Stóra spariástin í afmælinu hennar Nönnu!

Fór í æðislegt afmæli kl. 18 hjá Nönnu Rögnvaldar, matargúrú og dönskusnillingi æsku minnar. Nanna þekkir bara skemmtilegt fólk og það var hálfspælandi að þegar ein af stóru ástunum í lífi mínu, Ævar Örn Jósefsson, gekk í bæinn var ég að fara heim (strætó, maður) Hann heilsaði þó með virktum og spjallaði smá ... já, hann les bloggsíður, ég komst að því. Ef  hann vantar t.d. spennandi morðstað fyrir næstu bók þá sting ég hér með upp á Skagastrætó. Ég skal gefa allar upplýsingar hvenær sem er ... er með öll smáatriði á hreinu!  

Þarf reyndar að útskýra þetta með ástina sem ég ber til Ævars ... þetta er svona spariást sem brennur heitast um jól og páska! Um jólin er hann í gervi uppáhaldsrithöfundarins míns og um páska stýrir hann skemmtilegasta útvarpsþætti í heimi, spurningaþætti fjölmiðlanna. Í fjöldamörg ár hef ég hlustað á þessa þætti (kl. 13-14) á skírdag, föstudaginn langa, páskadag og annan í páskum! Stundum hef ég orðið mér til skammar í fínum spariheimsóknum, t.d. hjá Hildu systur, með því að fá lánað útvarpstæki og loka mig af þennan klukkutíma! Það eru engir páskar hjá mér nema ég hlusti á þennan þátt! Prófið bara jól án jólapakka!
 

Kannski fær Vikan einhvern tíma að vera með í keppninni ... það væri gaman. Það hefði verið gaman að fara t.d. með Steingerði þegar hún vann á Vikunni ... hún er nörd, enginn kemur að tómum kofanum hjá henni í landafræði, Íslendingasögunum, þjóðsögum, kvikmyndum ... ofl. Ég væri fín í spurningum sem má svara t.d. með þessu:

„Póstnúmerið á Hvolsvelli? Það er 860!“
„Þetta er úr áttunda kaflanum úr Stabat Mater eftir Pergolesi!“
„Átján!“
„Gamla símanúmerið hjá DV var 27022?“
„100 gráður.“

 

Maturinn hjá Nönnu var engu líkur ... eftir nokkrar ferðir hætti ég bara að þykjast vera að sækja fyrir Önnu, Hildigunni, Ævar Örn, Eirík, Heklu, Nanní, Guðnýu, Guðrúnu Bóasar, Elvar, Jude Law, Úlf, Sólveigu og fleiri ... stóð bara við borðið og hámaði í mig ...

Verst að myndavélin mín er batteríslaus, annars hefði ég smellt af myndum. Mun ekki klikka á því á 100 ára afmæli Nönnu!  

Athugasemdir

[Hugarfluga, 23.3.2007 kl. 22:45]

Vissi ekki um spurningaþátt fjölmiðlanna, en ætla svo sannarlega að hlusta um páskana. Hef rosalega gaman af heilabrotum af öllu tæi ... þ.m.t. spurningakeppnum. Horfðirðu á Gettu betur fyrr í kvöld? Þvílík spenna og ótrúlega klárir krakkar!

[Guðný Anna Arnþórsdóttir, 23.3.2007 kl. 22:48]

Flott mynd af Steingerði. Legg ekki mat á Ævar Örn og hinn þarna, hvað hann nú heitir (þessi sem er ógáfulegur....)  Ammæli hjá Matargúrú á Skólavörðuholtinu, vá....

[Guðríður Hrefna Haraldsdóttir, 23.3.2007 kl. 22:53]

Þessi ógáfulegi heitir Jude Law.

Ég snarmissti af Gettu betur, var í strætó á heimleið úr amlinu! Held að ég hljóti að geta horft á hann á Netinu!  

[Anna Ólafsdóttir Björnsson, 23.3.2007 kl. 23:16]

Reyni markvisst að ánetjast ekki spurningakeppni af neinu tagi, þótt mér finnist þær skemmtilegar. Þær eru illa ávanabindandi og það eina sem mig vantar ekki eru ávanar. En hins vegar hef ég oft dottið ofan í þessar páskagetraunir og þær eru auðvitað frábærar. Þessa páska ætla ég hins vegar að vera í systrafélagi í Ameríku og hlakka mikið til. En Gurrí, við verðum að fara að hittast!!!!

[Guðríður Hrefna Haraldsdóttir, 23.3.2007 kl. 23:25]

Já, Anna!!! Við verðum!!!!! Líst vel á systrafélagshittinginn í Ammmríkunni, þú gætir samt alveg hlustað á spurningaþáttinn á Netinu þaðan. Hehehehhe

[Jenný Anna Baldursdóttir, 23.3.2007 kl. 23:25]

Þú ert meistari í að skapa stemmingu Gurrí.  Takk fyrir að gleðja mig með reglulegum pistlum þínum.

Í gegnum lesturinn hef ég ma fengið staðfest þá trú mína að strætóferðir séu skemmtilegustu ferðirnar.

[www.zordis.com, 24.3.2007 kl. 08:34]

Það jafnast ekki neitt á við the real thing!    (hér tala ég nottttl eins og við Gurrí séum eitt ...)

[Hólmgeir Karlsson, 24.3.2007 kl. 11:06]

Nanna er algjör snillingur. Ég gleymi seint kynnum mínum af henni þegar ég fékk hana til að dikta upp ótrúlegustu hluti úr KEA-skyrinu, allar snilldar sósurnar "fitulausar" og hollar náttúrulega ... en betri en þær sem eru löðrandi í kaloríum. Hún er listamaður í sínu fagi ,....  Það var alveg yndislegt þegar ég hitti hana fyrst til að smakka sósurnar góðu,.. hún var með heilan pappakassa í fanginu fullan af litlum skálum með allskonar afbrigðum af sósum,...  og hún lifði sig svo inní hlutina að hún hafði varla stjórn á sér því svo mikið lá á að smakka allt og láta mig smakka.
Með afmæliskveðju ;)

[Hrönn Sigurðardóttir, 24.3.2007 kl. 14:59]

Tek undir mér þér að spurningaþáttur fjölmiðlanna er frábær þáttur. Bezt ég bæti Ævari á listann yfir uppáhaldsmennina í lífi mínu. Skrifar góðar bækur er skemmtilegur að ógleymdu því hvað hann er gáfulegur  

[Steingerður Steinarsdóttir, 26.3.2007 kl. 10:54]

Ég fór einu sinni í spurningakeppni fjölmiðlanna með Jóhönnu og við komumst í fjögurra liða úrslit. Væri alveg til í að fara með þér elsku Gurrí mín. Við myndum rúst'essu. Hins vegar verð ég að viðurkenna að ég þrái að verða kúl eins og Jón Gnarr og geta sagt: Ég var einu sinni Nörd.