Sjálflæknandi tölva, gamlar myndir og sönnun!

Kveikti á tölvunni upp á von og óvon í kvöld. Nákvæmlega það sama gerðist og í gærkvöldi: Ekkert. Næstum hálftíma seinna heyrðust óhljóð úr horni og þegar ég kíkti var elskan mín komin í gang. Hún hafði greinilega haft gott af hvíldinni eða óttaðist fáránlega tillögu Braga bloggvinar um að ég fengi mér Makka. Ég hló hæðnishlátri þegar ég hugsaði um þetta.

Nú get ég unnið heima á morgun ... og t.d. skrifað ódauðlega lífsreynslusögu sem fer væntanlega í bók eftir nokkur ár! Svo endar með því að þetta verður eins og Ísfólkið, yfir 40 bindi, og ég fæ ekkert að blaðamennskast, heldur fer á milli staða á landsbyggðinni og safna djúsí sögum frá fólki.

Skoðaði gamlar myndir í kvöld, bæði eldgamlar og nýrri. Þar sem ég kann lítið á tölvur og hræðist tæknilega hluti á borð við skanna ákvað ég að taka myndir af myndunum. Þær eru kannski pínku skrýtnar þar sem þurfti að passa upp á glampann frá flassinu en þær eru samt flottar. Mun því skreyta þessa færslu með ýmsum nostalgíumyndum.
Ein myndin sannar það sem ég hef oft sagt um okkur Madonnu. Þótt við séum orðnar 48 ára og þar með verulega rosknar í hugum ungbarna, þá höldum við okkar striki enn í dag, förum í tónleikaferðir og hlöðum niður börnum eins og okkur sýnist. Fann reyndar engar nýlegar sviðsmyndir af sjálfri mér (Madonna er duglegri að ota sínum tota) en hér er ein gömul og góð síðan við Siggi Hreiðar sungum á Wembley á níunda áratugnum fyrir þúsundir. Dúettinn kallaðist Guru and the Gang.     

P.S. Elsku fullkomna PC-tölvan mín geymdi bloggfæsluna sem átti að fara inn í gærkvöldi:
Hlutirnir gerast hratt hér í himnaríki. Ég var ekki fyrr búin að blogga um The RÖDD I love þegar ég fékk símtal og skömmu síðar heimsókn. Fyrir algjöra tilviljun var upptökuvélin í gangi:
http://www.grapheine.com/bombaytv/index.php?module=see&lang=uk&code=758333dd76b29a409302406e98796ef9

Athugasemdir

[Magnús Geir Guðmundsson, 2.7.2007 kl. 23:21]

Láttu samt nágrannan eða einhvern annan kíkja á vélina, gæti bara verið skammgóður vermir!

En fórstu á Madonnutónleika á Wembley 1987? VAr nefnilega sjálfur staddur í London þá, en í Pílagrímaferð á Donningtonrokkhátíðina,með Eika drengin Hauks sem fararstjóra!

[Jóna Á. Gísladóttir, 2.7.2007 kl. 23:34]

Gurrí nú þarftu að vara þig á tölvunni. þetta er spúkí og gæti farið að verða eins og í myndinni.... hvað hét hún... Electric dream held ég. það sem tölvan var afbrýðissöm út í ástarlíf eiganda síns. Ég les út úr þessu öllu saman að þú ert komin með einhvern upp á arminn og tölvan er að tjúllast. Í öllum bænum farðu varlega en út með sprokið. Þú getur ekki leynt okkur bloggvini þína svona hlutum lengi.

[Jenný Anna Baldursdóttir, 2.7.2007 kl. 23:40]

Mér finnst þetta hið dularfyllsta mál.  Einhver er að eyðileggja tölvuna "from the inside" af því þú ert að meika það í bransanum.  Annars ertu tiltölulega lagleg á myndunum og mikið rosalega litríkt bakkelsi er þarna.  Hva varst það þú sem töfraðir fram krásirnar.  Erfðaprinsinum kippir í móðurkynið með fegurðina.

[Jenný Anna Baldursdóttir, 2.7.2007 kl. 23:41]

Góð flokkun, engu ofaukið

[Guðríður Haraldsdóttir, 2.7.2007 kl. 23:48]

Hahahha, þið eruð svo fyndin!!! Jóna, myndin gæti hafa heitir Demon Seed. Sá hana aldrei en las bókina sem er eftir Dean Koontz, versta bókin hans, langversta. Hún fjallar um tölvu sem verður ástfangin af konu, tekst að læsa hana inni í húsi hennar þannig að hvorki er hægt að komast út eða inn, og ætlar svo að barna, sorrí, tölva hana! Hahahahahahaha. Jenný mín, ef þér finnst eitthvað til um barnaterturnar, bíddu þá þangað til þú kemst í fullorðisgúmmulaðið. Var orðin svo hundleið á veislum með víni, gosi og snakki að ég útbjó fermingarveislur á hverju ári. Þegar ég svo fékk hógværðarkast og ætlaði að hætta með partíin mér til dýrðar trylltust vinirnir og heimtuðu áframhald á fermingarveislum í ágúst. Nýja bakaríið á Akranesi gerir marsipantertuna, hitt sé ég um, ásamt nokkrum vinkonum sem koma með kökur með sér. Bannað að fara til útlanda 12. ágúst! 

[Jenný Anna Baldursdóttir, 3.7.2007 kl. 00:33]

Og hversu gömul.......?????

[Guðríður Haraldsdóttir, 3.7.2007 kl. 00:50]

49

[Katrín Snæhólm Baldursdóttir, 3.7.2007 kl. 08:36]

Sko...ég get ekki sett inn neinar myndir núna svo kannski er bilun hjá the systemo!!!Ég er í gömlu tölvunni uppi...því fíni lappinn minn heldur að hann sé dáin skjaldbaka.

Gurrí plís plís plís...má ég fara til útlanda í ágúst..þann 12???

[Birna Dis Vilbertsdóttir (IP-tala skráð) 3.7.2007 kl. 08:51]

Yndislegar myndir og myndband. PASSAÐU ÞIG Á TÖLVUNNI. Hahahahaha.

[Sigurður Hreiðar, 3.7.2007 kl. 09:09]

Gaman að þessari mynd! Var ég virkilega svona horaður? En ég er viss um að söngurinn tókst vel. Var þetta ekki í einhverjum sal niðri á hótel Sögu? Var ekki Sigurdór með okkkur? Ég man að ég var í rosalegu söngstuði á þessari árshátíð -- sem sjaldnast voru skemmtilegar frekar en árshátíðum er títt.

[Saumakonan, 3.7.2007 kl. 10:13]

kvitt frá handlama saumakonu sem reynir að fara bloggrúnt og heilsa uppá vinina    

[Guðríður Haraldsdóttir, 3.7.2007 kl. 10:17]

Katrín, já, þú mátt fara til útlanda 12. ágúst! Hhhaahah, kjánaprik! 

Ahhh, Siggi, var þetta á konsertinum á Hótel Sögu, ég rugla þessum tónleikaferðum alltaf saman? Ég var svo viss um að við hefðum verið í Wembley þarna.

[Sigurður Hreiðar, 3.7.2007 kl. 13:11]

Já, ég held endilega að þessi konsert hafi verið á Sögu. Það var önnur hljómsveit á Wembley, var það ekki?