs. Samt flott hjá okkur að ná svona góðum árangri og fyllibytturnar á þarnæsta borði fengu rauðvínsflöskuna sem var í verðlaun.

Magadansmær kom og tók einn flottan dans og kenndi nokkrum úr hópnum mjaðmahnykkina góðu.Ýmsir sýndu ótrúlega glæsileg tilþrif þar.

Við vorum nokkur valin til að leika í Öskubusku og ég var prinsinn fagri. Stjúpsystir Öskubusku sló eftirminnilega í gegn (Halli bæjarfulltrúi) og ég á nokkrar myndir af honum sem ég ætla að nota í fjárkúgunarskyni. Hann er með bláu slæðuna á myndinni hérna rétt fyrir neðan. Hann neitaði að skila skónum af Öskubusku (Gulla) og leikritið var í mikilli hættu um tíma. Hann var alveg bráðfyndinn og stórskemmtilegur, þessi elska.

Gulli sleit dagskránni og fólk bjó sig undir að fara að dansa. Ég laumaðist í símann og bað erfðaprinsinn að sækja mig. Ég dansa bara við eitt lag í heimi, Luftgitar með Johnny Triumph og Sykurmolunum, og mér fannst ólíklegt að það væri til, alveg eins gott að fara bara heim og horfa á Lord of the Rings III. Ég kvaddi bara Gulla, sessunaut minn, við vitum hvernig það er þegar fólk reynir að kveðja alla á svona hittingi. Veit bara ekki hvað hefði getað gert ef einhverjum af skólafélögunum hefði dottið sú fásinna í hug að bjóða mér upp, það hefði verið hræðilegt!!!

Frábært árgangsmót, mun skemmtilegra og betur heppnað en síðast og maturinn frá Galito var algjört afbragð. Allir kláruðu hverja ögn af diskunum sínum. Humar í forrétt, kjötþrenna í aðalrétt og súkkulaðikaka með ís í eftirmat. Kaffið var veiki hlekkurinn en maður er svo sem vanur því, mikið lagt í allt ... nema kaffið sem er samt svo stórt atriði, hehehhe. Galito ber held ég enga ábyrgð á því. Næsta árgangsmót verður eftir fimm ár og ný þriggja manna nefnd var skipuð. Nú stefnum við að því að fá enn fleiri en 35! Óli kom alla leið frá Danmörku til að vera með okkur, Helgi og Guðlaug frá Akureyri, einn frá Ísafirði og margir frá höfuðborgarsvæðinu. Mikið er maður annars ríkur að þekkja svona gott og skemmtilegt fólk.

Flokkur: Bloggar | Facebook

Athugasemdir

gleðilegt að þú skemmtir þér konnglega vel í kvöld með skólafélögum þínum.

Eigðu góðan sunnudag :)

Aprílrós, 5.10.2008 kl. 02:10

Yndisleg frásögn. Þú ert dúlla.

Jenný Anna Baldursdóttir, 5.10.2008 kl. 08:37

Stórskemmtileg frásögn.

Sesselja Fjóla Þorsteinsdóttir, 5.10.2008 kl. 11:40

Sæl Gurrý.

Ég vil þakka þér fyrir kvöldið, þetta var frábær skemmtun í alla staði. Halli fór algerlaga á kostum og eins og þú segir algerlaga fullkomin hittingur. Sjáumst í grillinu næsta sumar. TAKK FYRIR

Einar Vignir Einarsson, 5.10.2008 kl. 13:16

Innlitskvitt .... og já þú skrifar alltaf jafn skemmtilega :)

Hólmgeir Karlsson, 5.10.2008 kl. 15:29

Sé þarna fullt af snillingum, nefni nafna minn búggí sem hefur farið á kostum sem og stjarneðlisfræðinginn Gulla og Nonna Allans safnvörð, ekki síst þær tvíbursystur af Stað, kveðja að norðan, Halli

Haraldur Bjarnason, 5.10.2008 kl. 19:46