Hjartalæknir í Skagastrætó - ný lífsreynslusögubók komin út!

Loksins mætti ég með galopin augu í strætó í morgun eftir langþráðan mátulega langan nætursvefn. Bjóst alveg eins við að splunkunýi bílstjórinn úr móðu undanfarinna morgna væri jafnvel kona eða þaðan af verra ... eftir gott frí hef ég ekki verið nema skugginn af sjálfri mér eftir að þurfa að vakna uppúr sjö á morgnana, les lengi frameftir og sýni vítavert kæruleysi í því að reyna að fá almennilegan nætursvefn. Bílstjórinn reyndist alveg vera hinn skemmtilegasti karl, eins og mig minnti, og sagðist hafa sett met í morgun ... eða ekið með heila fjóra farþega frá Mosó til Akraness í fyrstu ferð. Helmingur farþega voru víst læknishjón, karlinn hjartasérfræðingur og á helgarvakt á sjúkrahúsinu. Það datt óvart af mér andlitið eitt augnablik ... læknir í strætó?? En hví ekki? Er ég ekki virðulegur blaðamaður, meira að segja aðstoðarritstjóri? Hví kýs ég strætó? Ja, ekki er það af neinum lúðahætti, ég þori bara ekki að keyra bíl ... Læknirinn tók víst rándýrar endurbætur á stofu sinni framyfir að eiga bíl ... og vá hvað ég skil hann. Öruggur með sig, þarf ekki stöðutákn á borð við jeppa. Er ekki líka svolítið flott að aka um í stórum, dýrum bíl og hafa einkabílstjóra?

Yfirleitt eru ansi fáir með fyrstu ferð á Skagann á morgnana á meðan fara tvær rútur af fólki í hina áttina, eða til Reykjavíkur. Notkun hefur greinilega aukist eftir skelfilegar bensínhækkanir síðustu vikna því það nægði að hafa bara einn vagn í fyrstu ferð allt sumarið í fyrra. Ég fór meira að segja stundum heim á Skagann með rútukálfi sl. sumar. Engin Elín kom upp í strætó í Mosó í morgun, ég sat með þrumusvip á andlitinu til að enginn þyrði að setjast hjá mér (eftir sundurstíun á okkur Elínu undanfarna morgna). Þegar mér loks tókst að taka frá sæti þá klikkar hún ...

Ógreiddi maðurinn sat í sama sætinu og í gær og breiddi svo vel úr sér að ég sá að hann var í brúnum, mjög illa burstuðum skóm. Sumir þjást af hræðslu við kóngulær eða töluna 13 og aðrir óttast skuldbindingu, þessi ungi maður gæti verið burstafælinn (hárbursta-, skóbursta- osfrv.) Svo var allt gert til að rugla mig og þýðandann í ríminu, nú fór hluti Indverjanna út á gamla staðnum og stærri hluti út um leið og við, nema sá ógreiddi kom út um leið og við, eins og í gær. Einhvern morguninn ætla ég ekki í vinnuna, heldur elta samferðamennina, bara til að geta sagt ykkur hvert liðið mitt fer. Við verðum alla vega að komast að því hvar sá ógreiddi vinnur, ekki satt? Minnir að Indverjarnir (karlar plús ein kona) séu hjá Glitni við tölvuforritun.

Nú var að koma út bókin 50 íslenskar lífsreynslusögur, fallega túrkísblá að lit og inniheldur 15 djúsí splunkunýjar lífsreynslusögur og 35 eldri sögur sem hafa birst í Vikunni áður. Vá, það var svo gaman að rifja þessar sögur upp. Sigurjón M. Egilsson, ritstjóri Mannlífs, sá mig handleika fyrsta eintakið (ógurlega montna, eins og Þingeyinga aftur í ættir er siður) og sagði vingjarnlega: „Ég veit að þú samdir allar þessar sögur sjálf ... og þar að auki ertu völva Vikunnar!“ Ég vissi ekki hvort ég ætti að vera upp með mér yfir þessu áliti hans eða móðguð fyrir mína hönd, völvunnar og fólksins sem hefur sagt mér sögur sínar ... Ég hallast að því að þetta teljist hrós og SME álíti mig einstaklega hugmyndaríka, fallega, gáfaða og að auki með miðilshæfileika. Hver annar en miðill (völvan okkar) hefði getað sagt fyrir um lætin í borginni og að borgarstjórin myndi springa, hún segir reyndar að ríkisstjórnin springi líka ... Eina sem mér finnst ólíklegt að rætist hjá völvunni er að ÍA berjist um fyrsta sætið við Val í Landsbankadeild karla! Hún hlýtur að hafa lesið hugsanir mínar og tekið inn óskhyggjuna þegar ég tók viðtalið við hana ... ég held með ÍA og finnst Gaui Þórðar ekki fram úr hófi skapmikill, bara eðlilegur fótboltaþjálfari! Hverjum er ekki illa við dómara? Hér að ofan sést mynd af lífsreynslusögubókinni sem kom út í fyrra. Þessi nýja er næstum alveg eins í útliti ... nema túrkísblá!

Ómannúðleg meðferð á flóttamanni! Hvað er í gangi á Íslandi?

Ekki hefur farið nógu hátt sú ákvörðun íslenskra stjórnvalda að reka nýbakaðan föður úr landi og aðskilja hann og fjölskyldu hans, konu og 3 vikna son. Hann hafði sótt um hæli á Íslandi sem pólitískur flóttamaður og ekki fengið svar við því, heldur var hann sóttur á heimili sitt í gær, skellt í fangelsi og sendur heim með flugvél í morgun. Mennirnir sem hlupu út á flugbrautina gerðu það til að mótmæla þessum ómannlega verknaði yfirvalda! Þó svo maðurinn hafi millilent í Frakklandi, þurfti þá endilega að nýta glufuna í lögunum til að losna við hann og mögulega senda hann út í í opinn dauðann? Hvaða firring er í gangi hjá okkur? 

 

Sjá nýjustu færslu jennýjar Önnu: www.jenfo.blog.is)

Ég er búin að senda tölvupóst til Ingibjargar Sólrúnar og Björns Bjarnasonar og hefði eflaust gert miklu fyrr en fréttaflutningur hefði ekki verið svona lítill af þessu máli.

Mér er stórlega ofboðið, ég get ekki trúað því að við gerum svona!

Úr bloggi Jennýjar, hlekkir og fleira:

Hér er fyrri færslan mín um málið og hér er umfjöllun RÚV um manninn í gærkvöldi.  Sjáið líka hér.

Hlupu út á flugbrautina á Keflavíkurflugvelli

Leið 15 - forgarður helvítis?

„Hmm, hvað er í gangi? hehehehe“ sagði virðulegur maður í strætó 15 í morgun. Hann reyndi með hlátri að breiða yfir þá hallærislegu staðreynd að honum var allt of heitt á rassinum. Hann kíkti undir sætið sitt og róaðist eitthvað, enda sá hann bara það sem ég vildi að hann sæi, eða miðstöð. Ég stillti mig um að segja honum að hann sæti ofan á einum inngangi helvítis, strætó væri ekkert annað en forgarður. Ég hef fyrir slysni hrætt ansi marga menn frá mér með sannleikann að vopni. Þessi leit út fyrir að halda að ég hlyti að vera ofsatrúður (er þetta ekki gott orð?) ef ég færi að tala um helvíti. Þess vegna sleppti ég því líka að segja honum að ég byggi í himnaríki. Enda sat útlensk hjólreiðakona á milli okkar og truflaði algjörlega flæðið. Við Elín (Mosóbúi, hestakona og aðstoðarkona tannlæknis í miðbæ Reykjavíkur) höfum ekki getað setið saman í lengri tíma, eitthvað við útgeislun mína er ekki nógu fjandsamlegt þessa dagana og alls kyns ókunnugt lið, jafnvel útlenskt, hlassar sér hjá mér án nokkurrar miskunnar!

Líf mitt er að komast í fullkomið horf, svona strætólega séð. Dagurinn í gær var greinilega eitthvað undarlegur, ljósaskiptalegur, svona tvælæt són. Indverjarnir fóru út á réttum stað í morgun, eltu okkur þýðanda og Sigurð Mikael ekki út úr strætó ... en það gerði ógreiddi maðurinn ... jamms, hann vaknaði greinilega á réttum tíma í morgun. Ég vildi ekki láta samferðamenn mína taka eftir því að ég fylgdist með þeim ógreidda og bar mig lymskulega að. Ætli sá ógreiddi vinni hjá Harðviðarvali eða jafnvel Europris? Annars koma ótrúlega mörg fyrirtæki til greina. Ef það væri vetur myndi ég segja að hann væri hæfilega undarlegur í útliti til að geta verið í Kvikmyndaskólanum.

Þýðandinn var að lesa Oscar Wilde í strætó, ævisögu hans skrifaða af vini hans (Oscars). Á þessarri stuttu leið upp stigann bakdyramegin og að mötuneytinu gat  hann sagt mér ýmsar staðreyndir um Stalín. Það er ekki nóg með að strætóferðirnar mínar séu skemmtilegar, heldur eru stigagöngurnar lærdómsríkar í meira lagi. Ég sagði þýðandanum (sem reyndi að lesa OW) frá yndislegu bókinni sem ég var að enda við að lesa: Marley og ég. Bók sem situr á metsölulista New York Times og er gjörsamlega æðislega stórkostlega frábær!!! Hún er nýkomin út á íslensku og er í kilju, mæli heldur betur með henni. Þýðandinn sagði mér að konan hans hefði keypt hana í fyrra ... á portúgölsku en þau væru að reyna að læra það  göfuga tungumál Ronaldos og fleiri.

Megi dagurinn ykkar verða skemmtilegur og heppnin elta ykkur við hvert fótmál!

Kokkurinn hringsparkaður og líklega meinlausir Indverjar

Yndisleg strætóferðin í morgun. Flott rúta flutti okkur í Mosó og það var ekkert erfitt að líta svolítið niður á hina bílana, svona þannig. Það var þónokkur bílaumferð í morgun og skrambi hvasst á köflum á Kjalarnesinu. Það vantar alveg annan vindmæli þangað. Þessi eini er staðsettur rétt áður en maður ekur niður í Kollafjörðinn áleiðis í bæinn. Þar er oft hvasst en oft er miklu klikkaðra á milli gangna og Grundarhverfis. Stökk léttilega út úr 27 í Mosó þrátt fyrir að hafa misreiknað fjarlægðina niður, enda hoppið úr mun hærri vagni en venjulega, hálfgerðri fjallarútu, það hefði kostað sjúkrahúsvist á tímabilinu fyrir Betu en ég missteig mig ekki einu sinni núna, bara hló tryllingslega innra með mér yfir þessum bata. Þeir (40-50) sem halda að elli kerling sé farin að angra þá ættu að prófa eitt stykki sjúkraþjálfun áður en lagst er í kör ... 

Elsku Indverjinn minn var í leið 18 og við brostum hvort til annars og buðum góðan dag, ég fattaði þegar ég hafði sleppt orðinu að ég notaði óvart úrdú eins og bjáni. Góðan dag á úrdú táknar nefnilega kjánaprik/geitahland á hindí. Hefði getað orðið alvarleg móðgun en ég bjargaði því með skærum hlátri og orðinu djók, sem táknar það sama á öllum tungumálum heims. 

Ég sat allt of framarlega í vagninum, pínulitla vagninum sem notaður er fyrir leið 18, og sá því miður ekki hvort allir karlarnir mínir væru með, það grillti alla vega hvergi í þann ógreidda. Indversku tölvusnillingarnir fóru óvænt út á sama stað og ég, okkur þýðandanum til mikillar skelfingar, við tókum á rás og hlupum hratt hönd í hönd að bakdyrum hússins okkar og ég opnaði skjálfandi á meðan hann setti sig í karatestellingu. Indverjarnir horfðu vingjarnlega á okkur þegar þeir gengu framhjá, annað hvort svona lúmskir eða bara meinlausir. Slíkir útlendingar eru til, skilst mér.

Þar sem adrenalínið var hvort eð er komið í gang tók ég hringspark (a la Chuck Norris, sjá mynd) á kokkinn þegar ég gekk í gegnum matsalinn og sagði honum að ef hann byði nokkurn tímann aftur upp á „nýja ýsu“ sem væri þannig útlítandi að Guðný spyrði mig hvort þetta væri síld, þá yrði mér að mæta. Það gerðist einmitt á mánudaginn síðasta. Það kreppir víða að og sparnaður orðinn geigvænlegur.

Eigið dásamlegan dag!

 

Rétt veður - röng vindátt

Ansi hvasst hefur verið á Skaganum í kvöld, alla vega hér við sjóinn, og ekki tel ég líklegt að strætó hafi gengið á milli þar sem hviður á Kjalarnesi fóru í um 35 m/sek um níuleytið í kvöld. Sýnist eitthvað hafa dregið úr hviðunum en þetta er ótrúlegt veður svona um mitt sumar. Rétt veður, röng vindátt!

Það hefur verið gaman að fylgjast með veðrinu víða um land á vefmyndavélum frá ýmsum stöðum á vefsíðu sem ég fann í gegnum gestabók Skessuhorns. Hér er hlekkur á síðuna frábæru sem ég á örugglega eftir að nota mikið um ókomna tíð. http://www.danieldesign.se/icelandrightnow.html

Gaman að kíkja til Sandgerðis, Stykkishólms, Reykjavíkur, Grundarfjarðar, Vestmannaeyja, Akureyrar og fleiri staða, bara algjör snilld! Vélin í Stykkishólmi er mjög skemmtileg og sýnir mikið á meðan flestar hinar eru kyrrstæðar, m.a. sú á Akranesi. Það rignir greinilega minnst á Skaganum og Ísafirði, svona miðað við fyrstu flýtirannsóknir. Annars hef ég ekki haft tíma til að leggjast yfir þetta enn, hef verið að vinna í dag og núna er Silent Witness að hefjast á Stöð 2, ætla að reyna að vaka yfir því.

Passið ykkur í vonda veðrinu!

Varað við hvassviðri í kvöld og nótt

Táp og fjör ...

Haustlegt er nú hérna við Langasandinn. Það hvín í öllu í himnaríki sem gerir notalega stemmningu. Ef vindáttin væri vestlæg mætti nú sjá glæstar öldur skvettast á steinana en það bíður bara næsta roks.

Heimsótti pólska lækninn minn undir hádegi til að fá áframhaldandi sjúkraþjálfun og hélt árangursríka ræðu yfir henni um nauðsyn þess að hafa Betu sem fastan lið í lífi mínu á þriðjudögum. Beta hefur unnið algjört kraftaverk og gert mig miklu sprækari. Ég var við það að leggjast í kör eftir óhapp og ekki skánaði ástandið eftir blóðuga slysið á ógæfumölinni um árið. Níu saumför á hægra hné eru til merkis um það. Stríðsáverkar eða íþróttameiðsli kallast þetta núna, fer eftir því hver sér örið.

Nú nánast stekk ég upp í og út úr strætisvögnunum eins og léttfætt hind kvölds og morgna og get eiginlega ekki neytt erfðaprinsinn lengur til að gera öll heimilisverkin. Mér hefur enn um sinn verið forðað frá ótímabærum hrumleika, enda bara fjörutíu plús ... fram í ágúst þegar við Madonna höldum upp á 100 árin.

 Nýi bílstjórinn var í Skrúðgarðinum sem minnti mig á að kaupa græna kortið. Hann er voða hress og verður vonandi áfram í vetur ef Gummi kemur ekki aftur. Ég lagði mitt af mörkum til að halda honum með því að segja honum að hann gæti ómögulega fundið betri og yndislegri og skemmtilegri og fallegri farþega en okkur Skagamenn! Þegar hann er orðinn fastur á önglinum getur maður farið að hreyta í hann ónotum, heimta að hann setji X-ið á hæsta í stað rólegheitanna á Rás 1, bannað honum hörkulega að taka geitunga upp í bílinn, neytt hann til að halda með ÍA og svo til að vera með rauða hárkollu á föstudaginn en þá hefjast Írskir dagar.

Ógreiddi maðurinn og fleira fólk - stuð í strætó

Hoppaði og skoppaði framúr í morgun kl. 7.15, ofsaglöð yfir því að fjandans sumarfríið væri loksins búið. Söng svo hátt "Oh what a beautiful morning" að nágrannarnir vöknuðu líka og urðu rosalega glaðir Já, sjúr. Fyristi dagur eftir þriggja vikna fjarveru hófst bara ágætlega þótt erfitt hafi verið að sofna í gærkvöldi fyrir spennandi bók (Dean Koontz) og útsofelsi í gærmorgun. Nýr strætóbílstjóri er kominn í staðinn fyrir Gumma sem ekur nú um hálendið með túrista, sá nýi hélt að Gummi væri alveg hættur. Þessi nýi virkaði voða hress og indæll, búinn að keyra strætó í áratugi. Hann tók upp mjög fúlan farþega á Kjalarnesinu, eða lítinn geitung sem án efa hefur verið hissa að lenda í Reykjavík og finna ekki búið sitt, múahahahaha. Honum er nær að vera til. Það var frekar svalt í morgun en vá hvað það hefur hlýnað. Við erum að kafna hérna í vinnunni. Ég steingleymdi mér og þurfti næstum að selja flöskur til að geta geta borgað strætófargjaldið, fékk alla vega tíkall lánaðan á stoppistöðinni.

Hitti gamla vinkonu í leið 15, brúna og sæta, nýkomna frá Ítalíu, þar voru engir geitungar. „Ekkert skrýtið,“ sagði hún, Mosóbúinn sjálfur, „þeir eru allir í Reykjavík.“ Tók síðast leið 18 í Ártúni og viti menn, elsku Indverjarnir mínir voru í vagninum, nema „vinur minn“, eða þessi sem spjallaði við í vor. Fátt hefur breyst þótt ég hafi verið óratíma í burtu. Rólegi maðurinn var þarna, reyndar hvorki Sá feimnislegi né þýðandinn en nýr maður hefur bæst við í hópinn: Ógreiddi maðurinn.

Jæja, nóg er að gera. Vona að dagurinn ykkar verði æðislegur!!!

Heilmikill söknuður ...

Fyrir nokkrum árum keypti ég mynd og hengdi hana upp á baðvegg hjá mér. Þetta er þekkt mynd sem sýnir brjálað brim og risaöldu sem næstum gleypir vita.

Vitavörðurinn stendur sallarólegur í dyrunum ... eða hvað? Af einskærum brimsöknuði kíkti ég á elsku youtube og fann m.a. áhugaverðar upplýsingar um þessa mynd og að auki klikkaðislega flott myndband af brimi.

Mjög rólegt hefur verið við Langasandinn í sumar og mig hungar í flott brim. Fæ væntanlega góða útrás fyrir það með því að horfa á þessi flottheit aftur og aftur. Þannig verður líka miklu auðveldara að bíða eftir blessuðum haustlægðunum.

 

Endilega kíkið: http://www.youtube.com/watch?v=fapXUqagiFQ&feature=related

Og hér kemur flotta myndbandið, góða skemmtun:

 

Fimm ógæfudagsetningar og frábært talnaspekidagatal ...

Búin að sitja á svölunum í klukkutíma, vel varin af sólvörn en tók smá pásu af virkilega eðlilegum ástæðum. Hávær sláttuvél frá bænum er í gangi fyrir neðan og að auki er „súkkulaðibíllinn“ mættur með slöngur og dælur til að hreinsa kamrana við Langasand, á hlaðinu hjá mér. Jæks!

Þetta er síðasti virki dagurinn í sumarfríi og mér finnst honum ágætlega varið í sólinni.

Er að lesa einstaklega spennandi bók sem heldur mér rólegri on the svals. Hún er eftir Dean Koontz, heitir Life Expectancy og segir frá Jimmy sem fæðist óveðursnótt nokkra (9. ágúst 1974) á sömu mínútu og afi hans, kökugerðarmeistarinn, deyr. Rétt áður hafði fárveikur afinn, öllum að óvörum, farið að tala og spáð fyrir um nokkra hættulegar dagsetningar í lífi ófædda barnsins og sagt ýmsa hluti sem hann átti ekki að geta vitað. Sömu nótt fæddist annað barn, sonur trúðs við sirkus sem var í heimsókn í bænum, konan dó en barnið lifði. Í reiði sinni og sorg skaut trúðurinn lækni og hjúkku, hljóp út með barnið og hvarf. Pabbi Jimmy hafði reykt með honum á biðstofu feðranna og var hálf smeykur við trúðinn. Honum fannst skrýtið þegar hann skrapp til pabba síns á sama sjúkrahúsi að sá gamli varaði hann við trúðnum ... úps. Nú bíð ég bara eftir því hvað gerðist fyrsta daginn af þessum fimm hræðilegu dögum sem afi Jimmys sagði fyrir um. Elska svona bækur. Þær eru margar góðar eftir Koontz en ein þeirra, Demon Seed, er þó líklega með verri bókum sem ég hef lesið. Vona að Skjaldborg haldi áfram að þýða bækurnar eftir hann og það bara beint í kilju!

Einu sinni skrifaði ég grein um dagsetningar og hvaða orka fylgir hvaða mánaðardegi út frá talnaspekinni. Jú, maður finnur margt á Netinu ... Þetta birtist í Vikunni og hér kemur þetta á blogginu. Dagurinn í dag er t.d. tilvalinn til að hvetja fólk til góðra verka! Góða skemmtun! (Þetta er nú bara samkvæmisleikur ...)

Hvað er best að gera hvenær!

Samkvæmt talnaspekinni hefur hver dagur mánaðarins sína merkingu. Gott er t.d. að prófa eitthvað nýtt fyrsta dag mánaðar og þann tólfta ætti maður að reyna að brjóta upp mynstur, jafnvel breyta atburðarás ef maður getur. Hér kemur listi yfir alla daga mánaðarins og þá orku sem hver þeirra hefur.

1. dagur mánaðar er góður til að prófa eitthvað nýtt, opna fyrir nýjar hugmyndir og breyta aðferðum, jafnvel fá þér nýja klippingu.

2. dag mánaðar skaltu leggja þig fram við að vera samstarfsfús gagnvart fjölskyldu, vinum og samstarfsmönnum.

3. dagur mánaðar er góður til að ræða málin við fjölskyldu, vini og samstarfsmenn.

4. dagur mánaðar er góður til að koma öllu í röð og reglu, bæði í vinnunni og á heimilinu.

5. dag mánaðar er gott að tala hreint út, sleppa tökum og losa sig úr fjötrum.

6. dagur mánaðar er góður til að fást við allt sem tengist tilfinningunum og andlegum málum.

7. dag mánaðar er gott að íhuga og yfirfara verkefni og ljúka við það sem þú hefur á þinni könnu.

8. dag mánaðar er gott að fást við þau mál sem tengjast vinnu, viðskiptum og eigin fjármálum.  

9. dag mánaðar skaltu sýna mannlegu hliðarnar og koma vini og/eða nágranna til hjálpar.

10. dag mánaðar er gott að hefja nýjar áætlanir sem tengjast framtíð þinni.  

11. dagur mánaðar hentar vel til að taka á móti hugljómun og góðum straumum.

12. dag mánaðar er snjallt að nota til að brjóta upp mynstur eða breyta atburðarrás.

13. dagur mánaðar er góður til þess að líta yfir farinn veg og vega og meta árangur þinn.

14. dagur mánaðar er dagur ævintýramennsku, nú er rétti dagurinn til að taka áhættu.

15. dag mánaðar er gott að nýta sér þá kænsku sem þú býrð yfir og taka stjórnina í þínar hendur.

16. dagur mánaðar er dagur mikillar orku og þér gengur vel að ljúka verkefnum þínum.  

17. dagur mánaðar er hentugur til að koma sér á framfæri við aðra.

18. dag mánaðar er gott að horfa jákvæðum augum á líf sitt og umhverfi ... í gegnum rósrauðu gleraugun.

19. dagur mánaðar er sá dagur sem gott er að vera á réttum stað á réttum tíma.

20. dagur mánaðar hentar vel til þess að renna yfir valkostina og velja þann besta.

21. dagur mánaðar er hentugur til að skreppa út fyrir bæinn eða skella sér á spennandi stað, listasafn eða veitingahús.

22. dag mánaðar er gott að taka yfirvegaðar ákvaðanir og finna leiðir til að taka á vanda síðustu daga.

23. dagur mánaðar er vel til þess fallinn að grípa þau tækifæri sem bjóðast.  

24. dagur mánaðar eru dagurinn til að opna nýjar dyr og búa til ný sambönd.  

25. dagur mánaðar er góður til þess að nota orku, kraft og einbeitingu þína í að leysa smáatriðin í lífi þínu.

26. dagur mánaðar er dagur sköpunar og skemmtunar.

27. dagur mánaðar er tilvalinn til að hvetja fólk í kringum þig til góðra verka.

28. dagur mánaðar er góður til að finna nýtt athvarf, t.d. nýtt og spennandi kaffihús.

29. dag mánaðar er gott að nota til að velja bestu tækifærin.

30. dagur mánaðar hentar vel fyrir sjálfsdekur; nudd, snyrtingu eða í heilsulind.

31. dagur mánaðar er rétti dagurinn er til að leggja línurnar í erfiðum málum.

 

Keðjubréf, bæjarferð, Rambo og blúnduhegðun

Þá er ég búin að fá 16 tölvupósta um að kaupa ekki bensín á sumum bensínstöðvum. Ég á ekki bíl! Ég fæ mjög reglulega senda raðpósta, brandara, áskoranir, keðjubréf og fleira. Stundum hef ég sent til baka: „Þetta var 23 bréfið um lífsbaráttu kvenna í Afghanistan, nú hlýt ég að fara að ná þessu!“ Jamm, ég held að ég sé að breytast í nöldurskjóðu. Þetta er ekki illa meint og hvernig á fólk sem ég á í litlum samskiptum við að vita að ég er nauðug á svona 200 póstlistum? M.a. hjá fólki sem ég þekki EKKERT! Ætla að vera jákvæð og hætta að líta á þetta sem ofbeldi. Alltaf gott að láta safna sér. Maður er a.m.k. ekki einmana á meðan maður eyðir t.d. tilkynningum um heppni sína í nígeríska lottóinu, já, það líka.

Við erfðaprins fórum í stutta bæjarferð í dag og ég kíkti aðeins við í vinnuna til að sækja mér blöð. Kvartaði við Vikugellurnar um misbrúnku handleggja og þær hlógu illgirnislega að óláni mínu. Nú fer sumarleyfinu að ljúka ... og líklega góða veðrinu líka. Samkvæmt veðursíðunni minni www.yr.no fer að rigna upp úr helgi. Hægt er að setja velflesta, kannski alla staði Íslands inn og á íslensku, og fá greinargóða veðurspá og langtímaspá. Á ensku eða norsku. Um daginn kíkti ég á „Kleppjárnsreyki“, þar sem sumarbúðirnar eru, (www.sumarbudir.blog.is) á síðunni og spáð var rigningu ... en eintóm sól hefur skinið þar í bráðum þrjár vikur. Stöku skúrir og búið! Mun sannarlega sólbaðast hér á Skaganum á morgun ... og ætla að muna að hylja hægri handlegginn.

 

Við flýttum okkur heim fyrir leikinn ... sem var síðan ekkert rosalega spennandi. Vona að úrslitaleikurinn á sunnudaginn verði betri! Við flýttum okkur líka heim því að við héldum að Bjartur gestaköttur yrði sóttur í kvöld en Sigþór „pabbi hans“ hringdi snemma í kvöld og sagði að það yrði seinnipartinn á morgun (föstudag, já, ég er að blogga um miðja nótt)

Hér var horft á Rambo á vídjó í kvöld, rosaleg mynd. Mér fannst hún þrælgóð en þurfti nokkrum sinnum að loka augunum yfir ofbeldisfyllstu atriðunum. Einhver smá blúnda í mér.

Sá fyrr í vikunni Sense and Sensibility (BBC-þættina) og fannst það ekkert leiðinlegt. Einhver gömul væmni virðist vera að taka sig upp án nokkurrar ástæðu. Veit ekki hvar þetta endar. Þið hnippið kannski í mig kæru bloggvinir þegar ég fer að skrifa um fótbolta og Formúlu af viðbjóði!