Frýs í æðum blóð

Hvílíkur kuldi í morgun. Áttaði mig á því á stoppistöðinni við Garðabraut að einn trefill nægði ekki, kuldaboli beit svo fast að þetta var sannkallað þriggja trefla veður. Gummi (34) var farinn að keyra aftur eftir vikulasleika og heilsaði hressilega að vanda. Ég settist fyrir framan stillilega og rólyndislega stúlku en maður skyldi aldrei láta útlitið blekkja sig. Hún reyndist mikil skrafskjóða þegar kunningjakona hennar settist hjá henni og þær báðar. Nú veit ég ALLT um þessar konur ... og ég sem ætlaði að reyna að dorma á leiðinni. Þær þögnuðu reyndar þegar strætó fór í göngin en um leið og við komum upp úr þeim þá áttaði ég mig á því að þær ganga fyrir dagsbirtu. Ég hef nóg efni í lífsreynslusögur næstu árin.

Ungi maðurinn í leið 18, þessi sem vinnur hér í húsinu, er hættur að vera hræddur við mig og hleypir mér alltaf inn bakdyramegin. Þurfti því að ganga í gegnum matsalinn. Mikill fnykur var þar og datt mér helst í hug að þorramatur yrði á boðstólum ... en það verður reyndar plokkfiskur. Greinilega stappaður saman við þorramat. Hver vill bjóða mér í mat í hádeginu? Ég skal borga. Fyrstir koma - fyrstir fá!

Ég á afar skemmtilegt verk fyrir höndum í dag, eða að þýða kynstrin öll af bröndurum. Það fer í krossgátu- og afþreyingarblað Vikunnar sem kemur út fljótlega. Ef þið lumið á einhverjum góðum sem ekki hafa birst í öllum fjölmiðlum og gengið manna á milli í tölvupósti þigg ég alveg ...

Athugasemdir

[Ólafur fannberg, 10.3.2008 kl. 10:43]

hvar var kuldi það var frekar hlýtt hjá mér

[Guðríður Haraldsdóttir, 10.3.2008 kl. 10:53]

Úti á stoppistöð var kalt, enn kaldara á stoppistöðinni í Mosfellsbæ og langkaldast á stoppistöðinni í Ártúni. Hefði að sjálfsögðu klætt mig betur ef mig hefði grunað þetta ... Hlýrri peysa, þrír treflar og svona.

[Þórunn María Örnólfsdóttir (IP-tala skráð) 10.3.2008 kl. 10:58]

Það er gott að heyra að það sé kalt úti þar sem ég er heima með veikt barn og við vorum að öfundast út í snjóinn að fá að vera úti í sólinni

[Brynja Hjaltadóttir, 10.3.2008 kl. 11:06]

Ég las "hver vill bjóða mér í glas í hádeginu" og ætlaði að bjóða mig fram...

Hef ekkert gott af að vera að éta..en hefði alveg verið til í öl

Ég meina..það er helgi hjá mér núna.

[Guðríður Haraldsdóttir, 10.3.2008 kl. 11:10]

Í glas í hádeginu ... hahahahhaha, sjúr, Brynja! Þórunn, vertu bara inni í hlýjunni, það er gluggaveður núna. Brrrrr

[Guðmundur G. Hreiðarsson (IP-tala skráð) 10.3.2008 kl. 11:19]

Ég var að velta því fyrir mér að skreppa í Nóatún, Nóatúni 17 105 RVK, og skella mér á fríkadellur eða bara kálböggla. Þú ert að sjálfsögðu velkomin þangað líka, en verður að standa straum af tilfallandi kostnaði, sem af kann að hljótast.

Séntilmaður 2008.

[Guðríður Haraldsdóttir, 10.3.2008 kl. 11:38]

Guðmundur minn, ekki séns að ég nenni í strætó niður í Nóatún. Það myndi taka mig einn og hálfan tíma fram og til baka. Ætla bara að fá mér grænmetisréttinn í mötuneytinu og halda fyrir nefið á meðan ég borða. Hvernig dettur kokkinum í hug að bjóða upp á plokkfisk úr SALTFISKI? Fýlan var af saltfiskinum í morgun.

[Brynja skordal, 10.3.2008 kl. 12:18]

þarf að fara skreppa með strætó virðist alltaf stuð þar en hló mikið núna þær ganga fyrir Dagsbirtu snild En Plokkfisk úr saltfiski gæti verið gott ég hefði smakkað svona fnykur seigir ekkert hvernig hann bragðast eins er með hákarlinn hafðu góðan dag

[Nanna Rögnvaldardóttir, 10.3.2008 kl. 12:58]

Ég hef verið með saltfiskplokkfisk í fínum veislum sem ég hef eldað fyrir. Brúðkaupsveislu meiraðsegja. Það kvartaði enginn yfir því ...

[Nanna Rögnvaldardóttir, 10.3.2008 kl. 13:00]

Á ég annars að trúa því að þú hafir ekki smakkað saltfiskplokkfiskinn í fimmtugsafmælinu mínu? Það voru sko engar döðlurmöndlurhneturrúsínur í honum.

[Guðríður Haraldsdóttir, 10.3.2008 kl. 13:16]

Heheh, fordómar hjá mér, af því að lyktin var svo vond í mötuneytinu. Jú, ég smakkaði þennan fína plokkara í afmælinu þínu, Nanna. Allt sem ég smakkaði þar var æðislegt, ekkert skrýtið ...