Algjört bold

Þetta sagði völva Vikunnar m.a. um síðustu áramót:

„Fjármálakreppa er fram undan á Íslandi, eins og við höfum séð undanfarið, og blaðran er að springa. Það verður hrun á peningamarkaði og það syrtir í álinn hjá fólki aðeins meir en nú er. Við þurfum að ná botninum til að ná jafnvægi aftur. Það verður hrun hjá sumum og nýtt upphaf hjá öðrum ...

... Mikið tap verður hjá stóru fjármálafyrirtækjunum og ýmsar sviptingar og neikvæðar breytingar hjá bönkunum líka. Það á eftir að næða eitthvað um Seðlabankann, ég sé stríð í kringum Davíð og fjármálamenn, mér finnst líka hluti ríkisstjórnar blandast í það.“

 

Boldið var með ólíkindum spennandi í morgun en endursýning á því féll niður seinnipartinn í gær vegna hins boldsins. Taylor heldur áfram að sálgreina Nick og fær ýmislegt miður geðfellt upp úr honum, m.a. það að mamma hans, Jackie hin glæsta, hafi átt marga elskhuga sem greiddu fyrir atlotin. Þegar Taylor er komin heim og les skýrslu um Nick upphátt inn á segulband hlustar Stefanía, helsti hatursmaður Jackie, með mestu athygli, en Taylor skildi eftir opið og sneri baki í dyrnar, svona eins og maður gerir þegar um viðkvæmar trúnaðarupplýsingar er að ræða. Taylor tókst, þrátt fyrir allt bótoxið, að verða skelfingu lostin á svipinn þegar Stefanía birtist óvænt og sagði gribbulega: „Jæja, svo Jackie var gleðikona, en áhugavert!“

Gengi krónu fest tímabundið

Athugasemdir

[Guðríður Hrefna Haraldsdóttir, 7.10.2008 kl. 12:03]

Það var ekki meiningin að öskra þessa færslu. Letrið varð bara svona alveg óvart.

[Jenný Anna Baldursdóttir, 7.10.2008 kl. 12:37]

Ég ét alla mína trefla til heiðurs völvunni.  Ég sem dissaði hana í fyrra.

[Guðríður Hrefna Haraldsdóttir, 7.10.2008 kl. 12:40]

Og ég átti ótrúlega erfitt með að að trúa þessari bölsýni ... og gerði eiginlega ekki, allt gekk svo rosalega vel, hélt ég.

[Bragi Einarsson, 7.10.2008 kl. 12:47]

Hvernig væri að þessi Valva væri nú gerð að fjármálaráðherra, seðlabankastjóra og forsætisráðherra! Það myndi spara þjóðinni mikið!

[Ásdís Sigurðardóttir, 7.10.2008 kl. 13:31]

Hugsaði einmitt þegar ég sá letrið, "mín skapstór í dag" þessi völva er klár ekki spurning, held samt ég éti ekkert sem er prjónað eða saumað.  Takk fyrir bold update, hef verið löt í sjónvarpsáhorfi.  kveðja

[www.zordis.com, 7.10.2008 kl. 14:05]

Ansi getspá Völvan ... það eru væntanlega margir sem vildu hafa þessa hæfileika núna á þessum erfiðustu tímum.

[Hólmdís Hjartardóttir, 7.10.2008 kl. 14:30]

VÖLVUNA Í SEÐLABANKANN STRAX

[Guðríður Hrefna Haraldsdóttir, 7.10.2008 kl. 14:36]

Hahhaha, já, beint í Seðlabankann með hana.

[Sigríður Ágústa Þórólfsdóttir, 7.10.2008 kl. 15:35]

Í alvöru,fáum völvuna sem ráðgjafa ríkisstjórnar og þess sem eftir er af bönkunum

[tanta (IP-tala skráð) 7.10.2008 kl. 17:20]

frænku baby

getið þið ekki talað við völvuna og fengið jákvæðar fréttir maður er orðin svo ruglaðir í þessu öllu að það hálfa væri helling of mikið. Stundum ætlar Plútín að lána okkur af því við eigum enga vini en svo er sænski bankin tilbúin að lána okkur og er vinur okkar  hvað er í gangi ætli þessir menn hafi bara ekki gleymt að hringja i norðurlandaþjóðirnar og byðja um hjálp?  4 gengi i gangi er furða að við séum rugluð?

annars góðar kveðjur úr neðri Bláfjöllum

[Guðríður Hrefna Haraldsdóttir, 7.10.2008 kl. 17:24]

Held að það væri ekki galið að tékka á málum núna. Annars er Yoko Ono að koma og þá hlýtur allt að bjargast!

[Bergljót Hreinsdóttir, 7.10.2008 kl. 17:39]

Sammála næstsíðasta ræðumanni...er ekki hægt að fá Völvuna góðu til að koma með smá svon innspýtingu...sýna okkur aðeins lengra inn í nánustu framtíð???

[Birna Dis Vilbertsdóttir (IP-tala skráð) 7.10.2008 kl. 21:29]

 íslenskt og Ameríkst bold.Verður svo rússnekst bold eftir áramót eða næstu mánaðarmót

[Einar Örn Einarsson, 7.10.2008 kl. 22:39]

Wooow glúrin var hún Völvan.

Væri gott að fá aukaspá frá henni núna til að róa landann

[Brynja skordal, 7.10.2008 kl. 23:40]

já var einmitt búinn að skoða þetta aftur hjá völvunni ótrúlega vel sjáandi völva takk fyrir bold Góða nótt Elskuleg

[Jóna Kolbrún Garðarsdóttir, 8.10.2008 kl. 01:51]

Við þurfum fleiri völvuspár, hvernig væri að koma með vetrarspá?  Bara svo við vitum hvað kemur næst

[Guðmundur G. Hreiðarsson (IP-tala skráð) 8.10.2008 kl. 11:56]

Ég fékk nú bara hellu fyrir eyrun, ha, hm.

[Haukurinn, 8.10.2008 kl. 16:55]

Tja, getur verið að hún hafi kannski verið búin að spá þessu áður?

Verð að viðurkenna að ég hef hingað til átt erfitt með það að trúa orðum hennar, sem oftast voru á þá leið að hún sæi fram á "umhleypingar í náttúru og stjórnmálum" - sem eru mikið til reglulegir atburðir á Íslandi.