Kreppuótti í mötuneytinu

Eitthvað sem heitir Falafel var í matinn í hádeginu, alveg ágætis hollustubollur með hvítlaukssósu og salati. Við matarborðið rifumst við um framburðinn á faLAfel, sem á víst að vera með áherslu í miðju orði, á LA, eins og í útlensku. Vá, hvað ég vinn með æðislegu fólki sem kann að bera fram hin flóknustu útlensku orð.  Hmmmmm. Tryggi fór að tala um andúð sína á hinu guðdómlega kryddi kóríander og síðan fórum við, einhverra hluta vegna, að tala um mannakjötsát.

Tryggi myndi frekar borða mannakjöt en kóríander, tjáði hann okkur. Hrund myndi frekar borða mannakjöt en kóngulær. (Mamma líka, hugsa ég.) Tryggvi sagði að það væri sko alveg hægt að fá mannakjöt ... það væru svona exclusive-matsölustaðir í New York og ef maður vissi leyniorðið gæti maður alveg pantað sér.

Þetta var í annað skipti í vikunni sem Hrund kom inn í samræður um mannakjötsát í mötuneytinu.

Mig grunar að ótti okkar Íslendinga við kreppu og mögulega hungursneyð sé djúpstæðari en Seðlabankinn gerir sér grein fyrir. Ef þeir/þær/þau hætta að hringla svona með blessaða stýrivextina mun ótti vaknandi almennings breytast í dásvefn á nýjan leik. Hmmm

Athugasemdir

[Magga (IP-tala skráð) 18.4.2008 kl. 14:13]

Guðríður.....halló er mikið að gera í vinnunni!! 2 villur í einni færslu??????"Tryggi fór að tala um andúð" "Tryggi myndi frekar borða mannakjöt"

[Guðríður Haraldsdóttir, 18.4.2008 kl. 14:48]

Hmmm, hann heitir sko ekki því hversdagslega nafni TryggVi, heldur Tryggi ... eða sko við köllum hann það sko ...

[Jenný Anna Baldursdóttir, 18.4.2008 kl. 15:19]

Gurrí góð að vanda.  Ég held að ég gæti ekki valið milli mannakjöts og köngulóa.  Get ekki borðað sjálfa mig og ekki óvini mína.  Myndi þá svelta í hel ef ekkert annað (engisprettur) væri í boði.

Ég fór og gossaði visakortinu í Hagkaup í Kringlunni.  Það brann nærri því yfir á kassanum en það gekk.  Já ég veit það, alveg, kann ekki að skammast mín

[Hildigunnur Rúnarsdóttir, 18.4.2008 kl. 16:42]

Tek undir með Trygga varðandi kóríanderinn!

[Katrín Snæhólm Baldursdóttir, 18.4.2008 kl. 16:49]

Elska Kóríander og köngulær sem eru í fjarskanum...og þetta skemmtilega blogg þitt. Það eru engin takmörk fyrir þ´vi hvað þú ert flink að setja hverssdaginn í hlægilegan búning. Þú ert að bjarga landanum frá andlegu hruni með skemmtilegheitum þínum. Amen!!!!!

Ég er í góðu skapi því ég er kannski að fara út í kvöld með kúrekum...segi ekki meir

[Ben.Ax. (IP-tala skráð) 18.4.2008 kl. 17:26]

Ég borða bara tekex og drekk vatn.

[Hildigunnur Rúnarsdóttir, 18.4.2008 kl. 21:24]

bíddubíddu, hver er BenAx?

ég þekki einn BenAx, sá kenndi mér fyrir einum og hálfum óratíma...

[Ben.Ax. (IP-tala skráð) 18.4.2008 kl. 22:25]

Sæl, Hildigunnur. Ég kenndi þér að verða svona góður tónlistarmaður og Hólmfríði að verða alheimsfegurðardrottning. Í fyrra hitti ég mann sem ég kenndi að verða sendibílstjóri. Vonandi hef ég ekki komið í veg fyrir að þið lærðuð eitthvað!

Kveðja

Ben.Ax.