Akranesi-Rvk ... hetjudáð Ástu í klikkaðri ófærð

Sko, ég veit að ég hef ýmist kallað Ástu kaldlynt karlrembusvín eða góðlynt geðprýðikvendi , svona rétt eftir skapinu sem ég er í og hvernig það passar inn í pistlana. Ég hef held ég aldrei kallað hana hetju, þótt hún eigi það vissulega skilið, sérstaklega eftir ævintýri morgunsins. Við vorum "seint" á ferð frá Akranesi, eða lögðum í hann 6.50 skv. áætlun.

Á Innnesvegi, rétt áður en við komum að samkomuhúsinu Miðgarði (ekki í Skagafirði) sáum við blá lögguljós ... æ, æ, ætli hafi orðið óhapp? Afspyrnusætur lögreglumaður kom að bílnum, horfði með aðdáun á okkur, alla vega Ástu, hún er svo grönn, og sagði okkur að það væri lokað, bílar festust bara í sköflum og svona. Nú, við snerum við og ákváðum að fara aðalleiðina út úr bænum, ekkert heim að sofa aftur kjaftæði. Það var ansi blint á leiðinni og brjálæðingurinn sem fór fram úr okkur áttaði sig of seint á mistökunum því að nú gat hann ekki lengur notað okkur sem þrautakóng, heldur við hann.

Sem betur fer var ákaflega veðursælt í Hvalfjarðargöngunum og ögn minna óveður virtist vera sunnanmegin rörs. Við sáum nokkra bíla sem höfðu ekið út af á leiðinni og svo urðu útvarpsmenn Bylgjunnar alltaf ákveðnari í því að fólk ætti hreinlega að halda sig heima. "Of seint," hvæsti Ásta milli samanbitinna tannanna og munnurinn varð eins og herptur handavinnupoki, þétt reyrður. Ekki var Gurrí, samferðakona hennar, mikið skárri á svip, varirnar hugsanlega ögn kyssilegri, og hringdi í örvæntingu sinni í Björk samstarfskonu sína. Samdi um að verða hirt upp á Miklubrautinni á strætóstoppistöðinni við Kringluna. Guðríður vissi sem var að Ásta væri hetja en grunaði engan veginn að hún þyrði upp í Árbæ of oll pleisis í svona veðri, þar verður alltaf ófært í hvelli ... (spæling dagsins var ætluð vélstýrunni) en hetjulundin efldist í hjarta hennar eftir að hún heyrði að ég gerði ráð fyrir að hún kæmist ekki nema Vesturlandsvegur-Miklubraut-Hringbraut-Landspítali. Ég fékk far upp að dyrum. Af því að ég er ekki kvikindi þá lét ég Björk vita ... annars myndi þessi góðlynda og samviskusama samstarfskona mín láta hefja leit að mér í kringum stoppistöðina við Kringluna, eins og það sé ekki nóg að gera hjá löggum og björgunarsveitum núna.

"Vá, en falleg glitrandi perlufesti," sagði ég dreymin á svip og horfði ofan af brúnni sem liggur upp í Árbæ. "Þetta er ekki perlufesti," sagði Ásta greindarlega, "þetta er óendanleg röð bíla. Það eru bílljósin sem rugla þig í ríminu," bætti hún samúðarfull við. Vá, eins gott að við vorum svona snemma á ferð. Ásta bjóst við hálftíma ferð frá Hálsaskógi niður á Landspítala. 

Prófarkalesararnir buðu mér kaldhæðnislega góða kvöldið, þegar ég mætti rúmlega átta, þær "löngu" komnar. Ég hef alveg gleymt að hæða þær undanfarið þegar þær mæta á eftir mér en ég mun ekki klikka á því í framtíðinni ... Gulla var um 45 mínútur á leiðinni úr Hafnarfirði en náði samt að verða á undan mér. Nú er það bara stóra spurningin ... Hvernig kemst ég heim á Skagann í kvöld? Best að tékka á annarri hetju, Erlu minni sem vinnur í sama húsi ... skyldi hún hafa lagt í hann í morgun, sko? Annars tek ég við tilboðum frá einlægum aðdáendum sem vilja appelsínusúkkulaði úr mötuneytinu og eru á leið á Skagann eftir kl. 17 í dag og langar í fallegan og vitsmunalega örvandi félagsskap. Ásta verður löngu komin heim, vonandi, hún ætlar að halda upp á afmælið sitt með öðru afmælisbarni og skemmtilegum vinkonum til áratuga.

Mér hefur verið fagnað eins og hetju í vinnunni í morgun, samstarfsfólkið heldur líklega að ég búi á Sauðárkróki eða Hafnarfirði eða þekki ekki fólk með hetjulund og bílpróf ...

Fólk haldi sig heima

Athugasemdir

[Bibbi (IP-tala skráð) 25.1.2008 kl. 09:31]

Gott að vita að enn eru til hetjur.

Jafnframt óska ég nagladekksandstæðingunum og svifryksvælukjóunum til hamingju með daginn !!

[Linda Linnet Hilmarsdóttir, 25.1.2008 kl. 09:37]

kvitt kvitt og kveðjur

[Guðrún Jóhannesdóttir, 25.1.2008 kl. 09:42]

gott að þú komst heil á húfi á leiðarenda, skemmtilegt hve veðrið er oft gott í göngunum

Megirðu fá góða heimferð

[Guðríður Haraldsdóttir, 25.1.2008 kl. 09:46]

Hhahahaha, góður Bibbi!!! Nú er veðrið til að vera á nagladekkjum!

Ó, Guðrún, ég vona að ég komist heim. Hóm svít hóm!!!

[Kjartan Pálmarsson, 25.1.2008 kl. 09:53]

Þetta er BARA hetjuskapur!

Ekki veit ég hvernig þú ætlar að komast heim um helgina, því spáð er meira en 28 m/sek í göngunum næstu sólarhringa ,,koma að því'' kemst hugsanlega og sennilega Súr-Hvalfjörðinn.

Góða ferð heim í kvöld.

Með hverjum vandi er um slíkt að spá,

en eitt er víst, huga verður að veðurspá.

[Þröstur Unnar, 25.1.2008 kl. 10:12]

Æi, það væri nú alveg þess virði að rúlla eftir þér í borgina seinnipartinn, bara svona til að sýna þér að það er hægt að aka í ófærð á samakipraðra vara, og varabílstjóra.

En býst nú frekar við því að fara bara út að leika ef það kæmi almennilegur snjór og ófærð.

Habbðu fínan dag mín kæra.

[Þröstur Unnar, 25.1.2008 kl. 10:12]

án

[Guðríður Haraldsdóttir, 25.1.2008 kl. 10:33]

Er sem sagt ekki hægt að LEIKA sér þegar ég er með í för og gera gagn í leiðinni? Þröstur þó ...

[Anna Ólafsdóttir Björnsson, 25.1.2008 kl. 17:41]

Á gömlu Vikunni bjó líka ein uppi á Skaga (you know who) og kom með Boggunni í bæinn. Þegar við vorum uppi í Síðumúla þá mætti fólk í þessari röð í óveðri: Sá sem bjó í Mosó, sá sem bjó á Mosfellsheiði, sú sem bjó á Álftanesi, Akurnesingurinn (Boggan kom ekki fyrr en 10 í bæinn), Hafnfirðingurinn, Kópavogsbúarnir og loks, um hádegi komu Vesturbæingarnir sem höfðu þá setið í bílaröð í 2-4 klukkutíma.

[Turetta Stefanía Tuborg, 25.1.2008 kl. 19:09]

Takk fyrir hamingjuóskirnar Bibbi.Það eru nú komin nokkur ár síðan ég hætti að aka á nagladekkjum og ég hef sko ekki séð eftir því. Enda hef égkomist allra minna ferða. Líka í dag.

[Magga (IP-tala skráð) 25.1.2008 kl. 20:12]

Bara snillingar á ferð ........þið eruð frábærar