Sjálfhverfa í sjónvarpi og fluga á fundarvegg ...

24.1.2007 | 20:46

Sjálfhverfa í sjónvarpi og fluga á fundarvegg ...

Er þessi aðdáun Opruh Winfrey á Opruh Winfrey hallærisleg eða bara vandræðaleg? Í kvöld var þáttur Opruh helgaður leik Opruh í bíómynd! Einu sinni var þáttur helgaður örlæti Opruh og þá gaf hún þakklátum áhorfendaskaranum dýrar gjafir og laut höfði hógvær þegar konurnar grétu og tættu á sér hárið í geðshræringu og gleði.

Ég sé þessa þætti afar sjaldan, enda eru þeir leifar af Stelpustöð, misheppnuðustu hugmynd Stöðvar 2 sem fólst í því að troða efni fyrir konur á eitt kvöld í viku. Konur á Stöð 2 mótmæltu (frétti ég) en einhverjum fylltum jakkafötum þótti þetta víst of góð hugmynd til að sleppa henni.

Fundur markaðs- og dagskrárdeilda ótilgreindan dag í fortíðinni:

Ciggi: Gott að þið takið hugmyndinni minni svona vel, held að hún sé snilld!
Addi: Setjum Jóa Fel á dagskrá þennan dag, allar konur eru vitlausar í hann!
Biggi: Ja, eða einhvern annan matreiðsluþátt, það getur ekki klikkað. Konur elska að elda.
Addi: Sjitt að RÚV eigi Bráðavaktina en það hljóta að vera einhverjir svipaðir spítalaþættir til.
Ciggi: Ég hef heyrt um einn sem gerist á kvennadeild, held að Oprah eða Whoopi framleiði hann.
Addi: Já, við megum ekki gleyma að setja Opruh á dagskrá, konur elska Opruh!
Biggi: Vonandi er nóg af stöffi um legsig, konur á trúnó, hjónabandserfiðleika sjúklinganna og slíkt í spítalaþættinum, er það ekki öruggt?
Ciggi: Jú, alveg pakkað.
Addi: Við verðum eiginlega að setja spennuþátt líka, sumar konur eru alveg að fíla spennu. (sorrí)
Ciggi: Ekki samt of ofbeldiskenndan, frekar svona mjúkan spennuþátt.
Biggi: En þátt með dulrænu ívafi? Konur elska allt dulrænt!
Ciggi: Svo er líka tískuþátturinn What not to Wear. Djöfull fara þær illa með druslurnar eða kéllingarnar sem kunna ekki að klæða sig. Konur eiga eftir að elska þetta.
Biggi: Við getum kannski látið dagskrána enda á sannsögulegri kéllingamynd?
Addi: Snilld, mar! Þetta er ákveðið! Við hljótum að fá helling af dömubindaauglýsingum.