Litla stúlkan með kveikjarakassann ...

Vildi bara leiðrétta það hér og nú að ég er ekki á tónleikaferðalagi um heiminn, eins og örugglega allir hafa haldið. Nú er ég orðin öllu meiri tenór og bassi og gæti stofnað karlakór. Undarleg óhljóð í bland við snýtingar, dæs og andvörp, sérstaklega þegar erfðaprinsinn heyrir til. Hann dekrar móður sína sem hefur setið við tölvuna með hléum í dag og skrifað ómótstæðilegar greinar. Flottu nefdroparnir frá Ameríku, þessir með cayenne-piparnum, eru orðnir hálfbitlausir, enda tveggja ára gamlir. Er að hugsa um að hringja í samstarfskonu mína sem lumar á ammrískum kveflyfjum þar sem ein tafla sameinar verkjalyf, nefdropa, hóstamixtúru og sætt knús, og biðja hana um að koma með í vinnuna á morgun. Eins og við erum ammrísk þjóð þá skil ég ekki af hverju við fáum seríos og allt slíkt en ekki svona lyf, hvaða hagsmunir ætli séu hafðir í huga í því sambandi?

Ákvað að það hlyti að vera einstaklega hollt og heilandi að fara í heitt bað. Ætlaði að láta renna en það koma bara nokkrir kaldir dropar. Með kænsku og aðstoð erfðaprinsins látum við heita vatnið renna í eldhúsinu og baðvaskinum því að það virðist hafa einhver áhrif. Gleymi alltaf að tala við húsfélagsstjórnina, æ, ég er víst í henni sjálf ... Það koma ekki jól nema hægt sé að fara í jólabað ... eins gott að þetta verði í lagi. Ef ég geng út á næsta ári (eins og spákonan sagði) þá panta ég pípara eða smið, það dugir ekkert minna. 

Nú er elsku erfðaprinsinn að ryksuga niður tröppurnar frammi, niður að næstu hæð. Kubbur hvarf inn í skáp þegar ryksugan fór í gang, Tommi fylgist spenntur með. Held að drengurinn sé gott mannsefni, ekki datt mér í hug að biðja hann um þetta. 

Athugasemdir

[Sigurbjörg Sigurðardóttir, 16.12.2007 kl. 18:51]

Láttu þér líða vel.Alltaf gaman að kíkja í bloggið þitt.

[Þröstur Unnar, 16.12.2007 kl. 19:01]

Já, átti nú ekki von á þér fyrr en eftir jól, úr tónleikaferðalaginu.

Sko, bara út að skokka þá losnar allt kvef.

[Ásdís Sigurðardóttir, 16.12.2007 kl. 20:10]

Ég sé fyrir mér að kona eins og þú eigir að eiga eldgamalt frístandandi baðkar og svo einhvern til að hella yfir þig passlega heitu vatni og nudda bak þitt ofl.  þá yrði nú allt kvef fljótlega á brott.   

[Jenný Anna Baldursdóttir, 16.12.2007 kl. 21:56]

Það er bara að vera heima á morgun Gurrí mín, ekki vaða of snemma til vinnu.  Stórhættulegt.

P.s. held að það sé verið að hugsa um hag lyfsala (með því að flytja ekki inn lyfið góða) og tannlækna (fyrir að flytja inn Cocoa Puffs).

Jabb, heldða, ég sverða.

[Anna Ólafsdóttir Björnsson, 16.12.2007 kl. 23:00]

Æææ þú líka! Þetta eru ekkert sniðugar pestir. Var í skírn í gær (hefði ekki átt að mæta, en mig langaði svooooo) og þar voru tvær læknar, ,,auðvitað" hvort tveggja ungar konur, sem voru nýskriðnar upp úr 14 daga pestum, en ég hélt að svona væri alltaf bara vika, max, og ætlaði því að vera komin á fætur. Búin að mæta í eitt próf veik (slapp bara vel) en ég held ég fari ekki í annað. Notaðu baðbomburnar, því þú átt varabirgðir sem mæta óinnpakkaðar með jólapakkanum þínum!!!! svo þú haldir ekki að við séum að halda þeim frá þér til að spara jólagjafainnkaup. Ónei, svoleiðis munum við ekki verða uppvís að, þannig að kláraðu birgðirnar, meira á leiðinni!!!!

[Anna Ólafsdóttir Björnsson, 16.12.2007 kl. 23:02]

Gleymdi að segja þér aðferðina: Sjóða fullt af vatni í öllum pottunum þínum og demba ofan í baðið, allt í lagi þótt það taki nokkrar lagnir. Fylla svo upp með köldu ef með þarf. Klikkar ekki (heldurðu að maður hafi ekki lent í ýmsu?)!!!

[Fishandchips, 17.12.2007 kl. 00:24]

Úbbs, las fyrirsögnina sem litla stúlkan með kveikjararassinn Smá lesblinda í gangi

[Vera Knútsdóttir, 17.12.2007 kl. 00:48]

Ég kíki alltaf reglulega á bloggið hjá þér, alltaf jafn gaman að lesa færslurnar þínar

Ég mæli með sólhatti og c-vítamíni, ég náði mér uppúr þessu á viku með því. Láttu svo erfðaprinsinn dekra við mömmusín

[Þórarinn Þ Gíslason (IP-tala skráð) 17.12.2007 kl. 04:21]

Þetta með kvefið.

Einn hvítlauksgeiri lagður á disk og yfir hann skal strá cyenne pipar þar til ekki sést í laukinn.

 Eftir smástund skal hella Norskum brjóstdropum yfir og þegar þetta er búið að vera á disknum í sex tíma,

þá er þér batnað.

[Adda bloggar, 17.12.2007 kl. 10:05]

komnar myndir af nýja prinsinum.kvitt og knús

[Guðmundur G. Hreiðarsson (IP-tala skráð) 17.12.2007 kl. 11:28]

Það stoðar nú lítið að panta sér iðnaðarmann. Heyrst hefur að skósmiðir gangi í götugum skóm.

Kveðja frá iðnaðarmanni. 

[krossgata, 17.12.2007 kl. 12:58]

Þú ættir nú að panta viðtal hjá þér og ræða þessi pípulagningamál alvarlega.  Þú sem húsfélagsstjórn getur ekki boðið þér upp á svona ástand um jólin. 

[Steingerður Steinarsdóttir, 17.12.2007 kl. 14:46]

Ég var að stíga upp úr þessari flensu. Vona sannarlega að þú farir vel út úr henni. Ég er búin að éta þvílík býsn af sólhatti að ég er komin með ógeð.

[Guðrún Jóhannesdóttir, 18.12.2007 kl. 00:48]

[svana (IP-tala skráð) 18.12.2007 kl. 09:49]

Bara að senda litla jólakveðju frá mér.

hafðu það sem allra best um jólin og láttu þér nú batna.

kveðja tanta Svana

[Fjóla Æ., 18.12.2007 kl. 14:20]

Ef þú gefur út geisladisk þá ætla ég að kaupa hann.

Batni þér sem allra fyrst. Ég skal reyna að senda bata og hreystisstrauma yfir hafið til þín. (Fæ smá aðstoð því vindurinn liggur yfir til þín).