Stóra samsærið

Gerið þið ykkur grein fyrir því að auðjöfrar láta reglulega framleiða bíómyndir og sjónvarpsþætti sem fjalla um þá óhamingju sem peningar færa venjulegu fólki? Enn ein þáttaröðin fer að hefjast á einhverri stöðinni um þann hrylling sem stór happdrættisvinningur hefur í för með sér fyrir nóboddía. Við horfum, sannfærumst og verðum hamingjusamari í óríkidæmi okkar. (Sælir eru fátækir) Þannig haldast peningarnir á „sínum stað“. Ef ég verð myrt þá vitið þið hvers vegna.

--------        ------------        ------------         ------------ 

Samkvæmt bíórythmanum http://www.bio-chart.com/ skora ég frekar hátt vitsmunalega þessa dagana, heilsan er góð en tilfinningalífið í rúst. Greinilega kjöraðstæður til að komast að svona greindarlegri niðurstöðu. Vildi bara deila þessu. Ekki trúa öllu því sem þið sjáið í sjónvarpinu. Í vitlausa veðrinu á mánudaginn ætlar Inga að keyra mig heim. Bíltúrarnir okkar í óveðrum undanfarið eru eina von hennar (okkar) til að kynnast huggulegum björgunarsveitamönnum. Annars lét Inga happ úr hendi sleppa þegar hún keyrði nýlega upp á hringtorg til að forða bílnum sínum (og okkur) frá nánum kynnum við trukk. Hvað veit hún nema draumaprinsinn hafi setið undir stýri. Örlögin eru örugglega alltaf að færa okkur menn en við tökum aldrei eftir þeim. Inga sagði mér í símanum áðan að hún væri vitsmunalega á botninum skv. bíórytmanum en ætlaði samt upp á Skaga á mánudaginn. Þetta verður söguleg ferð, önnur heimsk og hin í andlegri rúst.

Fann gamalt uppáhaldslag á elsku youtube.com. Datt samstundis rúm 30 ár aftur í tímann. Skemmtilegt lag sem ég var búin að steingleyma. Sylvia var líka skemmtilegt lag. Enjoy, rokkarar!
http://www.youtube.com/watch?v=cIqzRaHbKQY

Blaut rigning og dimmt myrkur en frábær föstudagur!

Setti allt mitt móðureðli og móðureyra á gemsann minn í morgun, þrítékkaði á honum hvort væri nokkuð komið BDSMS um drossíuferð í bæinn en Ásta hvorki sendi slíkt né var í strætó. Það rigndi þvílíkt hrikalega mikið og þar sem rigning á Íslandi er yfirleitt lárétt og hraðgeng þá er maður ekkert orðinn háður regnhlífum eins og t.d. Bretarnir. Samt á ég eina sem ég keypti í útlöndum. Sigþóra settist hjá mér og saman dormuðum við í sæluvímu á meðan Heimir kom okkur á áfrangastað. Mér tókst að séðogheyrta hann við brottför, enda stoppaði hann ekki á sama stað og Gummi Hafnifirðingu og Rvíkurbílstjórarnir, eða nálægt brúnni og þar sem brekkan er hæst. Nei, Heimir fær ekkert kikk út úr því að sjá virðulegar kerlingar rúlla niður háa vegkanta ... eða ganga langar leiðir til að komast hjá því að rúlla. Þess vegna héldum við Sigþóra virðingu okkar í morgun. Rigningin var ögn blautari á Skaganum í morgun og því urðum við ekki rennblautar á leið upp brekkuna ... en myrkrið var ögn dekkra í borginni og því mikill draugagangur á leiðinni. Ætla ekki að hræða bloggvini mína með hroðalegum sögum af glamrandi hlekkjum og klípandi kjúkum í rennisteininum. Slíkt bara gerir maður ekki á föstudegi. Við flýttum okkur svo mikið að við vorum komnar fyrir kl. 7 í vinnuna þótt strætó hafi ekki verið í Rvk fyrr en um 7.23. Í draugagangi virkar tíminn öðruvísi.

Mía systir og Sigþór, hæstvirtur eiginmaður, eru í London og fara á West Ham-leik á sunnudaginn. Ég er barnapían á meðan og Bjartur terroríserar kettina mína fram á mánudag, þriðjudag. Þau hringdu í gærkvöldi til að athuga hvernig Bjarti liði ... ég hélt að ég væri kattakerling! Áfram West Ham!!! 

Æsandi hryllingsblogg með erótísku ívafi

Fékk svona BDSMS frá Ástu í morgun um drossíufar en Ásta hélt samt að við kæmumst ekki í bæinn vegna hvassviðris. Ég trúi á veðurmælinn á Kjalarnesinu (þótt mætti setja upp annan rétt sunnan við göngin) og sagði henni að hviðurnar næðu ekki einu sinni 30 m/sek. „Drífðu þig bara, kjéddlíng,“ sagði ég og fór að búa til latte fyrir okkur. Ferðin gekk glimrandi vel en greinilega ekki hjá öllum ... við ókum fram á bilaðan aukastrætó milli Mosó og Rvk. Farþegarnir voru horfnir. Hvað er í gangi? Okkur Skagamönnum hefur reyndar snarfækkað undanfarna daga, alveg úr 6.243 íbúum niður í 2.585. Skyldu geimverur hafa étið farþegana? Hvers vegna sleppur bílstjórinn alltaf? Já, Ásta hefur væntanlega bjargað mér frá skelfilegum örlögum með því að senda mér þetta BjargardeginumSMS.

Sótti útprentaðar blaðsíður af tilvonandi næstu Viku í prentarann áðan og sá að guðdómlega lífsreynslusagan er m.a. tilbúin og ... líka sitthvað fleira sem ekki tengist virðulegu fjölskyldublaði, heldur dónablaði sem heitir B&B. Ég argaði upp yfir mig, ekki af hræðslu, kommon ég er lífsreynd. Þegar öryggisverðirnir komu hlaupandi (því miður alltaf tveir saman) var ég orðin róleg. Þeir slefuðu af leiðindum þegar þeir sáu klámsíðurnar og sögðust óttast mun meira dulbúna klámið, m.a. í tónlistarmyndböndum og í "sárasaklausum" bæklingum. Ég rétti úr mér aftur, þar sem ég stóð ögrandi við prentarann, þurrkaði votar varir og lokaði munninum. Ekki stund, ekki staður ...

Enn einn æsispennandi morguninn er sem sagt runninn upp. Hvað gerist í tíukaffinu? Mun Eiríkur  hreyfa augun getnaðarlega við vatnskælinn? Horfir nýi maðurinn áfergjulega á mig þegar ég fæ mér espressó með G-mjólk(urstreng) út í? Hvað ætli verði í hádegismatinn hér í Lynghálsinum? Kannski ostrur og hvítvín? Missið alls ekki af næstu færslu um Dindlana í Hálsaskógi!!!

Hringtorg óttans ... Sódóma Skagans ... Árni spennunnar

Við Inga brenndum á Skagann seinnipartinn og komumst aldeilis í hann krappan á leiðinni. Við stefndum inn í innri hring í einu af hringtorgunum í Mosfellsbæ og risastór trukkur með langan vagn (án yfirbyggingar) tók sömu ákvörðun nema hann fór í ytri hring á fleygiferð, já, og þann innri líka. Ef Inga hefði ekki skellt sér upp á hringtorgið og stoppað bílinn værum við ekki enn komnar upp á Skaga, mun líklega komnar á séns niðri á löggustöð ... eða spítala, slík var ferðin á trukknum. Frábær bílstjóri hún Inga og með fjarlægðaskynjunina í góðu standi.

Erfðaprinsinn skrapp á Mörkina (sódómugómorrustað okkar Skagamanna, beint á móti kirkjunni) til að horfa á landsleikinn og á meðan fær Jónas að leika sér í himnaríki. Ég hreinsaði hann vel áður og þessi elska kann að meta það og leggur ekki lengur ganginn í einelti, heldur alla íbúðina.

Fékk nýju bókina hans Árna Þórarinssonar í hendur í dag og eina ástæðan fyrir því að ég er að blogga núna en ekki lesa er sú að ég er að hlusta á fréttirnar á Stöð 2, skylduna. Svo verður lesið.

Viðbót: Ég hvet alla til að skrifa undir áskorun til stjórnvalda, sjá meira um málið hjá Ásdísi. Sett hér undirskriftahlekkinn og hlekkinn að síðu Ásdísar:

 

http://www.petitiononline.com/lidsauki/petition-sign.html?

http://asdisomar.blog.is/blog/asdisomar/

 

Af óvissuferð og risakjötbollum ...

Eftir að ég heyrði utan af mér í morgun setningar á borð við: „Veistu hver ældi í rútunni?“... „xxxxx pissaði óvart á mig í myrkrinu.“ og „Hver fleygði forstjóranum í Hvítá?“ held ég að ég ætti að dauðskammast mín fyrir að hafa ekki farið í óvissuferðina á laugardaginn. Mér skilst á öllu að þetta hafi verið mjög skemmtileg ferð, river-rafting, heitir pottar, gufa og grillmatur á Drumboddsstöðum á eftir. Og drukkið! Jamm. Ef þetta hefði nú verið kaffismökkunarferð ...

Rosalega voru kjötbollurnar stórar í hádeginu og kartöflurnar litlar. Soldið asnalegt að sjá diskinn eftir að hafa fengið sér tvær og tvær. Múlakaffi vs frönsk matargerð ...

 

Viti dagsins fannst á google.com.

Komið út úr skápnum ... sjokkerandi afhjúpanir á föstudegi

Jú, jú, strætó fór í morgun en Ástu tókst að ræna mér frá Tomma á síðustu stundu. Þetta er að verða eins og ástarþríhyrningur ... alla vega Ástuþríhyrningur. Var komin í bomsurnar með kaffið í aðra og Moggann í hina þegar SMS-ið góða birtist: Er á bíl. Þótt ég sakni Tomma og strætó voðalega þá vil ég ekki verða að athlægi hjá elítunni á Akranesi með því að senda til baka: Sorrí, ætla frekar að taka strætó, ekkert persónulegt.

------      -----------          -----------         ------------

Einu sinni, fyrir SVO stuttu, var ég gleymd og grafin fyrrum æðisleg útvarpsstjarna ... meira að segja bestu vinir mínir heilsuðu mér ekki lengur á götu. Það hefur eitthvað breyst. Síðustu vikur og mánuði fæ ég reglulega spennandi tilboð frá fjölmiðlum og er m.a. beðin um að segja álit mitt á mikilvægum málum, eins og bókmenntum, strætóferðum, sparnaði við að eiga ekki bíl, Bítlunum og svona. Kíkið bara í helgarblöðin núna (24 stundir og Moggann) ef þið trúið mér ekki. Þótt ég sé Ljón, sem Halla frænka segir að sé athyglissjúkt, þá er það alls ekki málið, ég ætla að koma mér í íslenska Fokker-liðið. Ákvað þetta endanlega  þegar ég fékk EKKI boðskort út í Viðey og þurfti að sitja grátandi heima með allt of dauf gleraugu. Þannig að ef áætlun mín gengur upp verður ekkert dagblað, tímarit, dagskrárblað og bæklingar án þess að ég láti þar ljós mitt skína á greindarlegan hátt. Á endanum verð ég orðin ómissandi í öllum fínu boðunum og get líka farið milli landa á puttanum þegar nýju vinirnir mínir eiga leið um flugvöllinn og svona. Hélduð þið virkilega að það væri tilviljun að ég keypti íbúð við hliðina á þyrlupallinum á Akranesi? Kjánaprikin ykkar.

Vona samt, kæru öreigar/lýður/almenningur og það allt að dagurinn ykkar verði þrusugóður. Dagurinn minn verður alla vega góður og ég fæ far heim seinnipartinn. Inga viknaði nefnilega þegar hún las átakanlega færslu um að ég kæmist kannski ekki heim í kvöld og ætlar að skutlast með mig á Skagann þótt ég hafi þegar sagt henni að rokið verði ögn minna en áætlað var og valdi ekki ófæruhviðum á Kjalarnesinu. Ef ég væri ekki svona rækilega gagnkynhneigð, og hún líka, myndi ég giftast henni, svei mér þá!

P.s. Viðbót: Leikfangaframleiðanda nokkrum datt í hug að bjóða upp á "snjallt" dót fyrir litlar stelpur. Svona súludans-kit. Tesco-búðakeðjan í Bretlandi seldi þetta ... kíkið á fréttina, við erum eiginlega í losti hérna á Vikunni:

http://www.dailymail.co.uk/pages/live/articles/news/news.html?in_article_id=412195&in_page_id=17

Óvitar; samsæri OR og kristilegar sumarbúðir

Þegar við Sigþóra ókum frá himnaríki rétt fyrir sjö sáum við tvo karla híma á stoppistöðinni minni, karla sem hefðu átt að vera í göngunum á þessum tíma. Kannski sváfu þeir yfir sig og biðu eftir næsta (eftir 40 mín), kannski svaf bílstjórinn yfir sig af því að það var rafmagnslaust í hálftíma í nótt. Allar vekjaraklukkur í rugli á Skaganum. Aðvörunarmiði um það kom í póstkassann gær, já og svo verður heitavatnslaust í kvöld, ekkert kvöldbað fyrir frúna. Er verið að búa okkur Skagamenn undir orkuskömmtun? Er eitthvað í gangi hjá Orkuveitunni? Ætli eigi að sýna okkur með þessu hvað það skiptir miklu máli að hafa rafmagn og heitt vatn, hækka svo gjaldið sem við borgum síðan glöð því að búið er að sýna okkur hvað orkan er nauðsynleg .... Vekjaraklukkan mín blikkaði krúttlega í morgun og var gjörsamlega út úr kú, blessunin. Það var Síminn sem bjargaði mér. Í gærkvöldi gerði ég nefnlega eftirfarandi: *55*0615# og Síminn hringdi í símann minn á sekúndunni 6.15 í morgun. Íbúfen var síðan málið og góður latte.

Þokan var ógurlega grunsamleg í morgun og jókst eftir því sem við nálguðumst ástkæra höfuðborgina. Sigþóra fáránlega hress á jeppanum hans sonar síns, enda virkilega vel útsofin, ég aftur á móti VARÐ að horfa á heimildamyndina um kristilegu innrætingarbúðirnar sem var á dagskrá undir miðnætti í gær. Takk RÚV, frábær mynd, seint á ferð, ógnvekjandi og sorgleg. Eins gott að Hilda systir rekur sumarbúðir sem eru hlutlausar í trúmálum ...  Sigþóra spilaði geisladiskinn úr Óvitum á leiðinni en sonur Sigþóru, frábær leikari er einn leikaranna í Óvitum. Syngur líka eins og engill. Tónlistin í Óvitum er mjög skemmtileg og Sigþóra sagði að hún lífgaði ótrúlega mikið upp á sýninguna, auðvitað er hún búin að sjá hana, annað hvort væri það nú!

Myndin af Vatnaskógi tengist þessu auðvitað ekki neitt, eða hvað? Ég er orðin mjög tortryggin, sérstaklega vegna þokunnar í morgun. Er verið að kasta þoku í augu okkar. En pælið í þessu: Orkuveitan tekur rafmagn af mér í gærkvöldi, RÚV sýnir mynd um kristilegar sumarbúðir FIMM klukkutímum áður en rafmagnið (orkan) er tekið af. Svo undarlega sem það virðist þá er ÍTR er staðsett í Orkuveituhúsinu og veitti KFUM í Vatnaskógi, kristilegum sumarbúðum, nýlega styrk upp á FIMMtíu milljónir til að byggja nýja skála. Þetta hefði ég ekki fattað ef rafmagnið hefði ekki verið tekið og heimildamyndin sýnd. Jamm, best að fara að vinna og grafa upp fleiri samsæri í leiðinni.

Smitandi friðarsúla

Öldurnar hafa verið svo háværar í kvöld og leitt að geta ekki séð þær. Það hefði verið snjallt að flytja ljóskastarann í sundlauginni hér á Skaganum (þennan sem blindar mig þegar ég sit við borðstofuborðið) við Langasandinn og beina honum út að sjó. Þessu er hér með komið á framfæri. Ljóskastarinn hefur löngum angrað mig, enda fyndist mér réttara að láta hann lýsa á sundlaugarsvæðið, ekki í augu fólks í himnaríki.

Sigþóra var á miklum kagga í dag, bíl sonar síns, og bauð mér far heim. Það var skrambi notalegt. Annars var gott að hvíla í örmum Ástu í strætó í morgun en það var frekar kalt á leiðinni upp brekkuna, það er komið vettlingaveður. Ég kvíði oggulítið fyrir föstudagsveðrinu en þá verður hvasst og erfið vindátt fyrir strætó. Frekar fúlt að komast ekki heim í helgarfrí fyrir hviðum. Get fylgst vel með á www.yr.no - æðislegu veðursíðunni minni.

Held að friðarsúlan hennar Yoko Ono hafi þegar haft góð áhrif. A.m.k. gerði reykurinn úr sementsverksmiðjunni heiðarlega tilraun til að herma eftir henni og stóð þráðbeint upp í loftið þegar við Sigþóra ókum inn á Skagann í dag. Skil ekki hvers vegna fólk heldur að það sé alltaf rok hérna. Skagalognið er frægt víða um heim.  

Hviðu- og karlablogg

Það var svo hvasst í morgun að við Ásta þorðum ekki að dorma í strætó, heldur þyngdum að vanda í okkur pundið með því að gera okkur stífar. Heimir var rosalega þakklátur, þessi elska. Mikið held ég að það myndi auka á öryggið ef hviðumælir yrði settur upp við Akrafjallsveg (þar sem rúta fauk út af fyrir nokkrum árum og fólk slasaðist) og líka á milli ganganna og byggðarinnar á Kjalarnesi. Eini hviðumælirinn er  staðsettur skömmu áður en haldið er niður í Kollafjörð (á suðurleið) og stundum er hreinlega logn þar þegar við feykjumst til hliðanna á öðrum stöðum á leiðinni. Jamm, best að hafa samband við Vegagerðina, þar vinna víst sætir karlar! Ég er meira en til í að fórna mér og fara á stefnumót með þeim ef þarf til að koma upp fleiri mælum, yrði mér bara sönn ánægja.

Maðurinn á Merrild-bílnum var hvergi sjáanlegur íþegar ég gekk upp brekkuna. Hann þarf ekkert að vera hræddur. Það eru mörg ár síðan ég hef kastað mér á sendiferðabílstjóra á ferð í djörfum tilgangi, mér finnst vera komið að strákunum að stíga fyrsta skrefið núna.

Jæja, hafið það gott í dag, illskurnar mínar. Múahahahah

Sein Miss Marple og dularfulla farþegahvarfið ...

Mikið var gott að geta bara skrifað sápuóperu á bloggið um helgina. Það losaði mig undan því að þurfa að lenda jafnvel í hættulegum ævintýrum til að skrifa um. Held að þið vitið ekki hvað ég fórna mér fyrir þetta blogg og ylhýra bloggvini mína; ævintýri á strætóför, daðra við tæknimenn ... horfa á Bold and the Beautiful og allt. Það var nú bara letilegur sloppadagur í gær af þessum sökum, ég steingleymdi algjörlega að klæða mig, sem kom sér vel í gærkvöldi þegar ég þurfti ekki að fara að hátta og ansi fljótlegt var líka að fara í bað.

Við Ásta ókum fram hjá tómum Skagastrætó á leiðinni, litum hræddar, óttaslegnar og skelfingu lostnar hvor á aðra og fengum hroll. Báðar mundum við eftir Stephen King-bókinni FURÐUFLUG þar sem farþegarnir sem voru vakandi í flugvélinni hurfu endanlega en þeir sem sofnuðu hurfu ekki, heldur lentu í óhugnanlegu ævintýri þar sem svarthol kom m.a. við sögu (er ekki að tala um svæðið í kringum 101 Reykjavík). Held að þetta hafi ekki gerst í morgun, þá hefði Sigþóra átt að sjást, hún sofnar alltaf í strætó.

------       ----------        --------------          ---------         ---------     -----

Næstsíðasti frábæri atburður helgarinnar var þegar SMS kom frá Ástu um drossíufar í morgun og sá síðasti var Miss Marple þáttur á Stöð 2. Hann var ekki búinn fyrr en kl. 1 í nótt og nú er ég með hausverk. Vildi að þessir viðbjóðslegu fokkings Tudor-þættir um eiginkonumorðingjann Hinrik VIII hætti svo að ég geti farið að sofa klukkutíma fyrr, Miss Marple-myndirnar eru alveg frábærar, nema ALLT of seint á dagskrá sunnudagskvöldanna. Annars var lögfræðingaspennuþáttaröðin sem hófst á Stöð 2 í gærkvöldi (á eftir Monk) alveg ferlega spennandi, mæli með honum.

Eigið góðan, frábæran, æðislegan dag! Mæli svo um og legg á!!!